काठमाडौं– नक्कली भुटानी शरणार्थी प्रकरणमा एमाले सचिव टोपबहादुर रायमाझीविरुद्ध पक्राउ पुर्जी जारी भएलगत्तै नेकपा एमालेका अध्यक्ष केपी शर्मा ओली प्रधानमन्त्री पुष्पकमल दाहाल प्रचण्डलाई भेट्न सिंहदबारमा पुगेका थिए।
उक्त भेटपछि पत्रकारसँग कुरा गर्दै ओलीले रायमाझीको बचाउ गरे। ‘यो तानिएको हो कि तनाएको हो भनेर हामी अध्ययन गर्दैछौं। अध्ययन गरेपछि हामी आफ्नो धारणा बाहिर ल्याउँछौं।’ ओलीले रायमाझीको बचाउ गरेपछि पत्रकारले अनुसन्धानमा एमालेले सहयोग गर्छ? भन्दै प्रश्न गरे। त्यसको जवाफमा ओलीले भनेका थिए, ‘अवश्य, निर्दोष पर्नु हुँदैन। दोषी उम्किनु हुँदैन। दोषी उम्काउने हाम्रो प्रयास हुँदैन। निर्दोष फसाउन खोजियो भने हामी सहँदैनौं।’
साथै उनले भुटानी शरणार्थीको थर्ड कन्ट्री सेटलमेन्ट गर्ने कुरामा इनिसिएसन लिने मान्छे आफैं भएको दाबी गर्दै यो प्रक्रियाबारे जानकार रहेको बताए। उनले भने, ‘त्यसपछि अलि पछाडि सुन्नमा आयो, केही नक्कली शरणार्थी खडा गर्ने कोसिस हुँदैछ रे। अनि मैले त्यसबेला गृहमन्त्रीज्यूलाई बोलाएर भनेँ–यस्तो सुन्दैछु म, यस्तो बुझ्ने र रोक्ने। त्यसबेला अनुसन्धान विभागलाई पनि मैले बोलाएर यस्तो यस्तो कुरा सुन्दैछु–यसमा राम्ररी खोजीनीति गर्नु भनेको थिएँ।’
लगत्तै ओलीले चार वर्षअघि काटिएका चेक त्यो पनि काट्ने मान्छेसँगै रहेकाले आफ्ना सचिवलाई फसाउन षड्यन्त्र गरिएको हुनसक्ने बताए। उनले एउटा बहालवाला सांसद त्यो पनि उपप्रधानमन्त्री भइसकेको व्यक्तिलाई पक्राउ पुर्जी जारी गरेर बाटैबाट समाउन खोज्नु रहस्यपूर्ण रहेको बताए।
पक्राउ पुर्जी जारी भएको तथा के भएको हो भनेर रायमाझीसँग आफूले कुरा गरेको पनि ओलीले बताए। ‘पक्राउ पुर्जी जारी भएको कुरा सुन्छु नि। के भएको हो भनेर सोधेँ। तर उहाँले त्यस्तो केही होइन भनेर जवाफ दिनुभयो’, ओलीले भने। आफू काठमाडौं आउँदै गरेको र प्रहरी कार्यालय नै जाने खबर ओलीलाई रायमाझीले गरेका थिए।
उसो त अर्घाखाँचीमा कार्यक्रम सकेर भैरहवा आइसकेपछि पनि रायमाझीले प्रहरीलाई नै खबर गरेर आफैं उपस्थित भएर अनुसन्धानमा सघाउने बताएका थिए। तर उनी सोही दिन रातिदेखि फरार छन्। ओलीले उपप्रधानमन्त्रीजस्तो मान्छे फरार नहुने दाबी गरेको भोलिपल्टदेखि नै रायमाझी सम्पर्कविहीन छन्।
बैशाख २१ गते सिंहदरबारमा प्रधानमन्त्रीसँगको भेटपछि उनले सञ्चारकर्मीसँग आफ्ना सचिव कतै नभाग्ने तर बाटैमा पक्राउ गर्न खोज्नु षड्यन्त्र भएको आक्रोश पोखेका थिए। त्यसको एक सातासम्म पनि सम्पर्कमा नआएपछि उनै ओलीले सचिव रायमाझीलाई आत्मसमर्पण गर्न अनुरोध गरेका छन्।
पार्टी कार्यालय च्यासलमा सुरु भएको केन्द्रीय कमिटी बैठकलाई सम्बोधन गर्दै अध्यक्ष ओलीले आरोप लागिसकेपछि अनुसन्धानमा सघाउनुपर्ने भन्दै एक साताभित्र आत्मसमर्पण गर्न अनुरोध गरेका हुन्।
उनले यसअघि पार्टीले औपचारिक रुपमा विज्ञप्ति जारी गरेर निलम्बन गरेको र आत्मसर्मपण गर्नसमेत आग्रह गरेको भन्दै पुन: आफूले आग्रह गर्ने बताए। ‘नेकपा एमाले भ्रष्टाचार विरुद्ध लड्दै आएको दल हो। हाम्रै कतिपय साथीहरु, मन्त्रिपरिषद्मा रहेका साथीहरुका पनि धेरै कुरा आएका छन्,’ ओलीले भने, ‘सचिव टोपबहादुर रायमाझी फरार हुनु भएको छ। म उहाँलाई आत्मसर्मपण गरेर अनुसन्धानलाई सहयोग गर्न आग्रह गर्दछु।’
निर्दोषलाई फसाउने कार्य हुनसक्ने तर त्यसकाविरुद्ध एमाले लड्ने पनि उनले बताए। ओलीले नक्कली भुटानी शरणार्थी प्रकरणमा मुछिएका आफ्नो पार्टीका सांसद टोपबहादुर रायमाझी बुधबार प्रहरीकहाँ हाजिर हुने भनिए पनि उनी नआएको बताएका छन्। २२ गतेदेखि सम्पर्कविहीन भएका रायमाझीबारे एमालेले २७ गतेमात्र निलम्बनको निर्णय गरेको थियो।
त्यसअघि बसेको सचिवालय बैठकले उनको बचाउ नै गरेको थियो। बुधबार नेपाली कांग्रेसका नेता बालकृष्ण खाण पक्राउ परेपछि आरोपितलाई एमालेले बचाएको आरोप लाग्न थालेपछि निलम्बन गर्ने निर्णय गरेको थियो। लगत्तै उनलाई आत्मसर्मपणको अनुरोध पनि गरिएको थियो।
बिहीबारदेखि सुरू भएको एमाले केन्द्रीय कमिटी बैठकलाई सम्बोधन गर्दै ओलीले पुन: आत्मसर्मपणको आग्रह गर्दै किन उनी उपस्थित भएनन् भनि प्रश्न पनि गरे। उनले रायमाझी निकटले आफूलाई फोन गरेको जानकारी केन्द्रीय सदस्यलाई दिए। उनले यसो भनि रहँदा रायमाझी उनको सम्पर्कमै रहेको देखिन्छ।
‘मलाई उहाँनिकटका मानिसले फोन गरेका थिए के गर्ने भनेर,’ ओलीले भने,‘मैले प्रहरीकोमा हाजिर हुनुस् भनेको थिएँ। उहाँ हिजो प्रहरीकोमा आउने कुरा सरकारी स्रोतबाट पनि सुनेको थिएँ तर उहाँ आउनु भएनछ।’
ओलीले यसरी रायमाझीबारे बताइरहँदा प्रहरी भने उनको लोकेशनको खोजी र ७७ जिल्लामै सर्कुलरको अपडेट फलो गरिरहेको छ। प्रहरीले उनलाई बयानका लागि उपस्थित गराउन देशभरी आफ्नो संयन्त्र परिचालन गरे पनि सफलता पाउन सकेको छैन। तर, प्रमुख प्रतिपक्ष दलको नेताले सम्पर्कमा रहेको भनेर निर्धक्क भनिरहेका छन्।
‘आरोप लाग्दैमा कोही दोषी हुँदैन, तर पक्राउ पुर्जी जारी नै भइसकेपछि उहाँले कानुनी प्रक्रियालाई सहयोग गर्नुपर्छ,’ बैठकमा ओलीले भने, ‘हामीले उहाँलाई सचिवबाट यही कारण निलम्बन गरेका छौं।’
ओलीले यसरी आफ्ना नेता तथा कार्यकर्तालाई जानकारी दिइरहँदा रायमाझी प्रकरणमा एमालेमाथि झन प्रश्न उठ्ने देखिन्छ। आरोपितलाई बचाउन एमालेले हर सम्भव कोशिस गरिरहेको आरोप लाग्ने अवस्थालाई अन्त्य गर्न पार्टी नेतृत्वले रायमाझीलाई तत्काल प्रहरीको जिम्मा लगाउनुपर्ने वा प्रहरीको सम्पर्कमा आउन लगाउनुपर्ने देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
