उप–निर्वाचन: बारा–२ मा केही क्षेत्रमा विवादसँगै १५ प्रतिशत मतदान

राजनीति

नेपाल लाइभ आइतबार, वैशाख १०, २०८० १०:३९

बारा– बारा निर्वाचन क्षेत्र नम्बर २ मा भइरहेको उपनिर्वाचनमा बिहान १० बजेसम्म १५ प्रतिशत मत खसेको छ।

मुख्य निर्वाचन अधिकृतको कार्यालय बाराका अनुसार केही क्षेत्रमा विवाद पनि भइरहेको छ। सिके राउत नेतृत्वको जनमत पार्टीले उपेन्द्र यादव नेतृत्वको जसपाका नेता तथा कार्यकर्ताले बूथ कब्जाको प्रयास गरेको आरोप लगाएपछि विवाद भएको हो।

महागढीमाई, गढीमाई र देवतालमा सामान्य तनाव देखिएको तर हालसम्म निर्वाचन रोक्नुपर्ने अवस्था नभएको मुख्य निर्वाचन अधिकृतको कार्यालयले जनाएको छ।

जनमतले उक्त क्षेत्रमा आफ्ना नेता तथा कार्यकर्तालाई प्रवेशमा कडाई गरेको तर जसपाका नेता कार्यकर्ताले अर्कै व्यक्तिको नाममा पनि मतदान गर्ने कोसिस गरेको आरोप लगाएको छ।

उक्त क्षेत्रमा गठबन्धनका साझा उम्मेदवार जसपाका अध्यक्ष उपेन्द्र यादव, नेकपा एमालेबाट पुरुषोत्तम पौडेल, राष्ट्रिय स्वतन्त्र पार्टीबाट रमेश खरेल, जनमत पार्टीबाट शिवचन्द्र प्रसाद कुशवाह लगायत १० दलका नेताले उम्मेदवारी दिएका छन्।

निर्वाचन कार्यालय हालसम्म मतदान रोक्नुपर्ने गतिविधि कतै नभएकाले जारी रहेको बताएको छ। बिहान ८ बजेदेखि सुरु भएको मतदानमा सर्वसाधारण लाइन लागेर मतदान गरिरहेको कार्यालयले जनाएको छ।

जनमतले बूथ कब्जाको प्रयास गरेको आरोप लगाए पनि निर्वाचन कार्यालयले भने हालसम्म त्यस्तो गतिविधि भएको जानकारी नआएको बताएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

प्राणायामले तनाव र डिप्रेसन घटाउन कसरी काम गर्छ?

मालीमा जिहादी आक्रमणमा ३२ जनाको मृत्यु

थारू सीप र संस्कृतिको प्रवद्र्धन गरौं : सभापति देउवा