काठमाडौं– नक्कली शरणार्थी प्रकरणमा जोडिएका सांसदहरु विदेश भाग्न सक्ने भन्दै उनीहरुको राहदानी जफत हुनुपर्ने माग संसद्मा उठेको छ। राष्ट्रिय स्वतन्त्र पार्टीका सांसद डोलप्रसाद अर्यालले भ्रष्टाचारमा नाम जोडिएका सांसदहरुको राहदानी जफत गर्न माग गरेका हुन्।
प्रि–बजेटमा भाग लिँदै उनले यस्तो माग गरेका हुन्। उक्त प्रकरणमा आरजु राणा, मञ्जु खाणको नाम आइरहेको छ भने टोपबहादुर रायमाझीविरुद्ध पक्राउ पुर्जी नै जारी भएको थियो। बुधबारको प्रतिनिधि सभा बैठकमा बोल्दै सांसद अर्यालले भ्रष्टाचारमा नाम जोडिएका सांसदहरु देश छोडेर भाग्नसक्ने खतरा भएको भन्दै राहदानी तुरुन्त जफत गर्न माग गरे।
उनले नक्कली भुटानी शरणार्थी प्रकरणमा प्रहरीलाई स्वतन्त्र रुपले काम गर्न दिनुपर्ने र प्रहरीले जुटाएको प्रमाण बीचमै हराउन नहुने पनि बताए। उनले अपराधीलाई बचाउन खोजेमा रास्वपाले सडक र सदन दुवैमा जनताको आक्रोशलाई साथ दिने बताए।
‘भूटानी शरणार्थीको विषय शुरुवात मात्रै हुन्। यस्ता हजारौं भ्रष्टाचारका फाइलहरु खोल्दै जानुपर्ने छ। सरकारले खुट्टा नकमाओस्,’ उनले भने, ‘प्रहरीलाई स्वतन्त्र रुपले काम गर्न दिनुपर्छ। तर प्रहरीले पनि मिहेनत गरेर जुटाएको प्रमाण बीचैमा हराउनु हुँदैन। खबरदार! अदालत, अख्तियार दुरुपयोग अनुसन्धान आयोगमा भागबन्डाको नियुक्ति हुन्छ भनेर यही रोष्टमबाट पटक–पटक भनिएको सबैलाई याद होला। खबरदार! अपराधीलाई कुनै हालतमा बचाउन खोजियो भने राष्ट्रिय स्वतन्त्र पार्टीले सदन, सडक दुवैमा जनताको आक्रोशलाई साथ दिनेछ। देश छोडेर भाग्नसक्ने खतरा भएकोले भ्रष्टाचारमा नाम जोडिएका सांसदहरुको राहदानी तुरुन्त जफत गरियोस्।’
उनले पार्टीभित्र भ्रष्टहरु पालेर संसद्मा ठूला कुरा नगर्न राजनीतिक दलहरुलाई चेतावनीसमेत दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790409093.jpg)
-1786602170.png)
