काठमाडौं- उच्च अदालत पाटनले बुढानीलकण्ठ ‘हिट एण्ड रन’ प्रकरणमा पृथ्वी मल्ललाई दोषी ठहर गर्ने सजाय सुनाएको छ। मंगलबार उच्च अदालतका न्यायाधीशद्वय राजेन्द्र घिमिरे र जगदीश खरेलको इजलासले सवारी ज्यान मुद्दामा मल्ल कसुरदार ठहर हुने फैसला सुनाएको हो ।
काठमाडौं जिल्ला अदालतले बुढानीलकण्ठको हिट एण्ड रन मुद्दामा पृथ्वी मल्ललाई मादक पदार्थ सेवन गरी सवारी चलाएर लापरबाहीपूर्ण रुपमा पैदल यात्रीलाई ठक्कर दिएर ज्यान लिएको अभियोगमा दोषी ठहर त गरेको थियो तर मागदाबीभन्दा अघि बढेर अर्कै दफामा टेक्दै ६ महिना कैद हुने फैसला सुनाएको थियो ।
२०७८ चैतमा जिल्ला न्यायाधीश सूर्यप्रसाद अधिकारीको इजलासले उनलाई पुर्पक्षका क्रममा थुनामा बसेको अवधि बराबर हुने गरी सजाय सुनाएको थियो। सरकारी वकिलले मल्लको मुद्दामा जिल्ला अदालतको फैसला त्रुटिपूर्ण भएको भन्दै उच्च अदालतमा पुनरावेदन गरेका थिए।
उच्च अदालत जिल्लाको फैसलामा सहमत त भएको छ, तर कैद भने थप हुने भएकाले सजाय पछि निर्धारण गर्ने फैसला गरेको छ । मुलुकी फौजदारी संहिताअनुसार ३ वर्षभन्दा धेरै सजाय हुने मुद्दामा दोषी ठहर गर्ने र सजाय निर्धारण अलगअलग हुन्छ ।
मुद्दा दायर गर्दा मल्ललाई १० वर्ष कैद र सोही अनुसार जरिवाना हुनुपर्ने मागदाबी गरिएको थियो। तर जिल्ला न्यायाधीश अधिकारीको एकल इजलासले आंशिक दाबी पुग्ने फैसला सुनाउँदै उन्मुक्ति दिएको थियो। यो फैसला लगत्तै अधिकारी न्यायपरिषद् छानविनमा तानिएका थिए।
फैसलामा चालकले लापरबाहीपूर्वक सवारीसाधन चलाएको कुरा आंशिक मात्र पुष्टि भएको उल्लेख थियो।
यो मुद्दामा सरकारी पक्षले भवितब्य नभई जानाजान ज्यान मार्ने कार्य भएको दाबी गरेको थियो। तर फैसला गर्दा न्यायाधीशले भवितब्यमा रुपान्तरण गरेर सजाय तोकेपछि विवाद भएको थियो।
काठमाडौं जिल्ला अदालतले चालकलाई जम्मा ६ महिना कैद र १० हजार जरिवाना गर्ने फैसला सुनाएको थियो । यो कैद सजाय सवारी तथा यातायात व्यवस्था ऐनको दफा १६१ को उपदफा ३ अनुसारको थियो।
सरकारी पक्षले मल्लले लापरबाहीपूर्ण रुपमा सवारी चलाएको, मदिरा सेवन गरेको र नेपालको सवारी चालक अनुमतिपत्र समेत नभएको भन्दै सवारी तथा यातायात व्यवस्था ऐनको दफा १६१ को उपदफा २ अनुसार सजाय हुनुपर्ने मागदाबी गरेको थियो।
कारागारको रेकर्डमा मल्ल सात महिना कारागार बसिसकेकाले उनी पुनः कारागार बस्नु नपर्ने हुँदै १० हजार तिरेर विदेश पलायन भएका थिए।
कारागारको रेकर्डमा सात महिना कारागार बसेको भनिए पनि उनी लामो समय अस्पताल बसेका थिए। अस्पतालबाटै उनले सर्वोच्चमा पुनरावेदन गरेका थिए। उनी पाँच लाख धरौटीमा रिहा भएपछि विदेश पलाएन भएका हुन्।
काठमाडौंको बुढानीलकण्ठमा मल्लले अत्यधिक मदिरा सेवन गरी चलाएको कारको ठक्करबाट २०७६ मंसिरमा लीला देवकोटाको ज्यान गएको थियो। काठमाडौं जिल्ला अदालतका न्यायाधीश दीपककुमार दाहालले तत्काल प्राप्त प्रमाणबाट मल्ल निर्दोष होइनन् भन्ने विश्वास गर्न नसकिने भन्दै पुर्पक्षका लागि थुनामा पठाउन आदेश दिएका थिए।
मादक पदार्थ सेवन गरी सतर्कता नअपनाई चलाएको कारको ठक्करबाट निर्दोष व्यक्तिको ज्यान गएको भन्दै अदालतले उनलाई थुनामै राख्नुपर्ने निर्णय गरेको थियो। उक्त आदेशलाई मल्लका वकिलले उच्च अदालत पाटनमा चुनौती दिएका थिए। तर उच्च अदालत पाटनले पनि उनलाई थुनामै पठाउनुपर्ने ठहर गरेको थियो।
त्यसविरुद्ध सर्वोच्च अदालतमा दिएको निवेदनको सुनुवाइ गर्दै न्यायाधीशद्वय मल्ल र शर्माको इजलासले मल्ल डिप्रेसन र दमको बिरामी रहेको तथा कोभिड-१९ को उच्च जोखिममा रहेको बताउँदै ५ लाख धरौटीमा थुनामुक्त गर्न आदेश दिएको थियो।
यस्तो थियो घटना
अमेरिकामा बस्दै आएका काठमाडौंका २१ वर्षीय पृथ्वी मल्ल २३ मंसिर २०७६ मा स्वदेश फर्केका थिए। त्यसको तीन दिनपछि २७ मंसिरमा उनी आफैंले बा१४च ६१२३ नम्बरको कार चलाई साथी करिश मास्केलाई लिएर नक्साल नारायणचौरमा जिम गर्न पुगेका थिए।
त्यहाँबाट साँझ साढे ७ बजेतिर बालुवाटारस्थित पलेन्ज गार्डेन रेष्टुराँमा पुगेर खाना खाएपछि उनीहरु रातभर ठमेलमा बसेका थिए। त्यहाँबाट रातको साढे १ बजे एलओडी क्लबमा पुगे। त्यसपछि बिहान साढे ४ बजे ठमेलस्थित सेनेठ क्लबमा करिशका दुई जना केटी साथीहरू परमिता राणा र मनिषालाई भेटेर उनीहरु निस्केका थिए।
प्रहरीमा दिएको बयानअनुसार त्यसपछि उनीहरू बिहानको ५ बजे बुढानीलकण्ठ हुँदै ग्रिनभ्याली रिसोर्ट पुगेका थिए। त्यहाँ गएर पनि निरन्तर मदिरा सेवन गरेका उनीहरू चढेको कारले त्यहाँबाट पुनः घरतर्फ फर्कंदा सडकको विपरीत दिशामा फुटपाथमा हिँड्दै गरेकी लीला देवकोटालाई ठक्कर दिएर ज्यान लिएको थियो।
प्रहरीमा मल्लले रातभरको अनिद्राले झ्याप्प निदाएपछि आफूले चलाएको कार अनियन्त्रित भई सडकको पल्लो छेउमा हिँडिरहेकी बटुवालाई ठक्कर दिन पुगेको बयान दिएका थिए। यसरी पल्लो पेटिमा रहेको व्यक्तिलाई ठक्कर दिएर हत्या गरेको घटनालाई गम्भीर रुमपा लिँदै मुद्दा दायर भएर पुर्पक्षको बहसका क्रममा थुनामा पठाइएको थियो।
उनीसँग नेपालको ड्राइभिङ लाइसेन्स समेत थिएन। तर प्रहरीमा गरेकोभन्दा उनले अदालतमा उल्टो बयान गरे। चारको स्पिड धेरै भएको र स्टार्ट बन्द नहुँदा भवितकब्यका रुपमा दुर्घटना भएको दाबी गरे।
सम्बन्धित समाचार
सवारी दुर्घटनाको मानवीय कारण: न्यायाधीशले ‘स्वविवेक’ प्रयोग गर्दा ‘लापरबाही’को कसुरमा उन्मुक्ति पाउँछन् चालक
मापसे गरी सवारी चलाएर पैदल यात्रीको ज्यान लिएका चालक जेल चलान
बुढानीलकण्ठ ‘हिट एन्ड रन’मा पैदलयात्रुको ज्यान लिने मल्ललाई सर्वोच्चले छाड्यो धरौटीमा
मोडेल परमिता चढेको गाडी दुर्घटना गराउने मल्ललाई सर्वोच्चले छाड्यो ५ लाख धरौटीमा
हिरोइन परमिता चढेको कारले यसरी लिएको थियो लिलाको ज्यान [बयानसहित]
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
