काठमाडौं– सोमबार शान्तिपूर्ण आन्दोलन गर्न मिटरब्याज पीडितको टोली शान्तिवाटिकाबाट बाहिर निस्कियो। तर, प्रहरी प्रशासनले आन्दोलनरत पीडितलाई रोक्न प्रयास गर्यो। उनीहरू रोकिन मानेनन्।
त्यहीबेला मिटरब्याज पीडित र प्रहरीबिच झडप भयो। झडपमा मिटरब्याज पीडितहरू घाइते समेत भए। कतिको हात नै भाँचियो त कतिलाई चोटपटक समेत लाग्यो।
त्यत्रो चोटपटक लाग्दा समेत पीडितले समयमा उपचार पाउन नसकेको पीडितहरूले गुनासो गरे। त्यसैका विरुद्धमा मंगलबार शान्तिवाटिकाभित्रै शान्तिपूर्ण प्रदर्शन गरे।
उक्त प्रदर्शनमा बोल्दै एक मिटरब्याज पीडितले सोमबार भएको घटना मिटरब्याज पीडितसँग प्रहरीले अमानवीय व्यवहार गरेको बताइन्। प्रहरीसँगको झडपमा परेपछि वरपरका प्रत्यक्षदर्शीलाई हस्पिटल लैजानुस् भन्दा सहयोग नगरेको साथै प्रहरीले समेत सहयोग नगरेको उनले बताइन्।
‘इमरजेन्सी सेवा त मौलिक हकमै पर्छ। तर, हामीले त्यो प्राप्त गर्न सकेनौं। हिजो लागेको चोटमा आज मल्हमपट्टी लगाएर उपचार गरायौं। राज्यले निर्मम तरिकाले हामीलाई अन्याय गर्यो,’ उनले भनिन्।
यसअघि भेटमा आन्दोलनकारी हुँ भन्ने गृहमन्त्रीले आन्दोलन गरिरहेका पीडितमाथि कुटपिट गर्न प्रहरी प्रशासनलाई आदेश दिएको उनले बताइन्।
‘हिजो शान्ति र्याली निकाल्न प्रयास गरेका थियौं। तर, बाहिर निस्किँदा प्रशासनले आक्रमण गर्यो। यो सरकारको पहिलादेखिको प्लानिङ हो कि के हो? प्रशासनकै प्लानिङ हो,’ नवलपरासीका उमाशंकर लोनियाले भने, ‘मलाई घाँटीमा लट्ठीले हानेर चार पाँच जनाले पिटे। अहिलेसम्म मानसिक रुपमा असर परेको छ।’
मिटरब्याज तथा ठगीविरुद्ध किसान–मजदुर संघर्ष समितिका अध्यक्ष अवधेश कुशवाहले सोमबार भएको घटनाको सम्पूर्ण जिम्मेवारी गृह मन्त्रालयले लिनुर्ने बताए।
‘यो मिटरब्याज पीडितको तेस्रो चरणको आन्दोलनमा सरकारले वार्ताटोली बनाएर निरन्तर छलफल भयो। गृहमन्त्रीज्यूले भेट्नु भयो। यो गर्छु त्यो गर्छु भनेर आश्वासन मात्र देखाउनु भयो। वार्ता गर्यौं। तर, सरकारले पीडितको पक्षमा निष्कर्ष निकाल्न सकेन,’ उनले भने।
माथिबाट आदेश आएको र बाहिर जान मिल्दैन भन्दै प्रहरी प्रशासनले बाहिर चिया खान गएका मिटरब्याज पीडितको पछि लागेर पटकपटक अभद्र व्यवहार गरेको उनी बताउँछन्।
‘शान्तिपूर्ण आन्दोलनका लागि हामी निस्किने क्रममा साथीहरूलाई कुटपिट गरेर भ्यानमा हालेर लग्यो। प्रसाशनभित्र पसेर सरसामान समेत लुटेको छ। महिला दिदीबहिनीको सारी तानीतानी पिटेको छ। जति हिजो घटना भयो त्यो अपराधीले गरेको घोषणा गर्नु पर्छ। उक्त घटना अमानवीय छ,’ उनले भने।
प्रहरी प्रहशासनले ‘माथिको आदेश’ भनेको तर, मंगलबार गृहमन्त्री भेट्न आएर ‘यो घटना कसरी भयो मलाई थाहा छैन’ भनेको कुशवाहले बताए।
‘प्रहरी प्रशासनले माथिको आदेश भन्ने र गृहमन्त्रीलाई थाहा नहुने यो कस्तो कुरा हो? उहाँलाई थाहा नभए कसलाई हुन्छ?,’ उनको प्रश्न छ।
साथै, आफ्नो माग पूरा नभएसम्म आन्दोलन जारी रहने पनि कुशवाहले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
