राजनीति

गठबन्धनका शीर्ष नेताहरु चुनावी अभियानमा केन्द्रित, तनहुँ र बारालाई विशेष जोड

नवीन झा बुधबार, वैशाख ६, २०८० २०:५५

बुधबार तनहुँ निर्वाचन क्षेत्र नम्बर १ मा गरिएको गठबन्धनको आमसभामा सहभागी गठबन्धन दलका शीर्ष नेताहरु। तस्बिर: रासस

काठमाडौं– बैशाख १० नजिकिँदै गर्दा उपनिर्वाचनको माहोल तात्दै गएको छ। अझ विशेषगरी सत्तारुढ गठबन्धनको तदारुकता बढी देख्न सकिन्छ। तनहुँ–१ र चितवन–२ मा राष्ट्रिय स्वतन्त्र पार्टीको लोकप्रियताका कारण गठबन्धनलाई उक्त क्षेत्रमा जित निकाल्न सकस देखिन्छ।

सोही कारण पनि गठबन्धनका तर्फबाट उठाइएका साझा उम्मेदवारको पक्षमा माहोल बनाउन सत्ता गठबन्धन दलहरु दत्तचित्त भएर लागिपरेका छन्। चुनावी अभियानकै लागि आज (बुधबार) पाँच दलका शीर्ष नेताहरु तनहुँ पुगेका छन्।

तनहुँ–१ मा सत्ता गठबन्धनका साझा उम्मेदवारका रुपमा नेपाली कांग्रेसका गोविन्द भट्टराई चुनावी मैदानमा होमिएका छन्। भट्टराईको पक्षमा गठबन्धन दलको सबै मत पार्नका लागि प्रधानमन्त्री पुष्पकमल दाहाल प्रचण्डसहित, कांग्रेस र एकीकृत समाजवादीका नेताहरु चुनावी क्षेत्रमा पुगेका हुन्।

बुधबार तनहुँ पुगेका माओवादी अध्यक्ष तथा प्रधानमन्त्री प्रचण्डसहित कांग्रेस सभापति शेरबहादुर देउवा र एकीकृत समाजवादीका अध्यक्ष माधव नेपाल बिहीबार बारा–२ मा पनि जाँदैछन्। त्यहाँ पनि गठबन्धनबाट जनता समाजवादी पार्टीका अध्यक्ष उपेन्द्र यादव उम्मेदवार छन्। उनको चुनावी सभालाई सम्बोधन गर्न र आ–आफ्ना दलका कार्यकर्ताको मत अन्यत्र जान नदिनका लागि शीर्ष नेता त्यहाँ जाने भएका हुन्।

सत्ता गठबन्धनका तर्फबाट उपचुनाव हुने तीन क्षेत्रमध्ये तनहुँ–१ मा कांग्रेसका गोविन्द भट्टराई र चितवन–२ मा पनि कांग्रेसकै जितनारायण श्रेष्ठ छन् भने बारा–२ मा उपेन्द्र यादव। तनहुँ र चितवनमा रास्वपाको त्रास गठबन्धनलाई छ भने बारामा जनमत पार्टीका उम्मेदवारको। बारा–२ मा जनमतका उम्मेदवार यसअघि भएको निर्वाचनमा दोस्रो नम्बरमा थिए। त्यसैमाथि उपेन्द्रलाई हराउन जनमतका अध्यक्ष सिके राउत आफैं खटिएका छन्।

यद्यपि चुनावी मैदानमा प्रतिस्पर्धा गरिरहेका रास्वपा र जनमतले हाल सरकारलाई दिएको समर्थन भने कायमै राखेका छन्। मन्त्रालयको भागबण्डा नमिल्दा संघीय सरकारबाट बाहिरिए पनि प्रदेश सरकारमा भने जनमत सहभागी नै छ। तर पनि सरकारलाई समर्थन भएका दलका उम्मेदवारबाटै उपनिर्वाचनमा सबैभन्दा बढी ‘थ्रेट’ देखिएको छ। चितवन–२ का उम्मेदवार रास्वपाका सभापति रवि लामिछाने यसअघिको निर्वाचनमा भारी मतान्तरका साथ विजयी भएका थिए। अहिले पनि उनको माहोल उस्तै छ।

यता तनहुँ–१ मा पनि कांग्रेस त्याग्दै रास्वपाबाट उम्मेदवार बनेका स्वर्णीय वाग्लेको पक्षमा पनि माहोल बन्दै गएको छ। यस्तोमा तनहुँका लोकप्रिय नेता गोविन्दराज जोशीको समर्थनले गठबन्धनका उम्मेदवारलाई झनै चुनौती थपेको छ। त्यसै कारण पनि आफ्ना उम्मेदवारको पक्षमा माहोल बनाइदिन प्रधानमन्त्रीसहित शीर्ष नेताहरु नै चुनावी अभियानमा खटिउका हुन्।

अघिल्लो चुनावमा एक अर्कालाई पूर्ण रुपमा सहयोग नभएको र अन्तर्घात भएको समीक्षा गरेका दलहरुले यसपटक पनि सोही हुन्छ कि भनेर मत एकत्रित गर्न लागिपरेका छन्। केही दिनअघि नै आ–आफ्ना पार्टी पंक्तिलाई पत्र लेख्दै शीर्ष नेताहरुले गठबन्धनका उम्मेदवारलाई मत दिन निर्देशन दिइसकेका छन्।

उसो त गठबन्धनका दलहरुले यसअघि नै चुनावी क्षेत्रमा दोस्रो तहका नेताहरु खटाइसकेका छन्। उनीहरुको सुझावपछि नै शीर्ष नेताहरु चुनावी सभाका लागि दौडिएका हुन्। यस्तै पाँचै दलले आफ्ना पार्टीका युवादेखि विद्यार्थी संगठनहरु र जिल्लास्तरका नेताहरुलाई एकीकृत रुपमा परिचालन गरेका छन्।

पाँच दलभित्रैबाट मत काटिने सम्भावना देखिएपछि बारा र तनहुँमा शीर्ष नेताहरु नै बढी लागिपरेका हुन्। चितवनमा भने जितनारायणले जित्नेमा शीर्ष नेताहरु आफैं विश्वस्त छैनन्। यसअघि भारी मतान्तरसहित लामिछानेले जितेको र यसपटक पनि माहोल उनकै पक्षमा देखिएकाले त्यहाँ त्यति दु:ख नगर्ने मनस्थितिमा शीर्ष नेताहरु देखिएका छन्।

तै पनि महामन्त्रीद्वय गगन थापा, विश्वप्रकाश शर्मासहित उपसभापति धनराज गुरुङ र नेता प्रकाशमान सिंह केही दिनदेखि खटिरहेका छन्। महान्त्रीद्वय त मनोनयन दर्ता हुँदादेखि नै खटिरहेका छन्। तनहुँमा भने यसअघि निर्वाचित रामचन्द्र पौडेल राष्ट्रपति बनेका छन्। अघिल्लो निर्वाचनमा जितेकाले पनि यसपटक बढी जोड त्यहाँ दिइएको छ।