अन्नपूर्ण हिमालमा बाटोमा गायब भएका एक भारतीय पर्वतारोही अनुराग मालु तीन दिनपछि फेला परे। हिउँमा पुरिएका उनको अवस्था गम्भीर रहेको उनका भाइ सुधीर मालुले जानकारी दिए।
३४ वर्षीय अनुराग भारतको राजस्थानको किसनगढ निवासी हुन्। उनी सोमबार अन्नपूर्ण हिमालबाट तल झर्दै गर्दा बेपत्ता भएका थिए। क्याम्प ३ स्थित गहिरो खाडलमा उनी खसेका थिए।
उनी खसेको क्षेत्र समुद्री सतहबाट ६ हजार मिटरमा पर्छ। अन्नपूर्ण विश्वको १० उच्च हिमालमा पर्छ। अनुरागको तीन दिनपछि जीवितै उद्धार गरिँदाको खुसी भाइले बाँडेका छन्।
‘उहाँ जीवित फेला पर्नुभएको छ। अब हाम्रो ध्यान छिटो निको बनाउनेमा केन्द्रित छ,’ मालुले भने।
सुधीरका अनुसार उद्धार टिमले उनलाई एउटा गहिरो खाडीमा खोजी गरेको थियो। सेभेन समिट ट्रेक्सले पनि पुष्टि गरेको छ, ‘अनुरागको सात नेपाली पर्वतारोहीले तीन सय मिटर गहिरो हिम खाडलबाट निकालेर बचाएका हुन्।’
सुधीरको पोखरास्थित मणिपाल अस्पतालमा उपचार भइरहेको छ। उनको अवस्था गम्भीर रहेको अस्पतालले जनाएको छ।
नेपाली शेर्पाहरूले बचाए
सेभेन समिट ट्रेक्सका म्यानेजर थानेश्वर गुरागाईंका अनुसार चिकित्सकहरू लगातार उनलाई निगरानीमा राखेर उपचार गरिरहेका छन्।
सेभेन समिट ट्रेक्सका प्रमुख मिङमा शेर्पाले आङदावा शेर्पा नेतृत्वको सात सदस्य नेपाली पर्वतारोही टिमले उनलाई खोजी गर्दै जीवितै उद्धार गरेको बताए। बिहीबार बिहान क्याम्प भन्दा तीन सय मिटरमुनि हिम खाडलमा मानिसको आकार देखेपछि शेर्पाहरूले उद्धार गरेका थिए।
पोल्याडका चर्चित पर्वतारोही एडम बिलेकी र उनका एक साथीले पनि बचाउ अभियानमा भाग लिएका थिए।
सबैभन्दा खतरनाक क्षेत्रमा फसेका थिए
उद्धार टिमले तीव्र गतिमा बिग्रँदो मौसमका बीच उनको उद्धार गरेका थिए। यो स्थान यो हिमालको सबैभन्दा खतरनाक क्षेत्रमा पर्छ। यहाँ धेरै समय हिउँ परिरहन्छ।
अधिकाश समय हिउँ भइराख्ने र हिमपहिरोको खतराका साथै खाडलमा पर्ने जोखिम भएकाले यस क्षेत्रलाई शेर्पाहरूले जोखिमको रुपमा राख्ने गरेका छन्।
खराब मौसमका कारण अनुरागलाई उपचार गर्न काठमाडौंको सट्टा पोखरा लगिएको थियो।
राजस्थानको किसनगढका विधायक सुरेश टाकले मालू परिवारसँग आफू सम्र्पकमा रहेको बताए। विधायक अनुराग मालुका बा ओमप्रकाश र परिवारका अन्य सदस्यलाई भेट्न पुगेका थिए।
अनुरागका बा ओमप्रकाशले बीबीसीका सहकर्मी मोहर सिंह मीणासँग कुरा गर्दै तीन दिनदेखि हराइरहेका अनुरागको जीवितै उद्धार गरिएको जानकारी पाएको र यसले धेरै खुसी भएको बताए।
बाका अनुसार २४ मार्चमा अनुराग दिल्ली पुगेका थिए। त्यहीँबाट उनी हिमाल चढ्न काठमाडौँ आएका थिए।
परिवार उनको स्वास्थ्यलाई लिएर अझै पनि चिन्तित छ। अनुराग मालु ८ हजार मिटरभन्दा अग्ला १४ हिमाल र सात महाद्वीपका सबैभन्दा अग्ला पहाड चढ्ने मिसनमा थिए।
अर्का भारतीयको पर्वतारोहीको पनि उद्धार
मंगलबार अन्नपूर्ण शिखरबाट झर्दै गर्दा चौथो क्याम्प नजिकै रहेका दुई भारतीय आरोही बेपत्ता भएका थिए। उनीहरू सोमबारदेखि सम्पर्कबिहीन भएका थिए।
बेपत्ता भएका पर्वतारोही थिए बलजित कौर। उनलाई पनि शेर्पाको टोलीले उद्धार गरेको हो। बलजित भारतको हिमाञ्चल प्रदेशका बासिन्दा हुन्।
उद्धार लगत्तै हिमाञ्चल प्रदेशका मुख्यमन्त्री सुखबिन्दर सिंह र उप–मुख्यमन्त्री मुकेश अग्नहोत्रीले उनी सुरक्षित रहेको जानकारी सामाजिक सञ्जाल ट्वीटरमार्फत दिए।
मुख्यमन्त्रीले उनलाई स्वास्थ्य लाभको कामना पनि गरे।
यो सामग्री हिन्दी बीबीसीबाट नेपालीमा अनुवाद गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779770158.png)
-1764146706.png)
-1779545841.jpg)
