मर्यादाक्रम विवाद: सर्वोच्चले बोलायो फुलकोर्ट

राजनीति

नेपाल लाइभ मंगलबार, चैत १४, २०७९ १४:२३

काठमाडौं- प्रधानन्यायाधीश र न्यायाधीशहरुको मर्यादाक्रम हेरफेर गर्ने गरी राष्ट्रिय सभामा टेबल भएको विधेयकबारे सार्वजनिक रुपमा विवाद भइरहँदा सर्वोच्च अदालतले त्यसबारे छलफल गर्न फुलकोर्ट बैठक बोलाएको छ। कामु प्रधानन्यायाधीश हरिकृष्ण कार्कीले दिउँसो ४ बजेका लागि फुलकोर्ट बैठक बोलाएका हुन्। सर्वोच्च अदालतका प्रवक्ता विमल पोखरेलका अनुसार ४ बजे फुलकोर्ट बैठक बस्नेछ।

चैत ५ गते राष्ट्रिय सभाका सत्तापक्षका सांसदहरुले नेतृत्व गर्दै राष्ट्रिय मर्यादा सम्बन्धी विधेयक, २०७९ गैर सरकारी विधेयक दर्ता गराएका थिए। उक्त विधेयक राष्ट्रिय सभामा टेबल समेत भएको छ। राष्ट्रिय सभामा विधेयक टेबल भएसँगै यसको आलोचना पनि सुरु भएको छ।

राष्ट्रिय सभाका सांसदहरु गोपीबहादुर सार्की, तुलप्रसाद विश्वकर्मा, देवेन्द्र दाहाल, प्रकाश पन्थ, प्रमिला कुमारी, बेदुराम भुसाल, रमेशजङ रायमाझी र शेखरकुमार सिंहसहितका सांसदहरुले विधेयक दर्ता गराएका हुन्। उनीहरुले दर्ता गरेको विधेयक आइतबार संघीय ससदको माथिल्लो सदन राष्ट्रिय सभामा पेस गरिएको थियो।

राष्ट्रिय सभामा टेबल भएको उक्त विधेयकमा अर्को बैठकले विचार गरियोस् भन्ने प्रस्ताव पेस गर्नेछ। त्यसपछि विधेयकमाथि संशोधन सुरु हुनेछ। राष्ट्रिय सभाबाट उत्पति भएकाले उक्त विधेयक प्रतिनिधि सभामा पनि आउनेछ। दुवै सदनबाट पारित भएर राष्ट्रपतिले प्रमाणीकरण गरेपछि लागू हुनेछ।

नयाँ विधेयकले विगतमा भएको आलोचनालाई सच्याउनुको साटो अझै तल्लो मर्यादाक्रममा प्रधानन्यायाधीशलाई राखिएको छ। प्रधानन्यायाधीशलाई सभामुख र राष्ट्रिय सभा अध्यक्षभन्दा तल्लो बरियतामा राखिएको छ। नयाँ विधेयकले कानुनको रुप लिएमा प्रधानन्यायाधीश पाँचौ स्थानको मर्यादाक्रममा हुनेछन्। तर उक्त कार्य नेपालको संविधान २०७२ समेत विपरीत हुने र राज्यका तीन अंगमध्ये कार्यपालिकापछि रहेको न्यायपालिकाको प्रमुखलाई व्यवस्थापिका प्रमुखभन्दा तल्लो बरियतामा राख्ने प्रस्तावमा सर्वोच्चले असन्तुष्टि जनाएको छ।

विधेयकको व्यवस्थाबारे सार्वजनिक सञ्चार माध्यममा चर्चा भएसँगै सर्वोच्चका न्यायाधीशहरुले सोमबार प्रधानन्यायाधीशलाई ध्यानाकर्षण गराएका थिए। उनीहरुले फुलकोर्ट बैठक राखेर आफ्नो धारणा सार्वजनिक गर्नुपर्ने कुरा प्रधानन्यायाधीशलाई राखेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

मे १७ बाट पुनः सुरु हुँदै आईपीएल

संघीय संसद्का दुवै सदनको बैठक बस्दै, विनियोजन विधेयकबारे छलफल हुने

सवारी पास हुनेक्रममा पुल भासियोः नारायणगढ–बुटवल सडकखण्ड अवरुद्ध