काठमाडौं– सर्वोच्च अदालतले अन्तरिम आदेशका मुद्दाहरुलाई प्राथमिकता दिएर सुनुवाइ गर्ने भएको छ।
सर्वोच्च अदालतको पेसी व्यवस्थापन निर्देशन समितिको बैठकले अल्पकालीन अन्तरिम आदेश जारी भई अन्तरिम आदेशको छलफलमा पेस भएका निवेदन र खारेजसम्बन्धी निवेदनहरुको शीघ्र सुनुवाइको लागि यस्तो निर्णय गरेको प्रवक्ता विमल पौडेलले जानकारी दिए।
‘यस अदालतमा दर्ता भई विधाराधीन अवस्थामा रहेका रिट निवेदनहरुमध्ये प्रारम्भिक सुनुवाइको क्रममा अल्पकालीन अन्तरिम आदेश जारी भई अन्तरिम आदेश जारी गर्ने/नगर्ने बिषयमा छलफलको लागि अर्को पक्षलाईसमेत झिकाइ सुनुवाइ गर्न इजलासबाट आदेश भएका रिट निवेदनहरु लामो समयसम्म सुनुवाइ नभएको देखियो’, प्रवक्ताले जारी गरेको विज्ञप्तिमा भनिएको छ, ‘अल्पकालीन अन्तरिम आदेश दीर्घकालीन आदेशको रुपमा लामो समयसम्म कायम रहने स्थिति सिर्जना हुन गएको देखिँदा अल्पकालीन अन्तरिम आदेश जारी भई अआ. छलफलको लागि पेसी चढेका र एक पक्षीय सुनुवाइबाट अआ जारी भएका मुद्दालाई पेसी व्यवस्थापन गर्ने।’
अन्तरिम आदेश खारेज गरिपाउँ भन्ने निवेदन परी विचाराधीन रहेका निवेदनको सुनुवाइसमेत अभियान मुद्दाबाहेक अन्य समूहका मुद्दामा टपअप गर्नेगरी पेसी व्यवस्थापन गर्ने सर्वोच्चको निर्णयमा उल्लेख छ।
सर्वोच्चको यो निर्णयले अब अभियान फाँट अन्तर्गत पेसी चढेकाबाहेक सबै मुद्दाले सुरुमै पालो पाउने छन्। सर्वोच्चमा मुद्दा धेरै हुँदा तीनदिनभित्र फैसला गर्ने भनि इजलासबाट पेसी तोकिएको मुद्दा पनि २ वर्षसम्म पालो नआउने हुँदै आएको छ।
केही दिन अघि नेपाल लाइभले नेपाल विद्युत् प्राधिकरणका कार्यकारी निर्देशक कुलमान घिसिङकै मुद्दा १८ महिनासम्म पालो नआएको समाचार प्रकाशन गरेको थियो। सर्वोच्चमा यस्तो मुद्दाको चाङ बढेपछि यस्तो निर्णय गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
