संक्रमणकालीन न्यायलाई चाँडै टुंगोमा पुर्‍याउन विज्ञहरुको सुझाव

राजनीति

नेपाल लाइभ मंगलबार, चैत १४, २०७९ १८:०२

काठमाडौं– विज्ञहरुले शान्ति प्रक्रियाका बाँकी कामहरुलाई छिटो टुंगो लगाउनुपर्नेमा जोड दिएका छन्। मंगलबार नेपाली कांग्रेस संसदीय दलले पार्टीका सांसदहरुसँग आयोजना गरेको अन्तरक्रिया कार्यक्रममा बोल्दै विज्ञहरुले सशस्त्र द्वन्द्व पीडितले न्याय तथा परिपूरण पाउने र समाजमा मेलमिलाप हुनेगरी शान्ति प्रक्रियाको बाँकी कामलाई टुंगोमा पुर्‍याउन सरकार र संसद्लाई सुझाव दिएका हुन्।

संक्रमणकालीन न्यायसम्बन्धी विधेयकका बारेमा गरिएको अन्तरक्रियामा विज्ञहरुले यसलाई चाँडोभन्दा चाँडो निष्कर्षमा पुर्‍याउन सुझाव दिएको नेपाली कांग्रेसका प्रमुख सचेतक रमेश लेखकले बताए।

सरकारले संक्रमणकालीन न्यायसम्बन्धी ‘बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०७९’ प्रतिनिधिसभा पेस गरेको छ। सोही विधेयकको बारेमा विज्ञहरुले सांसदहरुलाई ब्रिफिङ गरेको र सांसदहरुले पनि सो सम्बन्धी जिज्ञासा राखेको उनले बताए।

‘हामीले प्रतिनिधि सभामा प्रस्तुत भएको संक्रमणकालीन न्यायसम्बन्धी विधेयक बेपत्ता पारिएका व्यक्तिहरुको छानबिन, सत्य निरुपण तथा मेलमिलाप आयोगसम्बन्धी विधेयकमा छलफल गर्‍यौं,’ लेखकले भने, ‘५ जना यो क्षेत्रका जानकार विज्ञ, अत्यन्तै प्रबुद्ध व्यक्तिहरुले अहिलेको विधेयकका बारेमा धारणा राख्नु भयो। त्यसमा माननीयजीहरुले पनि आफ्ना धारणा, जिज्ञासाहरु राख्नुभयो।’

अहिले जुन संक्रमणकालीन न्यायको विषय छ। त्यसलाई चाँडोभन्दा चाँडो टुंगोमा पुर्‍याउनुपर्छ भन्ने जानकारी सांसदहरुले पाएको उनले बताए। ‘अब पीडितहरुले पनि न्याय प्राप्त गर्ने, परिपुरण प्राप्त गर्ने र समाजमा मेलमिलाप पनि हुने स्थिति निर्माण गरेर अगाडि बढ्नुपर्छ भन्ने निष्कर्षमा हामी पुगेका छौं,’ उनले भने, ‘छलफल त्यतैतिर केन्द्रित भएको छ। यो विधेयकलाई चाँडोभन्दा चाँडो कानुन बनाएर सशस्त्र द्वन्द्वका बेलाका जति पनि घटनाहरु भएका थिए, तिनलाई उचित ढंगले तार्किक निष्कर्षमा पुर्‍याउनुपर्छ भन्ने छलफलको विषय रह्यो। यो विधेयकको अर्थ के हो? यो कानुन किन चाहिएको हो? यसको सबै पक्षमा विज्ञहरुले कुरा राख्नु भएको छ। माननीयजीहरुसँग बहुत राम्रो अन्तरक्रिया भएको छ।’

अन्तरक्रियामा ५ जना विज्ञहरुले सो संक्रमणकालीन न्यायसम्बन्धी विधेयकको आवश्यक्ता र औचित्यका बारेमा आ–आफ्नो धारणा राखेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

शान्तिपूर्ण आन्दोलन भड्काउने काम नहोस् : कमल थापा

सगरमाथा संवादमा १७५ विदेशी विशिष्ट पाहुना सहभागी हुने

डेडिकेटेड र ट्रंक लाइनको विद्युत महसुल बुझाउने म्याद थपको सूचना पुनः जारी