काठमाडौं– नेपाल विद्युत् प्राधिकरणले कुलेखानी जलाशयको पानीको सतह हाल सुरक्षित अवस्थामा रहेको जनाएको छ। जलाशय क्षेत्रमा न्यून वर्षा भइरहेकाले अहिले बाँधका ढोका खोल्नुपर्ने अवस्था नरहेको प्राधिकरणले स्पष्ट पारेको हो।
प्राधिकरणले सूचना जारी गर्दै बाँधका ढोका खोल्नुपर्ने अवस्था आएमा तल्लो तटीय क्षेत्रका बासिन्दालाई पूर्वजानकारी दिने व्यवस्था मिलाइएको जनाएको छ।
त्यसका लागि तीन चरणको चेतावनी प्रणाली तयार गरिएको छ। प्रत्येक चरणमा साइरन बजाएर तल्लो तटीय क्षेत्रका बासिन्दालाई सतर्क गराइनेछ भने आवश्यक सूचना एसएमएसमार्फत समेत पठाइने प्राधिकरणले जनाएको छ।
पुराना र विदेशी भिडियोबाट भ्रम फैलाएको भन्दै सचेत
प्राधिकरणले सामाजिक सञ्जालमा कुलेखानीको वर्तमान अवस्थासँग सम्बन्धित भन्दै फैलाइएका केही भिडियो तथा सामग्रीप्रति समेत ध्यानाकर्षण गराएको छ।
विदेशका दृश्य तथा पुराना भिडियोलाई कुलेखानीको अहिलेको अवस्थासँग जोडेर ‘कुलेखानी बाँध फुट्यो’ भन्दै अपुष्ट खबर फैलाइएको भन्दै प्राधिकरणले यस्ता सामग्रीप्रति सचेत रहन आग्रह गरेको छ।
आधिकारिक स्रोतबाट तथ्य पुष्टि नगरी सामाजिक सञ्जालमा आएका सामग्रीमा विश्वास नगर्न र शेयर नगर्न प्राधिकरणले अनुरोध गरेको छ।
जलाशयको अवस्थाबारे जानकारी लिन आधिकारिक निकायबाट जारी हुने सूचना मात्र हेर्न तथा सम्बन्धित निकायले जारी गर्ने सुरक्षा निर्देशन पालना गर्नसमेत प्राधिकरणले आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
