रंगुन– म्यान्मारमा सेनाले मानिसहरुको भिडमा बम खसाल्दा एक सयभन्दा बढी सर्वसाधारणको मृत्यु भएको अन्तर्राष्ट्रिय सञ्चार माध्यमले जनाएका छन्। राजधानी नेपिडादेखि २६० किलोमिटर टाढा पाजीगीको सागेङ प्रान्तमा सेनाले मंगलबार जेटबाट बम खसालेका थिए।
स्थानीयवासीका अनुसार २० मिनेट बमबारी हुँदा त्यो ठाउँमा ३०० भन्दा बढी मानिस उपस्थित थिए। पाजीगी सहरमा पिपुल्स डिफेन्स फोर्सेस (पीडीएफ)ले आफ्नो कार्यालय स्थापना गरिरहेको थियो। पीडीएफले सैनिक शासकविरूद्ध देशभित्र अभियान चलाइरहेका छन्।
संयुक्त राष्ट्र संघले सेनाको कारबाहीको निन्दा गरेको छ। संघको मानवअधिकार समितिका उच्च पदाधिकारी वोल्कर तुर्कले भनेका छन्, ‘हवाई हमलाको रिपोर्टले हैरान बनाएको छ। जतिबेला हेलिकोप्टरबाट बम फ्याँकियो, त्यतिबेला स्कुले छात्रछात्राहरू डान्स गरिरहेका थिए।’
1681293894.png)
म्यान्मारमा दुई वर्षअघि सेनाले शासन व्यवस्था आफ्नो हातमा लिएको थियो। त्यसयता सेनाको यो सबैभन्दा ठूलो कारबाही भएको बताइएको छ। हमलाको बेला सोही स्थानमा रहेका एक व्यक्तिले बीबीसीसँग भनेका छन्, ‘गाउँमा ७ बजे सेनाको जेट प्रवेश गरेको थियो। उसले पहिलो बम खसाल्यो। त्यसपछि केही हेलिकोप्टरबाट फायरिङ सुरु भयो। गोलाबारी २० मिनेटसम्म जारी रह्यो।’
स्थानीय केहीले घटनाको भिडियो सोसल मिडियामा सेयर गरेका छन्। जसमा चारैतर्फ नागरिकको लास देखिएको छ। इङ्लिस पत्रिका ‘द गार्जियन’ का अनुसार म्यान्मारमा हवाई हमला यतिबेला दैनिक भइरहेको छ। सेनाले आफ्नो विरोधीलाई हमला गर्न कुनै कसर बाँकी राखेको छैन। मानिसहरूलाई निशाना बनाइएको छ।
म्यान्मार विटनेसको रिपोर्ट अनुसार ६ महिनायता यहाँ यस्तो घटना १३५ पल्ट दोहरिसकेको छ। १ फेब्रुअरीमा म्यान्मारमा सैन्य ‘कू’ भएको दुई वर्ष पुरा भएको थियो। सन् २०२१ मा सेनाले आङ सान सु किको सरकार अपदस्त गरेको थियो। सु कि हाल सैन्य हिरासतमा छिन्।
1681293894.png)
म्यान्मारको न्यूज वेभसाइट इर्रावाडीका अनुसार विगत २ वर्षमा यहाँ ३१ हजार २२ जनाको हत्या भएको छ। २०२२ मा भएको ‘एयर रेड’मा मात्र ४६० जनाले ज्यान गुमाएका थिए। संयुक्त राष्ट्र संघको रिपोर्टअनुसार ‘एयर रेड’ का कारण ११ लाख जनता घरबाट विस्थापित भइसकेका छन्। ‘द इर्रावाडी’ का अनुसार पछिल्लो एक वर्षभित्र म्यान्मारको सेनाले १०० व्यक्तिलाई मृत्युको सजाय सुनाइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
