काठमाडौं– नेकपा माओवादी केन्द्रका सचिव देवेन्द्र पौडेलले पूर्व लडाकुलाई २ लाख रुपैयाँ दिँदा देश नै कंगाल हुन्छ भने जसरी हल्ला चलाइएको भन्दै त्यस्तो हल्लाले पूर्व लडाकुहरुको अपमान हुने बताएका छन्। सरकारले अयोग्य लडाकुहरुलाई दिने भनिएको २ लाख रुपैयाँ छिटोभन्दा छिटो दिइनुपर्ने पौडेलको भनाइ छ।
पूर्व लडाकुलाई २ लाख दिने विषयमा यसअघिकै सरकारले निर्णय गरेको बताउँदै पौडेलले अहिलेको सरकारले प्रक्रिया मात्रै अगाडि बढाएको बताए।
आयोग्य लडाकुहरुलाई २ लाख रुपैयाँको दरले दिँदा करिब १ अर्ब रुपैयाँ खर्च हुने भन्दै पौडेलले सो रकम राज्यले बेहोर्नसक्ने बताए। उनले वर्तमान राजनीतिक परिवर्तनका निम्ति लडाकुहरुको योगदान रहेको उल्लेख गर्दै उनीहरुको योगदानको सम्मान हुनुपर्ने बताए।
सचिव पौडेलले राज्यले अयोग्य लडाकुहरुलाई रकम दिदाँ देश कंगाल र बर्बाद हुन्छ भन्नु राजनीतिक परिवर्तनका निम्ति लडेका योद्धाहरुको अपमान हुने बताए।
न्यूज एजेन्सी नेपालसँगको कुराकानीमा पौडेलले भने– ‘बहिर्गमित लडाकुहरुले ल्याएको प्रणालीमा रसस्वादन गर्न कसैले छेकेन। अनि उनीहरुलाई राज्यले अलिअलि सम्झिँदाखेरी कर्मचारी, शिक्षक, प्रहरीको कुरा तेर्स्याउन आवश्यक छ र ? कर्मचारी, प्रहरी, शिक्षकले तलब पाउनुपर्छ। राज्यले दिन्न कहीँ भनेको छैन। दिन्न भनेको छ र ? दिन्छ नि राज्यले। घाटा लागेर, केही भएर पनि जसरी पनि व्ययभार सम्हाल्छ। त्यो प्रसंगमा एक अर्ब रुपैयाँ लाग्ला। एक अर्ब कुनै ठूलो रकम होइन। त्यो एक अर्ब रकम देश र जनताको पक्षमा हिजो हिँडेकाहरु, जसको टाउकोमा अहिलेपनि गोली छ। जसको छातीका दुईवटा करङ भाँचिएका छन्। त्यस प्रकारका व्यक्तित्वहरुलाई राज्यले सम्झिँदाखेरी देश चाहीँ कंगाल बन्छ, भयानक ठूलो धनराशी खर्च भएर बर्बाद भयो भन्नेगरी कोकोहोलो गर्न खोजिँदैछ त्यो भनेको अपमान हो। ती योद्धाहरुले छिटोभन्दा छिटो राज्यले हिजो नै गरेको निर्णय, जो शान्ति प्रक्रियासँग सम्बन्धित छ। सत्य निरुपण मेलमिलाप आयोग र बेपत्ता छानबिन आयोग सम्बन्धि ऐनको कुरा पनि छ र त्योसित पनि यो विषय जोडिएको छ। शान्ति प्रक्रियालाई पूर्णता दिने विषयसँग यो जोडिएको छ। उनीहरुले त्यो रकम छिट्टै प्राप्त गर्नुपर्छ। के हाम्रो समाजमा विवेक हराएको हो र? उहाँहरुले जिवनलाई निकै कष्टसाध्य अवस्थामा देश र जनताको परिवर्तनको निम्ति समर्पित भएर आफूलाई होम्नुभएको थियो। ती युवालाई आज विरोध गर्ने युवाले आफ्नो साथी सम्झेर ती युवाले गरेको दुःख, कष्टप्रति अहिले प्राप्त भएको परिवर्तनको उपयोग गर्ने प्रसंगमा राज्यले सम्झिदाखेरी किन विरोध गर्नुभएको होला? त्यसकारण विवेक छैन समाजमा? पैसासित तुलना गर्ने कुरा अझ उहाँहरुप्रतिको अपमान हो। राज्यले देश र जनताको पक्षमा, परिवर्तनको पक्षमा उभिएका व्यक्तिहरुलाई सम्झिँदा अपमान गर्ने झन् ?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914053.png)
-1764146706.png)
-1775812183.jpg)
-1779545841.jpg)
