मोबाइल पसल लुटपाट हुँदाको सीसीटीभी दृश्य।
काठमाडौं– गत फागुन १ गते काठमाडौंको बालाजु नयाँ बसपार्कस्थित लोत्से मलका मोबाइल पसलमा भएको लुटपाट घटनामा पक्राउ परेका १८ जनामध्ये अदालतले ३ जनालाई मात्रै थुनामा राख्न आदेश दिएको छ। जिल्ला अदालत काठमाडौंका न्यायाधीश शंकरराज बरालको सोमबारको इजलासले पक्राउ परेकामध्ये ३ जनालाई मात्रै पुर्पक्षका लागि थुनामा राख्न आदेश दिएको हो।
अदालतको आदेशानुसार पुर्पक्षका लागि कारागार चलान हुनेमा काठमाडौंको तारकेश्वर नगरपालिका–१ का चिरनप्रसाद रेग्मी, काठमाडौं महानगरपालिका–१६ का रवि तामाङ र काठमाडौं महानगरपालिका–२६ का नवीन खड्गी रहेका छन्। उनीहरुलाई पुर्पक्षका लागि केन्द्रीय कारागार सुन्धारा चलान गरिएको प्रहरीले जनाएको छ।
त्यसैगरी बाँकी रहेका १५ जना मध्ये ११ जनासँग धरौटी माग गरिएको छ भने २ जनालाई साधारण तारेख र २ जना नाबालकलाई अभिभावकको जिम्मा लगाउन आदेश दिइएको छ।
काठमाडौंको तारकेश्वर–१३ का सरोज पौडेल, रुपन्देहीको सैनामैना नगरपालिका–६ का कमल भनिने कैलाश कार्कीलाई ५० हजार धरौटीमा रिहा गर्न आदेश दिइएको छ। कार्की धरौटी तिरेर रिहा भएका छन् भने पौडेल भने धरौटी तिर्न नसकी थुनामा गएका छन्।
काठमाडौं महानगरपालिका–१६ का सुवास अधिकारीसँग ३० हजार धरौटी माग गरिएको थियो। उनी पनि धरौटी बुझाएर रिहा भएका छन्।
काठमाडौंको तारकेश्वर–५ का डिले गुरुङ, काठमाडौं महानगरपालिका–२६ का विशाल पौडेल र नुवाकोटको तारकेश्वर गाउँपालिका–३ का कृष्ण भनिने ईश्वर श्रेष्ठ र भोजपुरको षडानन्द नगरपालिका–९ का दिलकुमार राईलाई २० हजार धरौटी लिएर रिहा गर्न न्यायाधीश पराजुलीको इजलासले आदेश दिएको थियो।
पौडेल भने धरौटी तिर्न नसकेर थुनामा भएका छन् बाँकी २० हजार धरौटी बुझाएर रिहा भएका छन्।
काठमाडौं–२६ का सुजन खत्री, काठमाडौं महानगरपालिका–१६ का सुजन तामाङ, काठमाडौंको शंखरापुर नगरपालिका–७ का रोजन डंगोल र काठमाडौं तारकेश्वर नगरपालिका–११ का यमन राईलाई १५ हजार रुपैयाँ धरौटीमा छाड्न आदेश भए पनि धरौटी बुझाउन नसकेपछि उनीहरुलाई थुनामा पठाइएको छ।
काठमाडौं महानगरपालिका–२६ का कृष्ण श्रीवास्तव र सोही ठाउँका रितेश बस्नेत साधारण तारेकमा रिहा भएका छन्। दुई नाबालकलाई भने उनीहरुको अभिभावकको जिम्मा लगाएर छाडिएको छ।
नयाँ बसपार्कस्थित लोत्से मलमा अर्जुन चालिसेले सञ्चालन गरेको एबीसीडी मोबाइल प्रालि र डायमन्ड स्टार इन्भेस्टमेन्ट ग्रुप प्रालि तथा गजेन्द्र न्यौपानेले सञ्चालन गरेको काठमाडौं सुपर मार्केट प्रालि तोडफोड गरी लुटपाट भएको थियो।
चालिसेले ८ करोड ३९ लाख ८१ हजार ९२५ रुपैयाँ लुटपाट भएको दाबी गरेका छन्। यस्तै, न्यौपानेले १ लाख २६ हजार ३३० रुपैयाँ लुटपाट भएको दाबी गर्दै प्रहरी वृत्त महाराजगञ्जमा जाहेरी दिएका थिए। पक्राउ परेकाहरुबाट बरामद भएको मोबाइल तथा सरसामानहरु भने जम्मा २ लाख ७८ हजार रुपैयाँ बराबरका थिए।
करिब ९ करोड रुपैयाँ दाबी गर्दै उजुरी परे पनि सो बराबरको धनमाल लुटपाट भएको प्रमाण नै जाहेरीकर्ताहरुले जुटाउन सकेका थिएनन्। प्रमाणबिना करोडौंको लुटपाट भएको दाबी गर्दै उजुरी दिएपछि पक्राउ परेकाहरु साधारण तारेख तथा थोरै धरौटीमा रिहा भएका छन्।
ट्राफिक प्रहरीले बढाएको जरिवाना घटाउनुपर्नेलगायत विभिन्न माग राख्दै यातायात मजदुर संगठनहले आन्दोनल गरेका थिए। सो क्रममा आन्दोलन भड्किदा लुटपाट, तोडफोड र आजगनी समेत भएको थियो। लुटपाटमा संलग्नहरुलाई प्रहरीले पक्राउ गरेर अनुसन्धान अघि बढाएको थियो।
अनुसन्धानका क्रममा भने उजुरीकर्ताले दाबी गरेजस्तो करोडौको लुटपाट भने नभएको पाइएको थियो। लुटपाटका प्रमाण समेत मोबाइल पसल सञ्चालकले जुटाउन सेकका थिएनन्। जसकारण ८ करोड भन्दा बढी माग दाबी गरिएका व्यक्तिहरु, १५ हजारदेखि ५० हजारसम्म धरौटी बुझाएर रिहा हुने भएका छन्।
पक्राउ परेकाहरुलाई मुलुकी अपराध संहिता २०७४ परिच्छेद २० चोरी तथा डाँकासम्बन्धी कसुरमा मुद्दा चलाइएको थियो। तर दाबी गरिएजस्तो ८ करोड भन्दा बढी लुटिएको कुनै प्रमाण नभएपछि अधिकांश धरौटी तथा सामान्य तारेखमा रिहा भएका हुन्।
८ करोड भन्दा बढी मागदाबी गरेपछि प्रहरीले कर कार्यालयलाई पत्राचार गरेर मोबाइलको विवरण माग गरेको थियो। ८/१० महिनाअघि ल्याइएका मोबाइलहरूको समेत विवरण व्यवसायीले प्रहरीमा पेस गरेपछि त्यसको यथार्थ विवरणका लागि कर कार्यालयलाई पत्राचार गरिएको थियो। तर कर कार्यालयले समेत करोडौं मोबाइल भएको विवरण प्राप्त नभएको जानकारी दिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787795595.png)
-1786602170.png)
-1786513116.png)
