काठमाडौं– प्रधानमन्त्री पुष्पकमल दाहाल ‘प्रचण्ड’को भारत भ्रमणको तयारी अन्तिम चरणमा पुगेको छ। गएको १० पुषमा प्रधानमन्त्रीमा नियुक्त भएका माओवादी अध्यक्ष प्रचण्ड आफ्नो पहिलो विदेश भ्रमण यही महिनाको अन्त्यतिर गर्न लागेका हुन्।
आफ्नो भारत भ्रमणकै तयारीकै लागि केही महिनायता खाली रहेको परराष्ट्रमन्त्रालयमा प्रधानमन्त्रीले एनपी साउदलाई नियुक्त गरेका छन्। त्यसका साथै नेपालको परराष्ट्र मन्त्रालय र प्रधानमन्त्री कार्यालयसमेत यो भ्रमणको गृहकार्यमा जुटिरहेका छन्।
प्रधानमन्त्रीको भारत भ्रमणको मिति र अजेन्डाहरु बारेमा सोमबार मात्रै प्रधानमन्त्री र परराष्ट्रमन्त्री एनपी साउदबीच छलफल भएको थियो। आजको मन्त्रिपरिषद् बैठकमा पनि यही विषयमा छलफल गरिएको छ। यद्दपि मिति घोषणा भने गरिएको छैन। प्रधानमन्त्रीसँग सोमबार छलफल गर्नुअघि परराष्ट्रमन्त्री साउदले पछिल्लो समय मन्त्रालयले गरिरहेको गृहकार्यबारे सचिवसँग छलफल गरेका थिए।
आइतबार परराष्ट्रमन्त्रीको कार्यभार सम्हाल्दै साउदले आफू प्रधानमन्त्रीको भारत भ्रमणको तयारीमा जुट्ने बताएका थिए। सोमबार प्रधानमन्त्री र परराष्ट्रमन्त्रीबीचमा पनि मिति र त्यहाँ छलफल हुने अजेण्डाबारे पत्राचार गर्ने विषयमा छलफल भएको थियो।
प्रधानमन्त्रीको भारत भ्रमणको क्रममा छलफल गरिने अजेन्डाहरु र सहमति गर्ने प्रस्तावहरुमाथिसमेत नेपाल र भारत दुवैतिरका अधिकारीहरुले पछिल्लो समय छलफल गरिरहेका छन्। रक्सौल–काठमाडौ रेलमार्ग निर्माणको साथै भैरहवा विमानस्थलबाट हुने अन्तर्राष्ट्रिय उडानहरुको लागि रुट परमिटदेखि उर्जा व्यापार सम्झौता र ई–वालेट लगायतका विषयमा नेपाल र भारतबीच गृहकार्य चलिरहेको छ।
भारतीय पक्षले रक्सौल–काठमाडौं रेलमार्गलाई प्राथमिकतामा राखेर गृहकार्य गरिरहेको छ भने नेपालले प्रधानमन्त्रीको भारत भ्रमणबाट भैरहवा विमानस्थललाई आवश्यक रहेकाले भारतका तर्फबाट रुट परमिट पाउने अजेण्डालाई प्राथमिकतामा राखेको छ।
त्यही छलफलका लागि भारतका सत्तारुढ दल भाजपाका विदेश विभाग प्रमुख डा विजय चौथाईवालेसमेत काठमाडौं आएका छन्। गएको आइतबार सुदूरपश्चिमको धनगढीमा आयोजित एउटा धार्मिक कार्यक्रममा सहभागी हुन आइपुगेका चौथावालेले मंगलबार काठमाडौं आएर राजनीतिक छलफल सुरु गरेका छन्। उनले मंगलबार गृहमन्त्रीसहित कांग्रेस सभापति र एकीकृत समाजवादीका अध्यक्षसँग भेटे गरेका छन्। चौथावालेले बुधबार प्रधानमन्त्री, परराष्ट्रमन्त्रीसँग पनि छलफल गर्नेछन्।
प्रधानमन्त्रीको भारत भ्रमणको तयारी चलिरहँदा चौथावालेले काठमाडौंमा अर्थपूर्ण भेटघाट गरिरहेका छन्। भारतीय प्रधानमन्त्री नरेन्द्र मोदीको निकट रहेर काम गरिरहेका चौथावाले यसअघि पनि पूर्वप्रधानमन्त्री शेरबहादुर देउवाको भारत भ्रमणअघि काठमाडौं आएर छलफल गरेका थिए।
कांग्रेस सभापति देउवाकी पत्नी तथा कांग्रेस नेतृ आरजु राणासँग राखी नै बाँधेर चर्चामा आएका चौथावालेले नेपाली कांग्रेसको सम्बन्ध भाजपासँग विस्तार गर्ने प्रयास गरिरहेका छन्। नेपाली कांग्रेसका प्रवक्ता तथा सरकारका अर्थमन्त्री डा प्रकाशशरण महतको नेतृत्वमा कांग्रेसका नेताहरुको टोलीले भाजपाको निमन्त्रणामा दिल्ली गएर भाजपा नेताहरुसँग छलफलहरु तथा अन्तरक्रियाहरु गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
