काठमाडौं– निर्वाचन आयोगले मंसिर ४ मा भएको प्रतिनिधि सभा तथा प्रदेश सभा निर्वाचनमा समयमै खर्च विवरण नबुझाएका ७४ जना उम्मेदवारलाई स्पष्टीकरण सोधेको छ।
निर्वाचन ऐन, २०७४ को दफा ७२ को उपदफा ४ बमोजिम निर्वाचन खर्चको विवरण राजनीतिक दल, उम्मेदवार वा तिनका प्रतिनिधिले निर्वाचन परिणाम घोषणा भएको मितिले ३५ दिनभित्र आयोग वा आयोगले तोकेको कार्यालयसमक्ष पेस गर्नुपर्ने कानुनी व्यवस्था भएकोमा समयावधिभित्र खर्च विवरण नबुझाएकालाई सोमबार स्पष्टीकरण सोधेको हो।
आयोगले मंगलबार एक विज्ञप्ति जारी गर्दै यसबारे जानकारी दिएको छ।
‘समयावधिभित्र निर्वाचन खर्चको विवरण नबुझाउने प्रतिनिधि सभातर्फ ३७ जना र प्रदेश सभातर्फ ३७ जना उम्मेदवारहरूसहित जम्मा ७४ जना उम्मेदवारको नामावली आयोगको वेबसाइटमा प्रकाशन गरी त्यस्ता उम्मेदवारहरूलाई तोकिएको समयावधिभित्र के कुन कारणले निर्वाचन खर्चको विवरण नबुझाएको हो? तोकिएको समयावधिभित्र निर्वाचन खर्चको विवरण नबुझाएकोमा तपाईंहरूलाई निर्वाचन आयोग ऐन, २०७३ को दफा २६ बमोजिम किन कारबाही हुनु नपर्ने हो? भनी सोही ऐनको सोही दफाको उपदफा ४ बमोजिम आफ्नो सफाइसहितको स्पष्टीकरण ७ (सात) दिनभित्र सम्बन्धित जिल्लाको जिल्ला निर्वाचन कार्यालय वा निर्वाचन आयोगमा पेस गर्न आदेश दिएको छ,’ आयोगले जारी गरेको विज्ञप्तिमा भनिएको छ।
यस्तै, निर्वाचनको अन्तिम परिणाम प्रकाशित भएको मितिले ३५ दिनभित्र निर्वाचन खर्चको विवरण पेस गर्ने प्रतनिधि सभाका २ हजार ३७३ जना उम्मेदवार र प्रदेश सभाका ३ हजार १८८ जना उम्मेदवारहरूलाई निर्वाचन कसुर तथा सजाय ऐन, २०७३ को दफा ३१ को उपदफा ४ बमोजिम निर्वाचन खर्चको विवरण ७ दिनभित्र सार्वजनिक गरी आफू उम्मेदवार भएको जिल्लाको प्रदेश/जिल्ला निर्वाचन कार्यालयमा पेस गर्नका लागि सम्बन्धित उम्मेदवारहरूलाई पनि आयोगले निर्देशन दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
