काठमाडौं- आगामी वैशाख ७ गतेभित्र एसएसपीबाट डीआईजी बढुवा नभएको अवस्थामा विकासराज खनाल अनिवार्य अवकाशमा जान्छन्। हाल लागुऔषध नियन्त्रण ब्यूरोको कमाण्ड गरेका खनालले ब्यूरोको साख जोगिने गरी कामहरु गरिरहेका छन्।
यसअघि पनि बढुवामा पछि परेका खनाल आगामी वैशाख ७ गतेभित्र बढुवा नभएको अवस्थामा ५५ वर्षे उमेर हदका कारण एसएसपीबाटै घर जानुपर्ने हुन्छ। जसका कारण उनी जतिसक्दो चाँडो बढुवा होस् भन्ने पक्षमा छन्।
उनी जस्तै चक्रबहादुर सिंह र राजेन्द्रसिंह खड्का पनि जतिसक्दो चाँडो बढुवा होस् भन्ने पक्षमा छन्। किनकी, उनीहरु पनि वैशाख दोस्रो सातासम्म बढुवा नभए उमेर हदका कारण अनिवार्य अवकाशमा जान्छन्।
खनाल, सिंह, खड्का जतिसक्दो चाँडो बढुवा होस् भन्ने पक्षमा छन् उनीहरुभन्दा पछिका प्रतिस्पर्धीहरु भने जतिसक्दो ढिलो एसएससपीबाट डीआईजी बढुवा होस् भन्ने पक्षमा छन्। ताकि उनीहरु प्रतिस्पर्धाबाटै आउट भएको अवस्थामा डीआईजीमा बढुवा हुने आफ्नो भाग्य खुलोस्।
कोही तत्काल बढुवा होस् भन्ने पक्षमा त कोही तत्काल बढुवा नहोस् भन्ने पक्षमा रहँदा र को डीआईजी बढुवामा छिर्ने भन्ने अस्वस्थ प्रतिस्पर्धाका कारण डीआईजी बढुवा हुन सकेको छैन।
४ डीआईजी एआईजीमा बढुवा भएसँगै अहिले प्रहरीमा १३ डीआईजीको दरबन्दी खाली छ। तर रिक्त पदमा अहिलेसम्म बढुवा हुन सकेको छैन। गत शुक्रबार नै बढुवा सिफारिस गर्ने बताइए पनि कुरो नमिल्दा बढुवाको प्रक्रिया अघि बढ्न नसकेको स्रोतको भनाइ छ।
१३ डीआईजीको लागि एसएसपीहरु जनक भट्टराई, विष्णुकुमार केसी, भरतबहादुर बोहरा, कुबेर कडायत, केदार ढकाल, रवीन्द्र केसी, राजेशनाथ बाँस्तोला, लालमणि आचार्य, यज्ञविनोद पोखरेल, चन्द्रकुमार खापुङ, अर्जुनचन्द ठकुरी र कृष्णहरि शर्मा पोखरेल, विकासराज खनाल, चक्रबहादुर सिंह, दिल्लीराज पन्त, मधुसुदन लुइँटेल, मोहनप्रसाद पोख्रेल प्रतिस्पर्धामा छन्।
डीआईजीको बढुवापछि १६ एसएसपी रिक्त
१३ एसएसपी डीआईजीमा बढुवा भएको अवस्थामा १६ एसएसपीको पद रिक्त हुनेछ। अहिले ३ एसएसपीको पद रिक्त छ। अहिले एसएसपीमा बढुवा हुनेहरु पाँच वर्षपछि प्रहरीको नेतृत्वमा पुग्नेछन्। जसका कारण पनि एसपीबाट एसएसपी बढुवा पनि त्यत्तिकै पेचिलो हुने देखिएको छ।
१६ एसएसपीका लागि विश्व अधिकारी, सानुराम भट्टराई, ओमप्रसाद अधिकारी, विश्वमणि पोख्रेल, शेखर खनाल, अभिनारायण काफ्ले, सोमेन्द्र सिंह राठौर, मुकुन्द मरासिनी, दिनेशराज मैनाली, कृष्णबहादुर पल्लीमगर, भुपेन्द्रबहादुर खत्री, गंगा पन्त, गोपालचन्द्र भट्टराई, रविकुमार पौडेल, बेलबहादुर पाण्डे, दीपशमशेर जबरा, नवीनराज राई, तारादेवी थापा, आभुषण तिम्सिना, प्रवीण पोखरेल, प्रज्वल महर्जन, बसन्त रजौरे, वीरबहादुर ओली, चन्द्रदेव राईलगायत प्रतिस्पर्धामा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
