काठमाडौं– बुधबार प्रधानमन्त्री पुष्पकमल दाहाल प्रचण्डले नवौं पटक मन्त्रिपरिषद् विस्तार गरे। कांग्रेसका तर्फबाट थप ३ जना मन्त्री नियुक्त भए। योसँगै अब प्रचण्ड नेतृत्वको सरकारमा कांग्रेसका मन्त्री ८ पुगेका छन्।
संख्यात्मक हिसाबमा कांग्रेसले धेरै मन्त्री पाए पनि पार्टीको आन्तरिक शक्ति संघर्षमा भने सभापति शेरबहादुर देउवाले इतर पक्षलाई फेरि कमजोर पारेका छन्। जसरी पनि इतरपक्षलाई तल पार्ने रणनीतिमा लागेका देउवाले बुधबार मन्त्री सिफारिसमा पनि त्यही गरे।
सरकारमा सहभागी हुँदा नै कांग्रेसको इतर पक्ष (डा शेखर कोइराला–गगन थापा पक्ष)ले जसरी पनि आफ्नो तर्फबाट ३ जना मन्त्री सिफारिस हुनुपर्ने अडान लिएको थियो। तर बुधबार मन्त्री नियुक्त हुँदा भने यो पक्षबाट जम्मा २ जना मात्र सिफारिस भए।
माओवादी अध्यक्ष प्रचण्ड नेतृत्वको वर्तमान सरकारको सत्ता समीकरणमा आएसँगै देउवाले इतर पक्षलाई कम आकलन गर्दै अघि बढेका थिए। जसका कारण मन्त्रिपरिषद् विस्तारको क्रममा कांग्रेसमा द्वन्द्वसमेत देखियो। सोही कारण लामो समयसम्म मन्त्रिपरिषद्ले पूर्णतासमेत पाएन। बुधबार ३ जना मन्त्री थपिए पनि मन्त्रिपरिषद् पूर्ण भइसकेको भने छैन।
बुधबार प्रधानमन्त्रीको सिफारिसमा राष्ट्रपति रामचन्द्र पौडेलले कांग्रेस उपसभापति धनराज गुरुङ तथा नेताहरु मोहन बस्नेत र डिगबहादुरर लिम्बुलाई मन्त्री नियुक्त गरेका छन्। गुरुङलाई कानुन, बस्नेतलाई स्वास्थ्य र लिम्बुलाई युवा तथा खेलकुद मन्त्रालयको जिम्मेवारी दिइएको छ।
कांग्रेसका ८ मन्त्रीमध्ये देउवा पक्षबाट उपप्रधानमन्त्रीसहित रक्षामन्त्रीको जिम्मेवारीमा पूर्णबहादुर खड्का, अर्थमन्त्री डा प्रकाशशरण महत, परराष्टमन्त्री एनपी साउद, सहरीविकास मन्त्री सिता गुरुङ, उद्योगमन्त्री रमेश रिजाल र स्वास्थ्यमन्त्रीमा मोहनबहादुर बस्नेत रहेका छन्। शेखरपक्षबाट उपसभापति गुरुङ कानुनमन्त्री र डिगबहादुरर लिम्बु युवा तथा खेलकुद मन्त्री बनेका छन्।
पार्टीको १४औं महाधिवेशनमा शेखर समूहले ४० प्रतिशत मत पाएको थियो। तर देउवाले मन्त्रिपरिषद्मा सहभागी गराउँदा भने २५ प्रतिशतमा झारिदिएका छन्। पेलेरै देउवाले मन्त्रिपरिषद्मा कोइराला पक्षलाई कम सहभागी गराए पनि अहिल्यै कुनै धारणा भने बाहिरिएको छैन।
सभापति देउवाले दुई मन्त्री दिँदा इतर पक्षका नेताहरुले मन्त्रीको नाम नै नदिने अडान लिएका थिए। इतर पक्षले आफ्नो समूहको बैठक नै गरेर ३ मन्त्री र राम्रो मन्त्रालयको माग गरेका थिए। जसलाई काउन्टर दिन देउवाले किस्ता–किस्तामा मन्त्री नियुक्त गर्ने रणनीति अपनाए र अन्तत: शेखर पक्षलाई दुई मन्त्री दिएका छन्। जसलाई लिएर शेखर पक्षका नेताहरुले बुधबार आश्चर्य व्यक्त गरेका छन्।
खासगरि इतर पक्षबाट नेता शेखर कोइराला र महामन्त्री गगन थापा सभापति देउवासँग संवादमा थिए। महामन्त्री थापाले त युवा मध्येबाट नेता प्रदीप पौडेललाई स्वास्थ्यमन्त्री बनाउन जोडबल गरे। तर, देउवाले त्यसलाई पनि खासै वास्तै गरेनन्। पछिल्लो दुई दिनयता सभापति देउवाले उपसभापतिद्वय र महामन्त्रीद्वयसँग पार्टी र सरकारको सन्दर्भमा लगातार छलफल गरिरहेका थिए।
देउवाले मंगलबार नेता शेखर कोइरालासँग पनि छलफल गरेका थिए। कोइराला मंगलबार राति नै उपचारका लागि सिंगापुर गएका बताइएको छ। देउवाले उपसभापतिद्वय र महामन्त्रीहरुको आपसी छलफलमै बुधबार मन्त्रीहरु सिफारिस गरेका हुन् वा होइनन् त्यो खुलेको छैन। तर नेता कोइरालासँग छलफल भने गरेको देखिन्छ। किनकि कोइरालाका विश्वासपात्र लिम्बुलाई देउवाले युवा तथा खेलकुदमन्त्री बनाएका छन्।
कांग्रेसका एक पदाधिकारीका अनुसार देउवाले बिहीबार पुन: पार्टीका सबै पदाधिकारीहरुलाई अनौपचारिक छलफलका लागि आफ्नो निवासमा बोलाएका छन्। जहाँ पार्टीका विषयमा मात्रै नभइ मन्त्री नियुक्तिका विषयमा पनि कुरा उठाउने इतरपक्षको तयारी छ। सहमहामन्त्रीहरुबाट बद्री पाण्डे र जीवन परियार मन्त्री बन्ने लाइनमा थिए। तर एकाएक नयाँ मन्त्रीहरु नियुक्त भएका कारण यो विषय बैठकमा उठाइने नेताहरु बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
