कञ्चनपुर– बालिका निर्मला पन्तको बलात्कार र हत्या अभियोगमा पक्राउ परेका दिलिपसिंह बिष्ट जेलभित्रै रहँदा पनि झगडालु थिए।
जेलभित्रै कैदीहरुलाई सताउने गर्दथे। जेलबाट छुटेपछि पनि पैसा माग्न दैनिक जसो जिल्ला कारागार जान्थे।
उनै बिष्टलाई सरकारले असल चाल चलनको भएको भन्दै गत वर्षको गणतन्त्र दिवसको अवसरमा ११ वर्ष कैद माफी दिएर छाडिदिएको थियो। अनुसन्धानमा आबद्ध प्रहरी अधिकारीहरु भन्छन्,‘यस्तो व्यक्तिलाई कैद मिनाहा नगरेको भए सायद यो घटना हुने थिएन कि !’
उनी आफ्नै भिनाजू नारायणसिंह थापाको हत्या अभियोगमा जेल बसेका थिए। अदालतले उनलाई २० वर्ष कैद सजाय सुनाएको थियो। ९ वर्ष जेल बसेपछि सरकारले असल चालन भएको कैदी भएको भन्दै उनलाई बाँकी कैद मिनाहा गरेर छाडिदिएको थियो। २०७४ को जेठमा बाँकी कैद मिनाहा पाएर उनी छुटेको कञ्चनपुरका एसपी दिल्लीराज बिष्टले बताए।
जेलबाट निस्किएपछि पनि उनी सुधिएनन्। प्रहरीका अनुसार घरकै सदस्यलाई मारिदिने धम्की दिन्थे। एकान्तमा महिलालाई देख्ने बित्तिक गोप्य अंग देखाउने तथा यौन दुव्र्यवहार गर्थे। भिनाजूको हत्या गरेर छुटेका उनले अर्काे के घटना घटाउँछ भन्ने चिन्ता परिवारमै थियो।
नभन्दै गत साउन १० गते त्यस्तै भयो। १३ बर्षिया पन्तलाई एक्लै देखेपछि उनले बलात्कारपछि हत्या गरेको प्रहरीले जनाएको छ।
नेपालको कानूनमा वनसम्बन्धि कसुरमा कैद मिनाहा नहुने तर हत्याको मुद्दामा भने माफी दिन सकिने अचम्मको प्रावधान छ। विगतमा ४० प्रतिशत कैद भुक्तान गरेपछि बाँकी कैद मिनाहा गर्न मिल्ने प्रावधान थियो।
नयाँ मुलुक ऐनमा ७५ प्रतिशत राखिएको छ। तर, त्यसलाई ५० प्रतिशतमा झार्न मुलुकी ऐन संशोधनको प्रक्रिया अघि बढीसकेको छ।
असल चालचलन रहेको भनेर छाडिएका धेरै कैदीहरु फेरि अपराधमा लाग्ने गरेको प्रहरी अधिकारीहरु बताउँछन्।
कैद मिनाहाको प्रवृत्तीले पक्राउ परेपनि केही वर्षमै छुट्ने भएकाले अपराधीहरुको हौसला बढ्ने गरेको छ।
बिष्टले हत्या नगरेको आफन्तको दाबी
निर्मला पन्तका आफन्तहरुले भने प्रहरी अनुसन्धानमा असन्तुष्टि जनाएका छन्। बास्तविक अपराधी पक्राउ नगरी प्रहरीले मानसिक रोगी रहेका बिष्टलाई हत्याराका रुपमा पेश गरेको दाबी गरेका छन्।
जसकारण महेन्द्रनगरमा मंगलबार बिहानैदेखि तनाव छ। स्थानीयले प्रहरीविरुद्ध नाराबाजी समेत गरेका छन्।
पक्राउ परेका बिष्टले भने आफैंले हत्या गरेको साबिती बयान दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
