काठमाडौं– नेपालीलाई नक्कली भुटानी शरणार्थी बनाएर ठगी गरेको प्रकरणमा पक्राउ परेका नेपाली कांग्रेसका नेता तथा पूर्वगृहमन्त्री बालकृष्ण खाणको मोबाइल समेत फर्म्याट रहेको पाइएको छ।
खाणलाई पक्राउ गरे लगत्तै मोबाइल बरामद गरिए पनि फर्म्याट गरेको पाइएको हो। खाणले मोबाइल फर्म्याट गरेपछि जाँचका लागि डीएफएल (डिजिटल फरेन्सिक ल्याब) पठाइएको छ। जिल्ला प्रहरी परिसर काठमाडौंले खाणको मोबाइलमा भएका डेटा तथा प्रमाणहरू रिकभरका लागि डीएसफलमा पठाएको हो।
डीएफएलको रिपोर्ट एक/दुई दिनमै आउने भएकाले थप तथ्य खुल्न सक्ने प्रहरीको अनुमान छ। खाणलाई पक्राउ गर्नुपर्ने मुख्य प्रमाण पनि प्रहरीले मोबाइलबाटै बरामद गरेको थियो।
सचिव टेकनारायण पाण्डेको मोबाइलका डेटाहरू रिकभरका लागि डीएफएलमा पठाइएको थियो। डीएफएलले डेटाहरू रिकभर गरेपछि पाण्डे र खाणबीच नक्कली भुटानी शरणार्थी प्रकरणबाट कुराकानी भएको, आर्थिक लेनदेनको प्रमाण भेटिएको थियो। सोही आधारमा खाणलाई पक्राउ गरियो।
खाणको मोबाइलको पनि डेटाहरू रिकभर भएपछि थप प्रमाणहरू भेटिने तथा अन्य व्यक्ति संलग्न भए उनीहरुविरुद्ध पनि प्रमाण आउनसक्ने प्रहरीको विश्वास छ।
खाण अहिले जिल्ला प्रहरी परिसर काठमाडौंको हिरासतमा छन्। उनलाई बुधबार प्रहरीले चाबहिलको मैजुबहालस्थित घरबाट पक्राउ गरेको हो। हिरासतमा बस्न नमानेका खाणलाई डीएसपीको कार्यकक्षमा राखिएको छ। उनीमाथि अनुसन्धान गर्न भन्दै जिल्ला अदालत काठमाडौंले तीन दिनको म्याद दिएको छ।
यो प्रकरणमा खाणसहित अहिलेसम्म १२ जना पक्राउ परेका छन्। पक्राउ पूर्जी जारी भएका केही व्यक्तिहरू भने फरार छन्। आशंका गरिएका केही व्यक्तिहरूमाथि प्रहरीले प्रमाण जुटाउने काम गरिरहेको छ।
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा ०७६ जेठमा एउटा कार्यदल नै गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने सदस्य थिए।
तर, पन्थी नेतृत्वको कार्यदलले मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यसवापत् मोटो रकम असुल्ने उद्देश्यसहित ४ सय २९ जनालाई भुटानी शरणार्थीको सूचीमा समेटिएको थियो।
तीमध्ये केही नक्कली भुटानी शरणार्थी थिए। पछि बालकृष्ण खाण गृहमन्त्री भएपछि त्यो प्रतिवेदन समेत कीर्ते गरेर अनुसूची थप्दै थप व्यक्तिहरूको नाम राखिएको पाइएको प्रहरीले जनाएको छ।
नक्कली शरणार्थी बनाएर मोटो रकम असुल्ने योजनामा इन्द्रजित राईदेखि अन्य नेता तथा गृह मन्त्रालयकै उच्च तहका कर्मचारीको संलग्नता रहेको पीडितहरूले बताएका थिए।
नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन गुपचुप पारिएको थियो। गुपचुप पारिएको उक्त प्रतिवेदन पछि अहिले पक्राउ परेको गिरोहको हातमा पुगेको थियो।
उनीहरूले त्यही प्रतिवेदनमा ४ सय ४६ जना नेपाली नागरिकको नाम समेट्दै उनीहरूलाई अमेरिका लैजाने भनेर रकम उठाउने गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
