काठमाडौं– बिहीबार बसेको नेपाली कांग्रेसको पदाधिकारी बैठकमा सभापति शेरबहादुर देउवा र सहमहामन्त्री जीवन परियारबीच भनाभन भएको छ। परियारले सरकारमा मन्त्री सहभागी गराउँदा पार्टीले समावेशीता नअपनाएको भन्दै असन्तुष्टि पोखेका थिए।
परियारले पार्टीले पठाएका मन्त्रीहरु समावेशी नभएको भन्दै सभापति देउवाको सिफारिसमाथि प्रश्न उठाएका थिए। सरकारमा सहभागी हुने भएपछि कांग्रेस कार्यसम्पादन समितिले समावेशीता र प्रदेशहरुमा सन्तुलन मिलाएर मन्त्री छान्ने मापदण्ड बनाइएको थियो।
तर, सरकारमा कांग्रेसमा पाएका आठ मन्त्री समावेशीताअनुसार नभएको भन्दै बिहीबार सभापति देउवामाथि सहमहामन्त्री परियाले प्रश्न उठाएपछि देउवा झोक्किएका थिए। जवाफमा देउवाले सबैलाई एकैपटक मौका दिन नसकिने भन्दै पार्टीको मापदण्डलाई अर्कोपटक विचार गर्ने बताए।
त्यसपछि परियारले सभापति देउवामाथि सधैं यस्तै गरिहँदा पार्टीप्रति आकर्षण कम भएको बताएपछि देउवाले प्रतिवाद गरेका थिए। स्रोतका अनुसार सभापति देउवा र सहमहामन्त्री परियारबीचमा चर्काचर्की नै हुनथालेपछि महामन्त्रीद्वय गगन थापा र विश्वप्रकाश शर्माले बैठकको माहोल शान्त बनाउन भूमिका खेलेका थिए।
बिहीबार मात्रै कांग्रेसका तीन मन्त्रीले शपथ लिएर कार्यभार सम्हालेका छन्। यद्यपि, कांग्रेसभित्र मन्त्री छनोटलाई लिएर ठूलो असन्तुष्टि देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
