काठमाडौं- अमेरिकी महिला भनेर फेसबुकमा गफिँदा एक व्यक्तिको आधा करोडभन्दा बढी रकम ठगी भएको छ । ठगिने व्यक्ति हुन् कृषि व्यवसायी हर्कमान लामा।
अमेरिकी महिला भनेर विश्वास गर्दै उनले भनेअनुसार गर्दा हर्कमानको ५४ लाख १० हजार रुपैयाँ ठगी भएको छ। कृषि व्यवसाय तथा सहकारीसमेत सञ्चालन गरेका हर्कमानको एउटा टोली कृषि तालिम तथा भिजिटको लागि भन्दै २०७४ पुसमा मलेसिया, सिंगापुर र थाइल्याण्डको भ्रमणमा निस्केको थियो।
मलेसियामा हर्कमानको रुई मेग्वेल अलिबिरा नाम गरेकी एक अमेरिकन महिलासँग भेट भएको थियो । १० दिनको भ्रमण सकेर हर्कमानको टोली नेपाल फर्कियो। कुरा यत्तिकैमा सकिएको थियो।
यसको ४ वर्षपछि २०७८ फागुनमा रुई मेग्वेल अलिबिराको नामबाट हर्कमानलाई फेसबुकमा फ्रेण्ड रिक्वेस्ट आयो। मलेसियामा भेट भएको अमेरिकन महिला अलबिरा सम्झेर हर्कमानले रिक्वेस्ट एसेप्ट गरे।
साथी बनेपछि म्यासेन्जरमा पनि अलबिराले पनि मेलसियाको भेटबारे बताएपछि हर्कमानले ती महिलालाई विश्वास गरे। उनीहरुबीच थप कुराकानी हुँदै गयो। अलबिराले आफू नेपालमा व्यवसाय गर्न इच्छुक रहेको बताइन्। त्यसका लागि नेपालमा डलर पठाउने र कतिसम्म पठाउन मिल्छ भनेर हर्कमानसँग सोधपुछ भयो।
अलबिराले आफ्नो डेम्लोम्याटिक एजेन्ट ह्यारी जोर्गेमार्फत ८ लाख ६० हजार डलर नेपाल पठाउने र उक्त रकम नेपाल आइपुगेकी हर्कमानलाई रिसिभ गर्न भनियो। त्यसका लागि ह्यारीले ह्वाट् एपमा फोन गर्ने भन्दै ह्यारीको ह्वाट् एप नम्बर समेत अलबिराले हर्कमानलाई पठाए।
त्यसको २ दिनपछि हर्कमानलाई ह्यारीले ह्वाट्स एपमा फोन गर्दै अलबिराले पठाएको ८ लाख ६० हजार डलर रकम काठमाडौं विमानस्थलमा आइपुगेको हर्कमानको ठेगानामा ट्रान्सफर गर्नका लागि १ लाख ५० हजार चाहिने भएकाले मिलन लामाको बैंक खातामा पठाउन भनेका थिए।
सोहीअनुसार हर्कमानले मिलन लामाको बैंक खातामा डेढ लाख रुपैयाँ जम्मा गरे। पछि फेरि भन्सार शुल्कदेखि अन्य बहाना बनाउँदै विभिन्न व्यक्तिको बैंक खाता दिँदै ह्यारी नाम गरेका व्यक्तिले हर्कमानलाई रकम हाल्न लगाए।
रकम नहाले डलर कारोबारको आरोपमा जेलसमेत जान सकिने बताएपछि हर्कमान डराउँदै ह्यारीले भनेअनुसार रकम हाल्न थाले। ह्यारीले भनेअनुसार मिलन लामाको बैंक खातामा डेढ लाख, टेकराज घलानको बैंक खातामा २ लाख, शान्ता बन्जाडेको खातामा ९ लाख, शंकर राउतको खातामा २ लाख, भोलाप्रसाद बन्जाडेको खातामा ६ लाख १० हजार, रिनाकुमारी पाण्डेको नाममा ६ लाख १० हजार, अम्बिका कार्कीको नाममा २ लाख, रमेश प्रसादको नाममा ३ लाख, मुकेश साहको नाममा ५ लाख २० हजार, विवेक कुमार शर्माको नाममा १५ लाख २० हजार र सुनिता कुमारी खड्काको नाममा २ लाख गरी हर्कमानले ५४ लाख १० हजार रुपैयाँ पठाए।
त्यसपछि अलबिरा र ह्यारी नाम गरेका व्यक्ति सम्पर्कबिहिन भएपछि हर्कमान झस्किए। आधा करोड भन्दा बढी रकम पठाएपछि डलर ८ लाख ६० हजार डलर आउनुको साटो मान्छे नै सम्पर्कविहीन भएपछि आफू पीडित भएको भन्दै हर्कमानले जिल्ला प्रहरी परिसर काठमाडौंमा जाहेरी दिएका थिए।
हर्कमानले पैसा पठाएका व्यक्तिहरुलाई फरार प्रतिवादी बनाउँदै परिसर काठमाडौंले अनुसन्धान प्रतिवेदन जिल्ला सरकारी वकिल कार्यालयमा पेस गरेको छ। बुधबार मात्रै ५४ लाख १० हजार ठगीको कसुरमा ११ जनालाई फरार प्रतिवादी बनाएर मुद्दा दायर भएको छ।
मलेसियामा चिनजान भएको अलबिरा बनेर आफ्नै नजिकको साथीले फेक फेसबुक अकाउन्ट खोलेर हर्कमानलाई ठगी गरेको हुन सक्ने बताइएको छ। यद्यपि, अहिलेसम्म कोही पनि पक्राउ नपरेकाले ती अलबिरा, ह्यारी को हुन् भन्ने खुलेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
