काठमाडौं– ‘पहिला थोरै फिल्म बन्थे। त्यसबेला कोही स्टार पनि थिएन। अहिले धेरै फिल्म बन्छन् र स्टार पनि धेरै छन्। सायद दर्शकले पनि स्टारहरुको अपेक्षा गर्छन्,’ कलाकार तथा निर्देशक अशोक शर्मा स्टारमाथि दर्शकको अपेक्षाबारे भृकुटीमण्डपस्थित पर्यटन बोर्डको हलमा मन्थन गर्दै थिए।
चैत २ देखि सुरु भएको छैटौं नेपाल अन्तर्राष्टिय चलचित्र महोत्सव (निफ)को तेस्रो दिन ‘हेर्दा हेर्दै कहाँ पुगियो’विषयक सेसनमा शर्मासँगै अभिनेत्री स्वस्तिमा खड्का र निर्देशक सुजित बिडारी वक्ताका रुपमा थिए। सेसनलाई सहजीकरण गरेका थिए फिल्म समीक्षक सुरज सुवेदीले।
शर्माले पहिले र अहिलेबीचको परिवर्तनले पारेका प्रभावबारे भने, ‘पहिला आफ्नो प्रतिभा देखाउन फिल्म खेल्नुपथ्र्यो। टेलिफिल्म खेल्नु पर्थो। अहिले आफ्नै फोनका माध्यमबाट आफ्नो प्रतिभा संसारकालागि रिलिज गर्न पाइन्छ।’
उनले स्टार हलुका हुनुहुँदैन भन्ने कुरालाई जोड दिए। र भने, ‘त्यसकारण दर्शकसँग प्रत्यक्ष सम्पर्कमा धेरै रहनु हुँदैन।’ अब लोकल कथालाई विश्वमाझ पुर्याउने उद्देश्य फिल्मकर्मीहरूले राख्नुपर्ने भनाइ उनको थियो।
‘फिल्म मेकरको भन्दा दर्शको स्तर बढ्यो’
अन्तर्क्रियामा अभिनेत्री स्वस्तिमा खड्काले नेपाली फिल्म उद्योगमा फिल्ममेकरभन्दा दर्शकको स्तर बढेको बताइन्। ‘फिल्म मेकरको भन्दा दर्शकको स्तर बढेको मलाई लाग्छ। त्यही कारण धेरै फिल्म असफल हुने गरेका छन्,’ उनले भनिन्, ‘कोरियन फिल्मको कपी गरेको कुरा दर्शकलाई लुकाउन सकिँदैन। किनभने उनीहरूले मेकरसँगै त्यो फिल्म हेरिसकेको हुन्छ।’
स्वस्तिमा राम्रा सिनेमाहरू किन चन्दैनन् भन्ने छलफलमा एकैखाले फिल्ममा फरक खाले स्वाद दर्शकलाई बानी पार्न अफ्ठेरो भएको बताउँछिन्। ‘अहिले ३ सय फिल्म एउटै खाले बन्छन् । र, त्यही बीचमा एउटा फरक खाले फिल्म आउँछ। त्यसकारण दर्शकलाई बानी बनाउन अफ्टेरो परेको हो । तर, क्रिएटिभ फिल्मलाई दर्शकले माया गर्छन् नै,’ उनी भन्छिन्।
यद्यपि नेपाली फिल्मका दर्शक कम छन् भन्ने कुरा अस्वीकार गर्छिन् स्वस्तिमा। ‘हलमा कम भए पनि युट्युवमा प्रश्स्तै दर्शक छन्। हलमा असफल भएका फिल्मको पनि मिलियन दर्शक पुगेको देखिन्छ। दर्शक थिएनन् भने यस्तो हुन्न थियो,’ उनी भन्छिन्।
फिल्मको क्रेज कहिल्यै घट्दैन
फिल्म निर्देशक सुजित बिडारी फिल्मको क्रेज कहिल्यै नघट्ने बताउँछन्।
आफ्नै आँखा अगाडि फरक पात्र, जीवन र समाज देख्न पाइने हुनाले मान्छेमा क्रेज रहिरहने उनी बताउँछन्। साथै सिनेमा हलको पनि क्रेज नसकिने उनी बताउँछन्। ‘कनभने मोबाइल फोन र ल्यापटपले हलको मज्जा दिन सक्दैनन्।’ मेकरले आफ्नो रुट बनाउनु पर्ने कुरामा सुजितको जोड छ। ‘रुट बनाउन सकिएन भने कहिँ पुग्न सकिँदैन,’ उनी भन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782043740-1782045458.jpeg)
-1782199085-1782199787.jpeg)
-1764146706.png)
