काठमाडौं- प्रतिनिधि सभाको बैठकमा नक्कली भुटानी शरणार्थीको विषयमा चर्को बहस भएको छ। बजेट अधिवेशनको पहिलो दिन नै सत्तापक्ष र प्रतिपक्षका सासदहरुका बीचमा एक अर्कोलाई आरोप लगाउने गरी बहस भएको हो।
सभामुख देवराज घिमिरेले प्रतिनिधि सभाको बैठक सुरु गर्ने वित्तिकै विवाद सुरु भएको थियो। यसरी सुरु भएको बैठकमा पक्ष-विपक्षमा तर्क पेस हुन थालेपछि केही सांसदहरुले भने यस्तो बहस भएकोप्रति दु:ख व्यक्त गरेका छन्।
नेपाली कांग्रेसका सांसद सरिता प्रसाईंले संसदमा नक्कली भुटानी शरणार्थीका विषयमा भएको बहसमा विशेष समय लिएर बोल्दै दु:ख लागेको टिप्पणी गरिन्।
‘देशका जनता संघीय लोकतन्त्र आउँदा खुसी भएका थिए। तर आज संसदमा भ्रष्टाचारको पक्ष र विपक्षमा बोल्दा लाजमर्दो भएको छ,’ उनले भनिन्, ‘भ्रष्टाचारीलाई संरक्षण गरौं भनेर कसैले भनेका छैनौं। तर आज भ्रष्टाचारका विषयमा पक्ष र विपक्षमा जसरी आवाज उठेको छ, यो दु:खलाग्दो छ।’
उनले नक्कली भुटानी शरणार्थी बनाउने कार्यमा संलग्नहरुलाई कारबाही गर्न र अनुसन्धान गर्नुपर्नेमा एकमत हुनुपर्नेमा यसरी पक्ष विपक्षमा उभिनु गलत कार्य भएको बताइन्।
उनले संसदमा नागरिकता जस्तो महत्वपूर्ण विधेयक किन पेस भएन भनी प्रश्न गरिन्। उनले उत्तर दिने थलोमा यस्तो कुरा नसुनिएको भन्दै भ्रष्टाचारमा बहस हुनु गलत भएको बताइन्। उनले भ्रष्टाचारमा कसैलाई पनि उन्मुक्ति दिन मिल्दैन भन्दै नक्कली शरणार्थी बनाउने सबैमाथि कारबाही हुनुपर्ने माग गरिन्।
उनीपछि बोल्दै जनता समाजवादी पार्टीकी सांसद रञ्जुकुमारी झाले पनि संसदमा भएको बहसले दु:ख लागेको टिप्पणी गरिन्। ‘संसदको बहस देखेर बडो दु:ख लागेको छ। हाम्रै बीचका सांसदहरु मानव तस्करीमा लागेका छौं,’ उनले भनिन्, ‘सांसदहरु मन्त्री बनेर मानव तस्कर बनेकोमा दु:ख लागेको छ। यसमा पनि हामी पक्ष र विपक्षी भएका छौं।’
नक्कली भुटानी शरणार्थी बनाउने कार्यमा एमाले नेता टोपबहादुर रायमाझी विरुद्ध पक्राउ पूर्जी जारी भएपछि सुरु भएको विवादले संसद् बैठक मुल विषयमा प्रवेश नै हुन सकेको छैन। सुरुमै यो विषय उठेपछि सभामुखले उठ्ने सांसदहरुलाई समय उपलब्ध गराउन थालेका थिए। यो क्रम बढ्दै गएपछि संसदमा विवाद सुरु भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790399464.jpeg)
-1790307658.jpeg)
-1786602170.png)
