काठमाडौं– ११ दिनदेखि इन्द्रजित राई जिल्ला प्रहरी परिसर काठमाडौंका हिरासतमा छन्। नेपाली नागरिकलाई नक्कली भुटानी शरणार्थी बनाएर एक अर्ब रुपैयाँ भन्दा बढी ठगीको आरोपमा हिरासतमा बसेका ११ दिन बित्दा समेत राईबाट कुनै सूचना प्रहरीले लिन सकेको छैन।
बरु अनुसन्धानको क्रममा सोधपुछ गर्दा उल्टै राईले प्रहरीलाई हैरानी दिने गरेका छन्। प्रहरीले नै आफूलाई सोधपुछका क्रममा यातना दिएको भन्दै उनी मानव अधिकार आयोगसम्म पुगेका छन्। राईका आफन्तले आयोगमा उजुरी हालेका छन्।
ठगी प्रकरणका विभिन्न प्रमाण देखाएर सोधपुछ गर्दा पनि राई भने मौन बस्छन्। ‘जे बोल्नुछ अदालतमै बोल्छु,’ राईलाई उदृत गर्दै प्रहरी स्रोतले भन्यो, ‘७० वर्ष नाघेका वृद्ध राई उल्टै भन्छन्– तिमीहरू पनि सधैं यहाँ हुदैनौं नि।’
राईले मुख नखोले पनि प्रहरीले भने उनीबाट पुग्न सकिने बिन्दुसम्मको अनुसन्धानलाई तिव्रता पारेको छ।
तत्कालीन गृहमन्त्री तथा नेकपा एमालेका नेता रामबहादुर थापा बादल गृहमन्त्री भएका बेला राई उनको सुरक्षा सल्लाहाकार थिए। राईले त्यहाँ विचौलियाले नै लगेको समेत पाइएको छ।
विचौलियाको योजनाअनुसार बादलको सुरक्षा सल्लाहाकार बनेका राईले भुटानी शरणार्थीको दीर्घकालीन समस्या समाधानका लागि कार्यदल बनाएर काम गर्नुपर्ने भन्दै बादललाई कन्भिन्स गराएका थिए।
मन्त्रीस्तरीय निर्णयबाट कार्यदल बनाउन स्वीकृत गरेपछि सँगै पूर्वसहसचिव बालकृष्ण पन्थीको नेतृत्वमा कार्यदल बनाइएको थियो।
कार्यदलका अर्का सदस्य गणेश केसीलाई भने विज्ञ भन्दै राईले नै कार्यदलमा राखेका थिए। यसरी कार्यदल बनाउँदा नै सेटिङमा बनाएर अवैध रुपमा ठगी गरेको आरोपमा राई अहिले हिरासतमा छन्। राईसँग जोडिएका व्यक्तिहरू को–को हुन् र तिनीहरुले कसरी काम गरेका थिए भन्ने विषय अहिले प्रहरीले अनुसन्धान गरिरहेको छ।
‘कार्यदल बनाउँदै सुरुमै सेटिङ भएको र त्यसमा राई समेत संलग्न रहेको भनेपछि उहाँबाट पनि केही प्रमाणहरू आउनुपर्ने हाम्रो विश्लेषण हो। तर उहाँ बोल्न नै मान्नुहुन्न,’ प्रहरी स्रोत भन्छ।
तर प्रहरीले राईबाट पुग्न सकिने केही हाइप्रोफाइलका बारेमा अनुसन्धान गरिरहेको छ। उनीहरुविरुद्ध प्रमाण जुटाउने काम प्रहरीले गरेको छ।
राईले बादलको सुरक्षा सल्लाहकार भएको केही समयमै ललितपुरको ठेचोमा करिब ५ करोड रुपैयाँ बराबरको घर समेत किनेको पाइएको प्रहरी अनुसन्धानबाट खुलेको छ।
इन्द्रजित पक्राउ नपर्नु र यही प्रकरणा जोडिएका उनका छोरा निरज समेत फरार हुँदा राई बाबुछोराबाट माथिसम्म पुग्न सक्ने नेसक्कसमा ब्रेक लाग्नसक्ने आशंका गरिएको छ। इन्द्रजितभन्दा उनका छोराले यो प्रकरणमा मुख्य भूमिका निभाएर ठगी धन्दा चलाएको प्रहरीको बुझाइ छ।
तर उनी पनि फरार हुँदा यो पाटोको अनुसन्धानमा समस्या रहेको प्रहरीले जनाएको छ।
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठमा एउटा कार्यदल नै गठन गरिएको थियो। गृह मन्त्रालयका पूर्व–सहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने सदस्य थिए।
तर, पन्थी नेतृत्वको कार्यदलले भने मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यसबापत् मोटो रकम असुल्ने उद्देश्यसहित ४ सय २९ जनालाई भुटानी शरणार्थीको सूचीमा समेटिएको थियो।
तीमध्ये केही नक्कली भुटानी शरणार्थी थिए। पछि बालकृष्ण खाण गृहमन्त्री भएपछि त्यो प्रतिवेदन समेत कीर्ते गरेर अनसूची थप्दै थप व्यक्तिको नाम राखिएको पाइएको प्रहरीले जनाएको छ।
नक्कली शरणार्थी बनाएर मोटो रकम असुल्ने योजनामा इन्द्रजित राईदेखि अन्य नेता तथा गृह मन्त्रालयकै उच्च तहका कर्मचारीको संलग्नता रहेको पीडितहरूले बताएका थिए।
नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन नै गुपचुप पारिएको थियो। गुपचुप पारिएको उक्त प्रतिवेदन पछि अहिले पक्राउ परेको गिरोहको हातमा पुगेको थियो।
उनीहरूले त्यही प्रतिवेदनमा ४ सय ४६ जना नेपाली नागरिकको नाम समेट्दै उनीहरूलाई अमेरिका लैजाने भनेर रकम उठाउने गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
