काठमाडौं- नेपाली कांग्रेसका दुई सांसद्ले बाँदर विदेश निर्यात गर्ने प्रस्ताव अघि सारेका छन्। कांग्रेस उपसभापति समेत रहेका धनराज गुरुङले मंगलबार संसदमा उक्त प्रस्ताव राखेको हुन् भने यसअघि कांग्रेसकै रामहरि खतिवडाले यस्तै बताएका थिए।
मंगलबार गुरुङले भने, ‘श्रीलंकाले हालसालै एक लाख बाँदर निर्यात गर्ने निर्णय गरेको छ। हाम्रा गाउँमा पनि अहिले बाँदर आतंक मच्चिएको छ। बाँदर आतंक फैलिएको छ। हामीले भन्दैछौं- खेतबारी बाँझो राख्नु हुँदैन। कृषिमा आधुनिकीकरण गरौं। कृषिमा वैज्ञानिकीकरण गरौं। हामी एकातिर भन्दैछौं। अर्कोतर्फ किसानले लगाएको बाली टिप्ने बेलामा बाँदरको हुल आएर लुटेर लैजान्छ। हामीले पनि बाँदर निर्यात गरिदिए कसो होला।'
एकातिर किसानलाई राहत हुने अर्कातिर आर्थिक संकट मोचनका लागि सहयोग हुने भन्दै उनले निर्यातको आइडिया ल्याएको उल्लेख गरे। इकोसिष्टमको कुरा उठाएर 'डलरवादी'ले आफ्नो कुरामा आलोचना गर्ने डर पनि उनले उल्लेख गरे। उनले थपे, 'अहिले हाम्रो आर्थिक अवस्थालाई हेरेर पनि बाँदर निर्यात गर्ने निर्णय गर्दा ठिकै हुन्छ जस्तो लाग्छ।'
यसअघि वैशाख ३ गते सांसद रामहरि खतिवडाले बाँदरको व्यावसायिक व्यापार गर्न र निर्यात गर्न सकिने बारेमा सोच्ने बेला आएको समेत बताएका थिए। 'समाचार पढेको थिएँ, सुनेको थिएँ। श्रीलंकाले बाँदरलाई चीनतिर निकासी गरेछ र बेचेछ। हाम्रो पनि आर्थिक संकट परिराखेको छ। केही बाँदरहरू चीनतिर लाने व्यवस्था गरियोस् भनेर सभामुखको ध्यानाकर्षण गर्दछु,' उनको भनाइ थियो।
किन्ने को, आइडियाको आधार के हो?
सांसदहरुले बाँदर निर्यात गर्ने उपाय सुझाए। उनीहरुको यो उपायको आधार के हो? उनीहरुले संसदमा बोल्ने क्रममा समाचार सुनेको र पढेको बताएका छन्।
त्यो समाचार हो, श्रीलंकाले चीनमा बाँदर बेच्ने। द इकोनोमिक टाइम्सले सन् २०२३ अप्रिल २० मा चीनले श्रीलंकाबाट एक लाख बाँदर लिन चाहेको समाचार प्रकाशित गरेको छ। श्रीलंका सरकारले चीनको एक निजी कम्पनीले टोक मकाक प्रजातिको बाँदर खरिद गर्ने प्रस्ताव पाएको उल्लेख गरेको छ।
श्रीलंकाको रैथाने उक्त प्रजातिको बाँदरलाई आइयुसिएनले लोपोन्मुख प्रजातिमा राखेको छ। चीनले ती बाँदरलाई चिडियाखानामा राख्नका लागि उक्त प्रस्ताव राखेको श्रीलंका सरकारका प्रवक्ता बन्दुला गुनवर्दनेले जनाएका छन्।
सांसदहरुले श्रीलंकाबाट चीनमा बाँदर निर्यात हुने उक्त समाचारको हेडलाइन पढे पनि अन्तर्यमा ध्यान नदिएको उनीहरुको कुराबाट प्रष्ट हुन्छ। किनभने, टोक मकाक प्रजातिको उक्त बाँदर श्रीलंकामा मात्रै पाइने द इकोनोमिक टाइम्सले जनाएको छ।
श्रीलंकाले बेच्ने तयारी गरेपछि संरक्षणकर्मी र पशु अधिकारकर्मीहरूले चिनियाँ चिडियाखानामा एक लाख बाँदरलाई राख्ने व्यवस्थित चिडियाखाना रहेको कुरामा आफूहरु विश्वस्त नभएको बताएका छन्।
प्रयोगशालामा परीक्षणका लागि बाँदरहरू प्रयोग हुने सम्भावना बढिरहेको भन्दै विरोध गरिरहेका छन्।
नेपालमा बढी पाइनेमा रेसस म्याकक (म्याकक मुतुला), एस्सामेसेस (म्याकक एस्सामेनसिस) र हनुमान लंगुर रहेका छन्। जुन बाँदरको मागका विषयमा कतै कुनै जानकारी देखिँदैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
