काठमाडौं- तीन वटा क्षेत्रमा भएको उपनिर्वाचनमध्ये तनहुँ- १ को एकतिहाइ मत गणना सकिएको छ। जम्मा खसेको ६३ हजार ७५७ मत मध्ये २२ हजार मत गन्दा रास्वपाका डा स्वर्णीम वाग्लेले प्रतिस्पर्धीभन्दा दोब्बर मतले अग्रता लिइरहेका छन्।
मंसिर- ४ को निर्वाचनमा जस्तै तीन वटै क्षेत्रमा सत्ता गठबन्धनले तालमेल गरेको थियो। नेपाली कांग्रेसकाे गढ मानिएको तनहुँ- १ मा यसपल्ट उक्त पार्टीका उम्मेदवार गोविन्द भट्टराईले अनपेक्षित मतान्तरले हार बेहोर्नुपर्ने रुझानले देखाइरहेको छ।
तनहुँ- १ मा देखिएको मत परिणाम त्यही क्षेत्रका लागि मात्र नभई नेपाली राजनीतिकै लागि पाठ हुन सक्ने विश्लेषकहरुले बताउन थालेका छन्। उक्त पाठलाई शिक्षाका रुपमा लिएर सुध्रिने बाटो तय नगरे जनता आफैंले सकाइदिने संकेतका रुपमा यसलाई बुझ्नुपर्ने विश्लेषकहरु बताउंछन्।
आम मतदाताले स्थानीय र आम निर्वाचनमा पनि संकेत गरेको राजनीतिक विश्लेषक गेजा शर्मा वाग्ले बताउँछन्। उपनिर्वाचनको प्रारम्भिक चुनावी परिणामपछि उनले ट्विटरमा टिप्पणी गरेका छन्, 'स्थानीय निर्वाचनमा जनता (सहरी, युवा, व्यावसायिक, विदेशमा रहेका) ले कांग्रेस, एमालेलाई सङ्केत गरेका थिए तर शिक्षा लिएनन्। आमनिर्वाचनमा जनताले स्पष्ट सन्देश दिएका थिए तर पनि सच्चिएनन्। यो उपनिर्वाचनमार्फत अन्तिम चेतावनी दिएका छन्।'
वाग्ले दलहरुसँग अब एउटै मात्र विकल्प रहेको बताउँछन्, त्यो हो- सच्चिने कि सक्किने?
अर्का राजनीतिक विश्लेषक मुमाराम खनाल भने 'पुराना दलहरू सुध्रिनुपर्ने' दबाबबाट समेत मुक्त भएको भन्दै व्यंग्य गर्छन्। सामाजिक सञ्जालमा चुनावी परिणामबारे टिप्पणी गर्दै उनी लेख्छन्, 'उपनिर्वाचनसम्म आउँदा मतदाताको बदलिँदो रुझानबाट परम्परावादी दलहरूलाई खुसीको सन्देश के हो भने 'पुराना दलहरू सुध्रिनुपर्ने' नागरिकको दबाबबाट उनीहरू मुक्त भएका छन्।'
अब दलहरु आफैं सुध्रिनु नपर्ने बताउँदै मतदाताले आफैं सुधारेर घर पठाउने उनी बताउँछन्।
नेपाली कांग्रेस नेता गोविन्दराज पोखरेलले पदका लागि अन्धभक्तहरुले निहत्था नेता र शुभेच्छुकको हत्या गर्नेसँग गरिने गठबन्धन जनताले अस्वीकार गरेको बताएका छन्। यसलाई 'राजनीतिक अवसरवाद' को संज्ञा दिंदै उनले भनेका छन्, 'बीपीले बिजारोपण गरेको लोकतन्त्र समायानुकल परिष्कृत गर्दै नयाँ 'चेत, चरित्र र चेहरा' निर्माण गर्न सफल होऔं, लोकतन्त्र दिवसको शुभकामना।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1778551198-1778552039.jpeg)
-1778914053.png)
-1764146706.png)
-1779545841.jpg)
