काठमाडौं– करिब २ करोड रूपैयाँ भ्रष्टाचार गरेको आरोप लागेका सडक विभागका पूर्वइन्जिनियर चन्द्र नारायण यादव र उनकी श्रीमती राधा कुमारी यादवले सफाइ पाएका छन्।
विशेष अदालतका न्यायाधीश श्रीकान्त पौडेल र शालिग्राम कोइरालाको बुधबारको इजलासले उनीहरू दुवै जनालाई सफाइ दिएको हो।
सडक विभागका तत्कालीन सुपरिटेन्डेन्ट इन्जिनियर रहेका बेला यादवले १ करोड ८५ लाख ११ हजार ७ सय २८ रुपैयाँ भ्रष्टाचार गरेको भन्दै अख्तियार दुरुपयोग अनुसन्धान आयोगले २०७७ असार २२ गते विशेष अदालतमा मुद्दा दायर गरेको थियो।
यादवले पदमा रहँदा गैरकानुनी सम्पत्ति आर्जन गरेको भन्दै अख्तियारले मुद्दा दायर गरेको थियो। यादव २०३६ मंसिर २ मा सुनसरी–मोरङ सिंचाई विकास समितिमा ओभरसियर पदबाट म्यादी नियुक्ति भई २०४७ असार १२ मा इन्जिनियर पदमा स्थायी नियुक्तिपश्चात विभिन्न कार्यालयहरूमा कार्यरत रही २०७४ फागुन १६ मा सुपरिटेन्डेट इन्जिनियरको पदबाट अवकाश पाएका थिए।
अवकास प्राप्त गर्दासम्मको अनुसन्धानमा लिइएको जाँच अवधिमा उनले पारिश्रमिक बचत आय २७ लाख ४६ हजार ६३७, दुर्गम तथा स्थानीय भत्ताबापतका आय ३ लाख ८ हजार ४०२ रुपैयाँ, कृषि आय २६ लाख ८५ हजार ७००, कर्जा आय ३६ लाख ५६ हजार ९०० सय रुपैयाँ, कर्जा मौज्दात ८ लाख ७७ हजार १०० रुपैयाँ समेत गरी जाँच अवधिमा १ करोड २ लाख ७४ हजार ७३९ रुपैयाँ आय आर्जन गरेको अख्तियारको दाबी थियो।
सोही जाँच अवधिमा यादवको श्रीमती राधा कुमारी यादव र छोरी आँचल यादवको नाममा दर्ता कायम रहनेगरी जग्गा खरिदमा ३२ लाख २४ हजार २५० रुपैयाँ, घर निर्माण एवं घरमा जडित तथा रहेको फर्निसिङ, फर्निचर, इलेक्ट्रोनिक्स, इलेक्ट्रिकल सामग्रीसहितमा ९२ लाख ८३ हजार ४६४ रुपैयाँ, कर्जा चुक्ता प्रयोजनमा ३१ लख ४८ हजार २०४ रुपैयाँ, कर्जा बैंक मौज्दातमा ८ लाख ७७ हजार १०० रुपैयाँ, पूँजीगत लाभकरमा ५० हजार रुपैयाँ लगानी गरेको अख्तियारको ठहर थियो।
छोरी आँचल यादव र छोरा आभुषण यादवसमेतलाई चिकित्सा शास्त्र अध्ययनसमेतको शैक्षिक खर्चमा ८० लाख ५९ हजार ४१६ रुपैयाँलगायत विभिन्न शीर्षकमा खर्च गरेको अख्तियारले उल्लेख गरेको थियो।
यादवको वैध आय १ करोड २ लाख ७४ हजार ७३९ रुपैयाँको अनुपातमा आयभन्दा बढी गरेको १ करोड ८५ लाख ११ हजार ७ सय २८ रुपैयाँ बराबरको भागको सम्पत्तिको स्रोत खुल्न नआएको पाइएकोले भन्दै मुद्दा दर्ता गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
