काठमाडौं- नेपाली कांग्रेसका सभापति एवं पूर्व प्रधानमन्त्री शेरबहादुर देउवाले लोकतन्त्रको रक्षाका लागि सबैलाई सजग र सचेत रहन आग्रह गरेका छन्। लोकतन्त्र दिवसको अवसरमा शुभकामना दिँदै उनले यस्तो आग्रह गरेका हुन्।
उनले भनेका छन्, 'लोकतन्त्रमा मात्र सबैको अधिकार सुनिश्चित भएकोले यसको रक्षार्थ सबै जना सजग र सचेत रहन म आग्रह गर्दछु। यो अवसरमा वीर योद्धाहरूको साहस, संकल्प र वलिदानको धरोहरको रूपमा स्थापित लोकतन्त्रलाई कमजोर हुन दिने छैनौं भनेर प्रण गरौं।'
उनले लोकतन्त्रको स्थापना र पुनर्स्थापनाका लागि विगतमा पटक-पटक गरिएका लोकतान्त्रिक आन्दोलनहरूमा आफ्नो प्राणको आहुती दिनेहरुको समर्पण, साहस र वलिदानको स्मरण गर्दै श्रद्धाञ्जली अर्पण गरेका छन्।
'वि.सं. २००७ साल अघिदेखि प्रारम्भ भएको संघर्षको पृष्ठभूमिमा निरंकुश राजतन्त्रको अन्त्य र पूर्ण लोकतन्त्र वहालीका लागि २०६२/०६३ मा नेपाली कांग्रेस लगायत अन्य राजनीतिक दलहरूद्वारा सञ्चालित ऐतिहासिक जनआन्दोलनले २०६३ वैशाख ११ गते मुलुकमा एक युगान्तकारी परिवर्तन ल्याएको थियो। यो दिनलाई हामी सबैले गौरवका साथ स्मरण गर्दै हरेक वर्ष लोकतन्त्र दिवसका रूपमा मनाउँदै आएका छौं,' देउवाले शुभकामना वक्तव्यमा भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
