काठमाडौं– पूर्वगृहमन्त्री तथा नेपाली कांग्रेसका नेता बालकृष्ण खाणले प्रधानमन्त्री पुष्पकमल दाहाल ‘प्रचण्ड’ र जनता समाजवादी पार्टी (जसपा) अध्यक्ष उपेन्द्र यादवसँग छुट्टाछुट्टै भेट गरेका छन्।
केन्द्रमा गठबन्धन सरकार निर्माण र प्रदेशमा एमालेलाई हटाएर गठबन्धन अनुकुल सरकार बनाउने कसरत भएका बेला नेता खाणले प्रधानमन्त्री प्रचण्ड हाल र जसपा अध्यक्ष यादवलाई छुट्टाछुट्टै भेटेका हुन्।
प्रधानमन्त्रीलाई बालुवाटारमा र जसपा अध्यक्ष यादवलाई जसपा संसदीय दलको कार्यालय सिंहदरबारमा भेट गरेको खाणको सचिवालयले जनाएको छ।
प्रधानमन्त्री प्रचण्डसँग भएको भेटमा समसामयिक राजनीतिक घटनाक्रम, गठबन्धनलाई अझ सशक्त बनाउने र सरकारलाई प्रभावशाली रूपमा सञ्चालन गर्ने विषयमा कुराकानी भएको थियो।
‘प्रधानमन्त्री प्रचण्डज्यूसँग बालुवाटारमा भेट भयो। भेटमा समसामयिक राजनीतिक घटनाक्रम, गठबन्धनलाई अझ सशक्त बनाउने र सरकारलाई प्रभावकारी रूपमा कसरी सञ्चालन गर्ने भन्नेबारेमा कुराकानी भयो,’ नेता खाणले भने, ‘संघीय सरकार विस्तार भएपछि प्रदेशहरूमा पनि गठबन्धन अनुकुलका सरकार विस्तार गर्नबारेमा कुराकानी भयो।’
गठबन्धनलाई बलियो बनाउनुपर्छ भनेर लागिरहेका नेता खाणसँग प्रधानमन्त्री प्रचण्डले सत्ता भागबण्डाबारे पनि कुराकानी गरेका थिए।
जसपा अध्यक्ष यादवसँग सिंहदरबारस्थित संसदीय दलको कार्यालयमा भएको भेटमा पनि केन्द्र सरकार विस्तार, प्रदेशमा गठबन्धन अनुकुलको सरकार निर्माणलगायतबारे कुराकानी भएको खाणले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
