काठमाडौं– अख्तियार दुरुपयोग अनुसन्धान आयोगले नियुक्ति नै नभएको व्यक्तिलाई झुट्टा सुरुवापत्रको आधारमा शिक्षक कायम गरी भ्रष्टाचार गरेको भन्दै बैतडीका तत्कालीन जिल्ला शिक्षा अधिकारीविरुद्ध भ्रष्टाचार मुद्दा दायर गरेको छ।
उक्त विषयमा उजुरी परेपछि अनुसन्धान गर्दा तत्कालीन जिल्ला शिक्षा अधिकारी अमरप्रसाद भट्टले नियुक्तिपत्र नै नभएको गैरशिक्षक मनकाकुमारी अवस्थीलाई शिक्षक कायम गरिएको पाइएको छ। हुनैनाथ आधारभूत विद्यालय सल्सेनाको विद्यालय व्यवस्थापन समितिबाट नियुक्ति भएकै भन्दै कागजातबिनै नियुक्तिको अभिलेखीकरण गर्ने प्राविधिक सहायकलाई टिप्पणी उठाउन लगाएर आफैं स्वीकृत गराउँदै बलैराज निमावि सुनखोलामा सरुवा गरी तलब लगायतका सुविधा निकासा गरेको पाइएको छ।
उक्त प्रकरणमा पद तथा ओहदाको दुरुपयोग गरी सार्वजिनक सम्पत्तिको बदनियतपूर्वक ७४ हजार ९२० रुपैयाँ हानी नोक्सानी गरेकाले तत्कालीन जिल्ला शिक्षा अधिकारी भट्टविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको बताएको छ। अख्तियारले ७४ हजार ९२० रुपैयाँ बिगो कायम गरी कैद र बिगोबमोजिमको जरिवाना माग गरेको छ।
यस्तै प्राविधिक सहायक स्वर्गीय सञ्जय ठाकुर दनुवारले हुनैनाथ प्रावि सल्सेनामा शिक्षक पद रिक्त नै नभएको, शिक्षक नियुक्तिको लागि अनुमतिपत्र माग नै नगरेको र उक्त विद्यालयले शिक्षक पदमा कसैलाई पनि नियुक्ति निदिएको अवस्थामा बिना कागजात मनकाकुमारीको नियुक्तिको अभिलेखिकरण गर्न टिप्पणी उठाएकाले उनीविरुद्ध पनि ७४ हजार ९२० बिगो कायम गरिएको छ।
उनको मृत्यु भइसकेकाले फौजदारी न्यायको मान्य सिद्धान्तबमोजिम उनीविरुद्ध फौजदारी कसुरमा सजायको मागदाबी लिनुपर्ने अवस्था नभए पनि ‘मुलुकी फौजदारी कार्यविधि संहिता २०७४ को दफा १३३ को उपदफा (२) र दफा १५८ को उपदफा (२), अख्तियार दुरुपयोग अनुसन्धान आयोग ऐन, २०४८ को दफा २९ (क) र भ्रष्टाचार निवारण ऐन, २०५९ को दफा ४६ बमोजिम’ मरेको व्यक्तिको हकमा समेत मुद्दा चलाउन र सरकारी वा निजी बिगो, क्षतिपूर्ति वा रकम भराउन सकिने कानुनी व्यवस्था अनुसार प्रतिवादी स्वर्गीय सञ्जय ठाकुर दनुवारको अंशियार उनकी श्रीमती मञ्जुकुमारी सिंहबाट उक्त बिगो असुल गर्न माग गरिएको छ।
यस्तै मनकाकुमारीले हुनैनाथ प्राविबाट शिक्षक पदको कुनै नियुक्तिपत्र नलिएको, जिशिकाबाट अवैधरुपमा दिइएको शिक्षक नियुक्तिको अभिलेख जनाइएको पत्र र उक्त विद्यालयबाट बलैराज निमावि सुनखोलामा सरुवा भएको झुट्टो पत्र लिएर बलैराज निमावि, सुनखोलामा हाजिर गरी पारिश्रमिक लिएकाले उनीविरुद्ध पनि ७४ हजार ९२० रुपैयाँ बिगो कायम गरी असुल गर्न माग गरिएको छ।
यस्तै मनकाकुमारीलाई हाजिर गराउँदै जिल्ला शिक्षा अधिकारीको अनियमित कार्यमा मतियार भई सहयोग गरेको देखिएकोले जिल्ला शिक्षा कार्यालयका स्रोतव्यक्ति हरि नाथलाई प्रतिवन्धात्मक वाक्यांशअनुसार हुने मागदाबी गरिएको छ। विद्यालयका प्राधानाध्याकप नरबहादुर कुँवरविरुद्ध पनि मनकाकुमारीले लिएको पारिश्रमिक अनुसारको बिगो कायम गरी कैद र बिगोअनुसारको जरिवाना माग गरिएको छ।
यस्तै बलैराज निमाविका व्यवस्थापन समितिका अध्यक्ष जयराज जोशीले मनकाकुमारी अवस्थीलाई अन्य विद्यालयबाट आफ्नो विद्यालयमा सरुवा भई आउन कुनै पनि निर्णय र सिफारिससमेत नगरेको अवस्थामा र निजसँग हुनैनाथ प्रावि सल्सेनाको रमानापत्र नभएको जानकारी हुँदा हुँदै विद्यालयमा हाजिर गराएकाले उनीविरुद्ध पनि ७४ हजार ९२० रुपैयाँ बिगो कायम गरी कैद र बिगोअनुसारको जरिवाना माग गरी मुद्दा दायर गरिएको अख्तियारले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1789631269.jpg)
