राजनीति

उप–निर्वाचनमा केन्द्रित सत्तारुढ दल: संयुक्त रुपमा नेता परिचालनदेखि संयुक्त आमसभा

नवीन झा सोमबार, वैशाख ४, २०८० २१:१२

काठमाडौं– बैशाख १० गते हुन गइरहेको प्रतिनिधि सभाका तीन निर्वाचन क्षेत्रको उप–निर्वाचनमा सत्तारुढ दलहरु केन्द्रित भएका छन्। सत्तारुढ पाँच दलले हेरक निर्वाचनमा संयुक्त रुपमा आफ्ना नेताहरुको टोली खटाएका छन्। तथा पाँचै दलका शीर्ष नेताको सहभागितामा सम्बन्धित निर्वाचन क्षेत्रमा संयुक्त आमसभाहरु पनि गर्न लागेका छन्।

तनहुँ–१, चितवन–२ र बारा–२ मा हुने उपनिर्वाचनमा कांग्रेस, माओवादी, एकीकृत समाजवादी, जसपा र लोसपाले संयुक्त रुपमा उम्मेदजारी दर्ता गराएका छन्। हुन त एक ठाउँमा जसपा र दुई ठाउँमा कांग्रेसका उम्मेदवार छन्। तर गठबन्धन भएकाले यी पाँचै दलले तीन जना उम्मेदवारलाई साझा बनाएका छन्।

केही समयअघि यी पाँचै दलका शीर्ष नेताहरुले संयुक्त रुपमा वक्तव्य जारी गर्दै पार्टीका सम्पूर्ण नेता कार्यकर्तालाई गठबन्धनका उम्मेदवारलाई मतदान गरी जिताउन निर्देशन दिएका थिए। तनहुँ र चितवन दुवै ठाउँमा कांग्रेसका उम्मेदवारलाई राष्ट्रिय स्वतन्त्र पार्टी र एमालेले कडा टक्कर दिनेछन् भने बारामा जसपाका लागि जनमत पार्टी अवरोध बन्ने स्थिति छ। यस्तोमा कांग्रेस र जसपा दुवैले सकभर गठबन्धनको बढीभन्दा बढी मत आफ्ना उम्मेदवारको पक्षमा कसरी आउँछ भन्नेम रणनीति बनाइरहेका छन्।

त्यही रणनीति कार्यान्वयनका लागि गत शनिबार प्रधानमन्त्री निवास बालुवाटारमा बसेको पाँच दलका शीर्ष नेताहरुको बैठकले तीनवटै निर्वाचन क्षेत्रमा सबै पार्टीका केन्द्रीय प्रतिनिधीहरु खटाउने निर्णय गरेको थियो। जस अनुसार कांग्रेसबाट महामन्त्रीद्धय गगन थापा र विश्वप्रकाश शर्मा, माओवादीवाट महासचिव देव गुरुड, एकीकृत समाजवादीबाट किसान श्रेष्ठ तनहुँ र चितवनका लागि परिचालन गर्ने निर्णय भएको छ।

साथै बारामा कांग्रेसका बालकृष्ण खाणदेखि अजय चौरसिया परिचालित छन् भने माओवादीवाट गणेश साह, एकीकृत समाजवादीबाट किसान श्रेष्ठ र लोसपाबाट जितेन्द्र सोनल परिचालित छन्।

यसरी तीनवटै क्षेत्रमा गठबन्धनलाई सक्दो बढी प्रभावकारी बनाएर तीनवटै निर्वाचन क्षेत्रमा गठबन्धनका उम्मेदवारलाई जिताउने प्रयास भइरहेको छ। चुनावी अभियानलाई थप प्रभावकारी बनाउन ५ गते तनहुँ, ६ गते चितवन र ७ गते बारामा संयुक्त आमसभासमेत आयोजना गर्ने सत्तारुढ दलहरुको तयारी छ।

आमसभाहरुलाई प्रधानमन्त्री पुष्पकमल दहाल ‘प्रचण्ड’, कांग्रेस सभापति शेरबहादुर देउवा, एकीकृत समाजवादीका अध्यक्ष माधव नेपाल र लोसपा अध्यक्ष महन्थ ठाकुरले सम्बोधन गर्ने कार्यक्रम छ। उपनिर्वाचन हुन लागेको तनहुँ–१ मा यसअघि कांग्रेसबाट रामचन्द्र पौडेल, चितवन–२ मा रास्वपाका सभापति रवि लामिछाने र बारा–२ मा जसपा नेता रामसहाय यादव निर्वाचित भएका थिए।

पौडेल राष्ट्रपतिमा र यादव उपराष्ट्रपतिमा निर्वाचित भएपछि तनहुँ–१ र बारा–२ मा उपनिर्वाचन हुन लागेको हो। यस्तै चितवन–२ बाट निर्वाचित लामिछाने नागरिकता प्रकरणका कारण सांसद पद खारेजीमा परेपछि त्यहाँ पनि निर्वाचन हुन लागेको हो। लामिछानेले पुन: सोही क्षेत्रबाट निर्वाचन जित्नेगरी तयारी तीव्र पारेका छन्।

अहिले तनहुँ १ मा गठबन्धनका तर्फबाट गोविन्द भट्ट्रराई, रास्वपाबाट स्वर्णीम वाग्ले र एमालेबाट सर्वेन्द्र खनाल उम्मेदवार छन्। चितवन–२ मा रवि लामिछानेका साथै कांग्रेसबाट जितनारायण श्रेष्ठ र एमालेबाट रामप्रसाद न्यौपाने छन्। बारा–२ मा भने जसपाबाट उपेन्द्र यादव आफैं उम्मेदवार रहेका छन्। जहाँ उनलाई कडा टक्कर दिन जनमत पार्टीबाट शिवचन्द्र कुशवाह छन्। एमालेबाट भने पुरुषोत्तम पौडेल रहेका छन् भने रास्वपाबाट रमेश खरेल छन्।

तनहुँ र चितवनमा भने गठबन्धनका उम्मेदवारलाई राष्ट्रिय स्वतन्त्र पार्टीका उम्मेदवार र बारामा जनमतका उम्मेदवारले कडा टक्कर दिने देखिन्छ। अहिले कांग्रेस र जसपालाई गठबन्धनमा आबद्ध दलहरुकै मतको भरथेक हुनेछ। तर गठबन्धनमा अन्तर्घात भएमा भने कांग्रेसले दुवै ठाउँ र बारामा उपेन्द्रले जित्न मुस्किल पर्नेछ। त्यसैले पनि गठबन्धनको मत चुहावट हुन नदिनका लागि केन्द्रीय स्तरका नेताहरु नै चुनावमा केन्द्रित हुँदै निर्वाचनस्थलसम्म आफ्नो मत सुरक्षित बनाउनका लागि पुग्न लागेका हुन्।