काठमाडौं– तत्काल प्रधानन्यायाधीशको नियुक्ति गर्न माग गर्दै नेपाल बार एशोसिएसनले आन्दोलन जारी राखेको छ। बुधबार पनि नेपाल बार परिसरमा कानुन व्यवसायीहरुले आन्दोलन जारी राखेका हुन्।
उनीहरुले तत्काल प्रधानन्यायाधीश नियुक्ति गर्न माग गरेका छन्। आन्दोलनका क्रममा सञ्चारकर्मीहरुसँग कुरा गर्दै नेपाल बार एशोसिएसनका अध्यक्ष गोपालकृष्ण घिमिरेले न्यायपालिका प्रमुख तत्काल पाउनुपर्ने बताए। उनले अटोमेटिक ढंगबाट पेसी व्यवस्थापन प्रणाली हुनुपर्ने पनि बताए। उनले नेपालका विभिन्न निकायहरु आफ्नो भूमिकाबाट टाढिँदै गएको बताए।
उनले भने, ‘नेपालको न्यायपालिकाले प्रमुख पाउन नसकेको विषय प्रमुख रुपमा रह्यो। अटोमेटिक ढंगबाट पेसी व्यवस्थापन सिस्टम अगाडि बढ्न सकेन। बेथितिको कुरा एकातर्फ मात्रै छैन। बेथितिको कुरा जताततै छ। संसद बेखबर छ। सरकार बेखबर छ। कयौं विषयहरुमा न्यायपालिका पनि बेखबर छ। यो सबै विषयमा हामीले उठाउनुपर्ने आवश्यकता छ। यो उठाउने ठाउँ भनेको एउटा प्रमुख स्टेक होल्डर भएको नाताले हामी कानून व्यवसायी नै हो। हामीले उठाइराखेका छौं। यो हाम्रो धर्म हो। नेपाली जनता एकातर्फ न्याय नपाएर रुँदै हिँड्नुपर्ने अवस्थाको विद्यमानता छ भने अर्कोतर्फ नेपालका जुन निकायहरु छन्, जुन जिम्मेवार निकायहरु छन्। ति जिम्मेवार निकायहरु आफ्नो भूमिकाबाट च्यूत भएको अवस्था छ। आफ्नो भूमिकाबाट पर सरेको अवस्था हामी देख्दैछौं।’
नेपाल बार एशोसिएसनका पूर्वअध्यक्ष चण्डेश्वर श्रेष्ठ चण्डेश्वर श्रेष्ठले नेपाल बारको आन्दोलन व्यक्तिको लागि नभइ संस्थाको लागि र अदालतमा भइरहेको गलत कामहरुको लागि भएको बताए। उनले उच्च र जिल्ला अदालतहरुमा बाँकी न्यायाधीश तत्काल पूर्ति गर्नुपर्ने माग गरे। कानुन व्यवसायीहरुले संवैधानिक दायित्व पूरा गर, प्रधानन्यायाधीश नियुक्ति अविलम्ब गर, सर्वोच्च अदालत र सबै अदालतहरुमा रिक्त रहेका न्यायाधीश तत्काल नियुक्ति गर, स्वतन्त्र न्यायपालिकाको रक्षा गरौं लगायतका प्लेकार्ड बोकेर विरोध जनाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775812183.jpg)
-1779545841.jpg)
