उपनिर्वाचनका लागि मतदाता शिक्षा स्वयंसेवक तालिम

राजनीति

रासस मंगलबार, चैत २८, २०७९ १२:१९

काठमाडौं– आगामी वैशाख १० गते आइतबार हुने प्रतिनिधि सभा सदस्य उपनिर्वाचनका लागि निर्वाचन आयोगले तीनवटै निर्वाचन क्षेत्रमा मतदाता शिक्षा स्वयंसेवक तालिम सञ्चालन गरेको छ।

बारा निर्वाचन क्षेत्र नं २, तनहुँ निर्वाचन क्षेत्र नं १ र चितवन निर्वाचन क्षेत्र नं २ मा हुने उपनिर्वाचनका लागि सम्बन्धित क्षेत्रभित्र पर्ने स्थानीय तहमा प्रतिवडा दुईजना मतदाता शिक्षा स्वयंसेवक तयार गर्नेगरी यही चैत २७ र २८ गते तालिम सञ्चालन भएको हो।

तालिमको उद्‌घाटन तनहुँ–१ मा निर्वाचन आयुक्त डा जानकीकुमारी तुलाधर, चितवन–२ मा आयोगका सचिव गोकर्णमणि दुवाडी र बारा–२ मा उपसचिव सूर्यप्रसाद अर्यालले गरे।

निर्वाचन हुने एक साता अघिदेखि सात दिनसम्म ती मतदाता शिक्षा स्वयंसेवकले मतदातालाई सहीरूपमा मत संकेत गर्ने तरिकाबारे जानकारी दिनेछन्। उनीहरूलाई सम्बन्धित पालिकाले दैनिक एक हजार रूपैयाँ भत्ता दिनेछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।