काठमाडौं- कर्णाली प्रदेशका मुख्यमन्त्री राजकुमार शर्माले तेस्रो पटक विश्वासको मत लिने भएका छन्। त्यसका लागि उनले आइतबार बिहान ११ बजे कर्णाली प्रदेश सभा सचिवालयमा पत्र दर्ता गराएका छन्।
‘पत्र दर्ता भएको छ’, कर्णाली प्रदेश सभाका सचिव जीवराज बुढाथोकीले नेपाल लाइभसँग भने, ‘वैशाख १५ गते विश्वासको मत लिने तयारी छ।’
मुख्यमन्त्री शर्माले तेस्रो पटक विश्वासको मत लिन लागेका हुन्। यसअघि उनले २०७९ माघ ६ गते विश्वासको मत लिएका थिए। ४० सदस्यीय प्रदेश सभामा ३९ सांसद मतदानमा सहभागी हुँदा शर्माको पक्षमा २५ मत खसेको थियो।
राष्ट्रपति निर्वाचनको प्रयोजनार्थ गत फागुन १२ गते नयाँ गठबन्धन बनेपछि असन्तुष्ट बनेको राप्रपाले संघ र केही प्रदेश सरकारबाट बाहिरिँदै समर्थन समेत फिर्ता लिने निर्णय गरेको थियो।
सोही अनुसार फागुन १८ गते राप्रपाले समर्थन फिर्ता लिएपछि मुख्यमन्त्री शर्माले चैत १७ गते पुनः विश्वासको मत लिएका थिए। दोस्रो पटक शर्माको पक्षमा ३८ मत बसेको थियो। उनलाई राप्रपाबाहेक सबै दलले मत दिएका थिए।
पहिलो र दोस्रो पटक विश्वासको मत दिएको एमालेले चैत २६ मा सरकारबाट राजीनामा दियो र २७ गते समर्थन फिर्ता लियो। सोही कारण मुख्यमन्त्री शर्माले तेस्रो पटक विश्वासको मत लिन लागेका हुन्।
एमाले बाहिरिएपछि कांग्रेस सरकारमा भित्रिएको छ। त्यसैले पनि मुख्यमन्त्री शर्मालाई विश्वासको मत पाउन गाह्रो देखिँदैन। कर्णाली प्रदेश सभामा कांग्रेसको १४, माओवादी केन्द्रको १३, एमालेको १०, राप्रपाको १, एकीकृत समाजवादीको १ सिट छ। त्यस्तै, एक स्वतन्त्र सांसद छन्। स्वतन्त्र सांसद देवराज शाहीले यसअघि दुवै पटक मुख्यमन्त्री शर्मालाई विश्वासको मत दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1763559424.jpg)
-1764080971.png)
