काठमाडौं- नेपाली कांग्रेसका तर्फबाट एक उपप्रधानमन्त्रीसहित तीन मन्त्रीले पद तथा गोपिनियताको शपथ लिएका छन्। उपसभापति पूर्णबहादुर खडका उपप्रधानसहित रक्षामन्त्री, डा प्रकाशशरण महत अर्थमन्त्री, रमेश रिजाल उद्योग मन्त्री र सीता गुरुङ सहरी विकासमन्त्री बनेकी छिन्।
मन्त्री बनेका चारै नेता कांग्रेस सभापति शेरबहादुर देउवाका ‘एस्यम्यान’ मानिन्छन्। यसअघि पनि पटक-पटक मन्त्री भइसकेका उपप्रधानसहित रक्षामन्त्री खड्काले यसपल्ट मन्त्रीको लाइनमा नरहेको बताएका थिए। अहिले कांग्रेसका तर्फबाट नेतृत्व नै उनले गरेका छन्। देउवा समूहका सबैभन्दा प्रभावशाली र विश्वासिला पात्र हुन् खड्का।
पुस १० मा कांग्रेस र माओवादीबीचको सहकार्य टुटेपछि समीकरण फर्काउन खड्काले महत्वपूर्ण भूमिका निर्वाह गरेका थिए। कांग्रेसका तत्कालीन नेता खुमबहादुर खड्काको समूहबाट कांग्रेसको केन्द्रीय राजनीतिमा उदाएका उनी सहमहामन्त्री, महामन्त्री हुँदै अहिले उपसभापति छन्।
०७४ मा खुमबहादुरको निधनपछि देउवाले उनलाई २१ वैशाख, ०७५ मा महामन्त्री मनोनित गरेका थिए। १४ औं महाधिवेशनबाट उपसभापतिमा निर्वाचित भएपछि खड्का कांग्रेसमा झन् शक्तिशाली भएर आएका छन्।
खड्काले विगतमा गृह, सूचना तथा सञ्चार, युवा, खेलकुद तथा संस्कृति, वातावरण र उद्योग वाणिज्यमन्त्री भएर काम गरेका छन्। यसपटक रक्षा मन्त्रालयको जिम्मेवारी लिएर छठौंपटक मन्त्रीसहित उपप्रधानमन्त्रीसमेत बनेका हुन्।
यसैगरी अर्थमन्त्रालयको जिम्मेवारी डा प्रकाशशरण महतले पाएका छन्। देउवानिकट हुँदा उनले पटक-पटक अवसर पाइरहेका छन्। गएको निर्वाचनमा पराजय भोग्नु परेपछि यसपल्ट प्रत्यक्ष निर्वाचनको सामना नगरेका उनलाई समानुपातिक कोटाबाट सांसद बनाइयो।
त्यसअघि उनलाई देउवाले विश्वप्रकाश शर्मालाई घेराबाहिर पारेर महामन्त्रीको आधिकारिक टिकट दिएका थिए। जहाँ डा महत पराजित भए। उसो त महत आन्तरिक राजनीतिमा १३ औं महाधिवेशनमा केन्द्रीय सदस्यबाहेक कहिल्यै निर्वाचित भएका छैनन्। सहमहामन्त्री उनी मनोनित भएका हुन्।
संसद्मा पनि उनी समानुपातिकबाटै आइरहेका छन्। २०६४ सालको पहिलो संविधानसभा निर्वाचनमा महत समानुपातिक तर्फको उम्मेदवार बनेका हुन्। दोस्रो संविधान सभाको निर्वाचनमा पनि समानुपातिकबाट सांसद् भए। तर, देउवा दाहिना भएपछि दुवैपटक उनले मन्त्री बन्ने अवसर पाए। २०७४ सालमा काठमाडौं क्षेत्र नम्बर ५ मा पहिलोपटक प्रतिस्पर्धा गरे तर एमालेका ईश्वर पोखरेलसँग फराकिलो अन्तरले पराजित भए।
यसैगरी पर्साबाट चौथौपटक सांसद् बनेका उद्योगमन्त्री रमेश रिजाल मधेस प्रदेशमै देउवाको सबैभन्दा विश्वासिलो पात्र हुन्। देउवा समूहबाटै सीता गुरुङ मन्त्री बनेकी छिन्। तेह्रथुमबाट निर्वाचित सीता गुरुङ प्रत्यक्ष निर्वाचित हुने एक मात्र महिला हुन्। उनी यसअघि २०७४ भौतिक राज्य मन्त्री बनेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
