काठमाडौं- एमालेसँगको सत्ता-गठबन्धन भत्किएर नेपाली कांग्रेससँग सहकार्य भएलगत्तै मन्त्री बन्ने चर्चामा रहेकामध्ये एक थिए, कांग्रेस केन्द्रीय सदस्य मोहनबहादुर बस्नेत। तर उनी दुई पटक प्रधानमन्त्री पुष्पकमल दाहाल ‘प्रचण्ड’ले मन्त्रिपरिषद् विस्तार गर्दा पनि अटाएका थिएनन्।
बुधबार नवौं पटक भएको मन्त्रिपरिषद् विस्तारमा भने बस्नेतले आफूले रोजेकै मन्त्रालय पाएका छन्। बस्नेतले सिन्धुपाल्चोक क्षेत्र-२ मा निर्वाचित भएपछि एक भेटमा आफूले भौतिक पूर्वाधार दाबी गर्ने, नपाए स्वास्थ्य तथा जनसंख्या मन्त्रालयमा दाबी गर्ने बताएका थिए।
पार्टी सभापति शेरबहादुर देउवा र उनकी पत्नी आरजु राणा निकट रहेका बस्नेत यसअघि २०५८ सालमा स्वास्थ्य राज्यमन्त्री भएका थिए। त्यही कारण उनले आफू स्वास्थ्यमै जाने बताएका थिए। स्वास्थ्य क्षेत्रको अनुभव पनि भएका कारण उनले उक्त मन्त्रालय दाबी गरेका थिए। यसअघि उनी सरकारका प्रवक्ता र सूचना तथा सञ्चार मन्त्रीसमेत भइसकेका थिए। उनी तेस्रो पटक मन्त्री भएका छन्।
ह्याकुलाको चर्चादेखि क्षेत्र फेरेर ‘कमब्याक’ सम्म
२०७४ सालको निर्वाचनमा उनी सिन्धुपाल्चोक- १ बाट प्रतिनिधि सभा उम्मेदवार थिए। तत्कालीन समयमा उनी सञ्चार मन्त्रीको रुपमा थिए। उक्त निर्वाचनमा नेकपा एमाले र माओवादी केन्द्रले तालमेल गरेको थियो। उक्त क्षेत्रमा माओवादी केन्द्रका नेता अग्नि सापकोटा उम्मेदवारको रुपमा मैदान थिए।
२०७४ सालको निर्वाचनमा सभामुख अग्निप्रसाद सापकोटा र बस्नेतबीचमा ‘ह्याकुलाले पेल्ने’ शब्द निकै चर्चित भयो। उक्त निर्वाचनमा बस्नेत पराजित भए। वाम गठबन्धनका उम्मेदवार हुँदै अग्नि सभामुखसम्म भए। बस्नेत पाँच वर्ष संसद् बाहिरै बसे।
२०७९ मंसिर ४ गते भएको निर्वाचनमा नेपाली कांग्रेस र माओवादी केन्द्रले सहकार्य गरेर उम्मेदवार उठाउने भए। आफू नियमित रुपमा उम्मेदवार हुँदै आएको सिन्धुपाल्चोक-१ उनले दाबी गरे पनि पाएनन्। सत्ता गठबन्धनको भागबन्डामा माओवादीतर्फ परेपछि उनी क्षेत्रविहीन जस्तै हुन लागेका थिए।
यहीबीचमा बस्नेतलाई सिन्धुपाल्चोक- २ बाट निर्वाचन लड्न पार्टीले प्रस्ताव गर्यो। उनी यो चुनौती लिन तयार भए। उक्त क्षेत्रमा दुई पटक निर्वाचित भएका नेकपा एमालेका शेरबहादुर तामाङ उम्मेदवार थिए। एमाले विभाजनको समयमा माधव नेपालतिर जाँदै फेरि एमालेमा फर्किँदै कार्यालय सचिवसम्म भएर अध्यक्ष केपी शर्मा ओली निकट भएका तामाङ उक्त क्षेत्रमा तेस्रो पटक जितेर आफ्नो हाट्रिक पूरा गर्ने दाउमा थिए। तर उनलाई बस्नेतले ब्रेक लगाउँदै संसदको रुपमा प्रतिनिधि सभामा प्रवेश गरे।
बस्नेत आफू मात्र जितेनन्, सत्ता गठबन्धनको उम्मेदवार रहेका माओवादीका उम्मेदवार माधव सापकोटा सुवोधलाई पनि जित हात पार्न सहयोग गरे। योसँगै सिन्धुपाल्चोकको दुवै क्षेत्र सत्ता गठबन्धनका उम्मेदवारले जिते।
बस्नेतको इतिहासः हार-जित उस्तै
कांग्रेस नेता बस्नेत २०४८ कै आम निर्वाचनमा सिन्धुपाल्चोक-१ मा चुनाव लडेका थिए। हालसम्म चुनाव लडेका उनले एउटामा चुनाव जित्ने र अर्को हार्ने गरेको देखिन्छ।
२०४८ मा एमालेका अमृतकुमार बोहरासँग पराजित भएका उनले २०५१ मा टिकट नै पाएनन्। २०५६ मा टिकट पाएका बस्नेत बोहरालाई नै हराएर सांसद बने। २०६४ मा टिकट त पाए, तर चुनाव जित्न सकेनन्। २०७० मा टिकट पाएर चुनाव जितेका बस्नेत मन्त्रीसमेत भए। २०७४ मा भने उनले चुनाव पुनः हारे।
उनी केही महिनाअघि चर्चामा रहे तर मन्त्री भएनन्। तर अहिले चर्चा नै नभई एकै पटक मन्त्रीमा नियुक्त भए। राष्ट्रपति रामचन्द्र पौडेलबाट बिहीबार उनीसहित तीन जनाले मन्त्रीको शपथ लिएका छन्।
बस्नेतसँगै नेपाली कांग्रेसका उपसभापति धनराज गुरुङ र डिगबबहादुर लिम्बुले पनि मन्त्री शपथ लिएका छन्। गुरुङ कानुन र लिम्बु युवा तथा खेलकुद मन्त्री बनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
