लोसपा बैठक (फाइल तस्बिर)
काठमाडौं– लोकतान्त्रिक समाजवादी पार्टी (लोसपा)ले कार्यकारिणी समितिको बैठक बोलाएको छ। बैठक आज (बिहीबार) दिउँसो पार्टी केन्द्रीय कार्यालयमा बस्ने जनाइएको छ।
बैठकमा सरकारमा सहभागिता, बारा २, चितवन २ र तनहुँ १ मा वैशाख १० गते हुने उपनिर्वाचन, उपनिर्वाचनका लागि निर्वाचन आयोगमा दल दर्ताका विषयमा छलफल हुने जनाइएको छ।
सत्तापक्षीय १० दलीय गठबन्धनमा रहेको लोसपाका नेताहरु सम्मानजनक उपस्थिति भए सरकारमा जाने बताउँदै आएका छन्। प्रधानमन्त्री पुष्पकमल दाहाल (प्रचण्ड)ले आफूलाई विश्वासको मत दिने सबै पार्टीलाई समेटेर मन्त्रिपरिषद् विस्तार हुने बताउँदै आएका छन्।
यस्तै, वैशाख १० गते हुने उपनिर्वाचनमा बारा २ बाट आफ्नो पार्टीको उम्मेदवार उठाउने विषयमा छलफल हुने लोसपा नेताहरुको भनाइ छ। जसपा नेता रामसहाय यादव उपराष्ट्रपति निर्वाचित भएपछि बारा २ मा प्रतिनिधि सभा सदस्यको पद रिक्त छ।
बारा २ बाट जसपा अध्यक्ष उपेन्द्र यादव प्रतिस्पर्धी हुने पक्कापक्की जस्तै छ। जसपा अध्यक्ष यादव सत्तापक्षीय गठबन्धनको साझा उम्मेदवारको रुपमा बारा २ मा प्रतिस्पर्धा गर्न चाह्नछन्। तर, गठबन्धन भित्रै लोसपा र जनमत पार्टीले उपगठबन्धन बनाएर यादवलाई रोक्न खोजेको चर्चा पनि छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
