काठमाडौं– नेकपा माओवादी केन्द्रका अध्यक्ष एवम् प्रधानमन्त्री पुष्पकमल दाहाल प्रचण्डले आफूहरु फेरि नेकपातिरै फर्किनुपर्ने समय आएको बताएका छन्। नेपाल कम्युनिस्ट पार्टीको ७५ औं स्थापना दिवसको अवसरमा नेकपा एकीकृत समाजवादी पार्टीले आयोजना गरेको कार्यक्रममा बोल्दै उनले पहिलेकका अनुभवबाट शिक्षा लिएर फेरि त्यहीँ फर्किनुपर्ने विषयमा छलफल भइरहेको बताए।
उनले भने, ‘कमरेड माधव नेपाललगायतसँग छलफल भइरहेको छ। फेरि नेकपातिर नै फर्किनुपर्दछ। वामपन्थी आन्दोलनलाई नयाँ आधारमा नयाँ एकतासहित अघि बढाउनुपर्दछ। सही विचार र नीतिका आधारमा कम्युनिस्ट एकता गर्ने जारी राख्नुपर्दछ।’
आफूहरु सामूहिक नेतृत्वको पक्षमा भएकाले एकताको कुरा गरिरहेको बताए। सामूहिक नेतृत्वको विरुद्धमा रहेका एकताको विरुद्ध रहेको प्रचण्डको भनाइ छ।
प्रचण्डले कार्यक्रमबाट साना कम्युनिस्ट शक्तिलाई एकता र मोर्चाको अभियानका लागि प्रस्ताव गरेका छन्। उनले भने, ‘यो ऐतिहासिक दिनबाट मोर्चा र एकताको अभियान सुरु गरौं। एमालेभित्र पनि डिबेट खडा गर्नेछ।’ उनले कम्युनिस्ट पार्टीहरु अलग-अलग हुसँदा परिणाम दिन नसकिएको स्वीकार्दै एकताबद्ध हुने समय आएको बताए।
यसअघि नेकपा एमालेसँग गरिएको एकतालाई कम्युनिस्ट नेता-कार्यकर्ताले मात्रै नभइ जनताले समेत अनुमोदन गरेको बताए। ‘त्यो घोषणालाई उत्साहका साथ स्वागत गरेनन्। अत्याधिक संख्याले एकताको पहलकदमीलाई स्वागत गर्यो। अनुमोदन गर्यो। निर्वाचनमा झन्डै दुई तिहाइ मत प्राप्त भयो, यस्तो न भुतो न भविष्यति भनेजस्तो भयो।’
सामूहिक नेतृत्व लिने कि जनवादी केन्द्रीयताको सर्वमान्य अभ्यास गर्ने वा व्यक्तिवादमा चलाउने भन्नेमा विवाद भएको प्रचण्डले उल्लेख गरे। औद्योगिक पुँजीवाद अघि बढाउँदै लैजाने कि दलाल पुँजीवादलाई बढवा दिने भन्ने विषयमा संघर्ष हुँदा पार्टी फुटेको प्रचण्डको दाबी छ।
उक्त कदम ठूलो अग्रगामी कदम रहेको उनको भनाइ छ। फेरि त्यही एकता पुनर्जीवित गर्नुपर्ने अवस्था आएको उनले बताए। ‘हामी त्यो एकता पुनर्जीवित गर्न चाहन्छौं। किनभने विचार, राजनीति, मूल्य र मान्यता बाहिरबाट अराजकता सिजना कोशिस भइरहेको छ,’ उनले थपे, ‘हजारौंको बलिदान र दशकौंको आन्दोलनमाथि प्रहार हुन थालेको छ। वामपन्थी र देशभक्तले प्रतिकार गर्नुपर्नेछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
