काठमाडौं- वैशाख १० गते हुने तनहुँ- १ को उपनिर्वाचनको मत गणनास्थलमा सीसीटीभी जडान गरिएको छ। मतगणनालाई निष्पक्ष र विश्वसनीय बनाउन मतगणनास्थलमा सिसिटिभी जडान गरिएको मुख्य निर्वाचन अधिकृत कार्यालयका सहायक निर्वाचन अधिकृत मीनबहादुर कुँवरले जानकारी दिए।
उनका अनुसार मुख्य निर्वाचन अधिकृतको कार्यालयले जिल्ला समन्वय समितिको भवनमा मतगणनास्थल निर्माण गरिएको छ। त्यहाँ दुई वटा कोठामा मतगणना गरिनेछ। मतगणनास्थल निर्माणका लागि आवश्यक तारजालीको व्यवस्था गरिसकिएको छ। ‘तारजालीसहित मतगणनास्थल तयार गर्दैछौं, दुवै कोठामा सीसीटीभी जडान भइसक्यो। शुक्रबार बेलुकासम्म तारजाली बारेर गणनास्थल तयार हुन्छ’, उनले भने।
निर्वाचन आयोगले दिएको निर्देशनबमोजिम सुरक्षित रुपमा मतगणनास्थलका लागि गणनास्थल तयार पारिने उनले बताए। ‘सबैलाई चित्तबुझ्दो गर्ने गरी भरपर्दो, सुरक्षित बनाउन आयोगले दिएको निर्देशनबमोजिम मतगणनास्थल बनाउँछौं,’ उनले भने।
आइतबार मतदान सकिएपछि सुरक्षित रुपमा सबै मतदान केन्द्रबाट मतपेटिका दमौली ल्याइनेछ। मतपेटिका ल्याइसकेपछि राजनीतिक दलसँगको सर्वदलीय बैठकपश्चात् मतगणनाको काम सुरु गरिनेछ।
तनहुँ- १ अन्तर्गतका एक सय ५२ वटै मतदान केन्द्रमा निर्वाचन सामग्रीसहित कर्मचारी र सुरक्षाकर्मी पुगिसकेका छन्। प्रति मतदान केन्द्रमा ६१ प्रकारका सामग्री पठाइएको छ। मतदान केन्द्रमा पुगेपछि सम्बन्धित ठाउँका राजनीतिक दलसँग बैठक, मतदाता परिचयपत्र वितरण, मतदान केन्द्र निर्माणलगायतका काम हुनेछन्। उपनिर्वाचनका लागि सात सय ६० कर्मचारी परिचालन गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
