काठमाडौं– सोमबार आफ्ना पीडा सुनाउन खुलामञ्चतर्फ गएका मिटरब्याज पीडितहरुलाई काठमाडौं महानगरपालिकाको नगरप्रहरी र प्रहरीले रोक लगाए।
मधेस प्रदेशका विभिन्न जिल्लाबाट १० दिनको पैदल यात्रा गरी काठमाडौंमा आफ्ना पीडा सुनाउन आएका मिटरब्याज पीडितहरु विरोध कार्यक्रम खुलामञ्चमा राख्नका लागि आइतबार नै महानगरपालिका र जिल्ला प्रशासनमा गएका थिए। तर उनीहरुले अनुमति पाएनन्।
तै पनि उनीहरु आफ्नो कार्यक्रम आयोजना गर्न सोमबार खुलामञ्चतर्फ गएका थिए। तर प्रहरीले भित्र प्रवेश नै गर्न निदएपछि पीडितहरुले काठमाडौं महानगरपालिकाका मेयर बालेन्द्र शाह(बालेन)विरुद्ध नाराबाजी गरे।
भित्र प्रवेशमा रोक लगाएपछि पीडितहरुले वीर अस्पताल अगाडिको सडकलाई नै आफ्नो मञ्च बनाए। र मिटरब्याजबाट पाएको पीडा सुनाए।
मिटरब्याज पीडित संघर्ष समितिका संयोजक मनोज पासवानले घरखेत लुटिएर न्याय माग्न आउँदा पनि खुल्लामञ्चमा बस्न विरोधका लागि स्थान नदिएको भन्दै महानगरपालिकाका मेयरप्रति आक्रोश व्यक्त गरे।
उनले भने, ‘यत्रो घरखेत लुटिएर सरकारसँग न्याए माग्न १० औं दिन पैदल हिँडेर हामी यहाँसम्म आएका हौं। दुःख नपाई यतिकै रमाइलो गर्न त आएका होइनौं नि। महानगरले सहयोग गर्छ होला भन्ने ठूलो आशा थियो। तर पीडा सुनाउनका लागिसमेत ठाउँ दिएन।’
उनीहरुले दिनभर मिटरब्याजबाट पाएका पीडा सुनाए भने सरकारसँग उठिबास लाग्ने अवस्थाबाट बचाइदिन गुहार मागे। खुलामञ्च नपाएपछि एकछिन पीडित र प्रहरीबीच धरपकड पनि भएको थियो।
खुला मञ्चमा बसेर विरोध गर्ने पीडितहरुको योजनाबारे आफूहरुसँग सल्लाह नै नभएको महानगरपालिकाका प्रहरी प्रमुख राजुनाथ पाण्डेले बताए। उनले अनुमतिसमेत नमागिएको बताए।
केही दिनमा खुलामञ्च परिसरमा महानगरकै कार्यक्रम हुने भएकाले मिटरब्याज पीडितलाई प्रवेशमा रोक लगाइएको उनले बताए। साथै खुलामञ्च नजिकैको शान्ति बाटिका भने उपलब्ध गराइएको पाण्डेको भनाइ छ।
यता महानगर प्रमुख बालेन शाहले आफ्नो सामाजिक सञ्जालमार्फत् खुलामञ्चमा गएर आन्दोलन गर्न खोजेका पीडितहरुका लागि शान्तिबाटिकामा प्रवन्ध मिलाइएको बताएका छन्।
१० दिनको पैदल यात्रा गरी काठमाडौं आइपुगेका मिटरब्याज र लघुवित्त पीडितहरूलाई काठमाडौं बसुन्जेल पशुपति धर्मशालामा बास र खानाको व्यवस्थापन गर्न आफू तत्पर भएर सोमबार बिहानै उनीहरूसँग सम्पर्कसमेत गरेको शाहले बताएका छन्।
उनले भनेका छन्, ‘उहाँहरूसँग सम्पर्क गरेर हामीले पशुपति जान अग्रह गर्यौं। तर, उहाँहरू खुल्लामञ्चमै बस्न खोज्नुभयो। हामीले सम्झाएर रत्नपार्कको शान्तिबाटिकामा आन्दोलन गर्न प्रबन्ध गरेका छौं। उहाँहरूको मागप्रति ऐक्यवद्धता जनाउँदै नेपाल सरकारसमक्ष समस्या समाधानको लागि जोडदार माग राख्दछौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767836232.jpg){kind=logo}
-1778036869.gif)
-1764146706.png)
-1779545841.jpg)
