मोबाइल पसल लुटपाट हुँदाको सीसीटीभी दृश्य।
काठमाडौं– फागुन १ गते बालाजुमा भएको मोबाइल पसल लुटपाट घटनामा नयाँ ट्विस्ट आएको छ। यातायात मजदुरहरूले विभिन्न माग राखेर गरेको आन्दोलन भड्किएपछि तोडफोड र आगजनीका साथै मोबाइल पसल नै लुटपाट भएको थियो।
नयाँ बसपार्कस्थित लोत्से महलमा भएका दुई वटा पसलहरू तोडफोड गर्दै लुटपाट भएको थियो। मोबाइल पसल लुटिएका भिडियो नै सार्वजनिक भएपछि प्रहरीले सोही भिडियोका आधारमा व्यक्ति पहिचान गर्दै पक्राउ गरिरहेको छ।
अहिलेसम्म मोबाइल पसल लुटपाट भएको घटनामा १७ जनालाई पक्राउ गरेर अनुसन्धान गरिएको जिल्ला प्रहरी परिसर काठमाडौंका प्रवक्ता तथा एसपी सिताराम रिजालले बताए।
उनका अनुसार पक्राउ परेका सबै जनालाई प्रहरी वृत्त महाराजगञ्जमा राखेर अनुसन्धान अघि बढाइएको छ। यस घटनामा संलग्न केही व्यक्ति अझै फरार रहेको हुनसक्ने भन्दै खोजी कार्यसमेत जारी राखिएको एसपी रिजालले बताए।
लुटपाट भएको भोलिपल्ट फागुन २ गते पत्रकार सम्मलेन गर्दै करिब १० करोड रुपैयाँ बराबरको लुटपाट भएको दाबी गरिएको थियो। मोबाइल व्यवसायी महासंघका अध्यक्ष भरत भट्टराईले ८ देखि १० करोड रुपैयाँसम्मको लुटपाट भएको दाबी गर्दै सरकारले ४८ घन्टाभित्र मोबाइल व्यवसायीका माग सम्बोधन गर्नुपर्ने बताएका थिए। मोबाइल व्यवसायीलाई सरकारले क्षतिपूर्ति दिनुपर्ने समेत भट्टराईले बताएका थिए।
घटनालगत्तै प्रहरीले मुचुल्का उठाएर अनुसन्धानको प्रक्रिया सुरु गरेको थियो। अनुसन्धानको क्रममा अहिलेसम्म १७ जना पक्राउ परिसकेका छन्। काठमाडौं उपत्यका अपराध अनुसन्धान कार्यालय, जिल्ला प्रहरी परिसर काठमाडौं र प्रहरी वृत्त महाराजगञ्जको टोलीले उनीहरूलाई पक्राउ गरेर अनुसन्धान अघि बढाएको हो।
लुटपाटमा संलग्नहरू पक्राउ परेसँगै प्रहरीमा जाहेरीसमेत दिन मोबाइल व्यवसायीहरू गएका थिए। दुई वटा मोबाइल पसलबाट चार/चार करोड गरी ८ करोड रुपैयाँ बराबरको मोबाइल तथा सरसामानहरू लुटिएको दाबी व्यवसायीले गरेका थिए।
८ करोड लुटिएको दाबी गर्दै उजुरी दिन गए पनि ८ करोड लुटिएको पुष्टि हुने खालको आधार तथा प्रमाणहरू नभएको भन्दै प्रहरीले उक्त जाहेरी दर्ता गरेको छैन। करोडौंको समान लुटिएको दाबी गरे पनि प्रमाणहरू भने जुटाउन नसक्दा अहिले घटनामा नयाँ ट्विस्ट आएको छ।
दाबी ८ करोडको, प्रमाण ८ वटा मोबाइलको
दुई वटा पसलबाट ८ करोड रुपैयाँ बराबरका मोबाइल तथा सामानहरू लुटिएको दाबी गरे पनि अहिलेसम्म ८ वटा मोबाइलकोभन्दा बढी प्रमाण व्यवसायीले जुटाउन सकेका छैनन्। लुटिएको भनिएका मोबालहरूले आईएमईआई नम्बर उपलब्ध गराउन प्रहरीले व्यवसायीलाई भनेको थियो।
आईएमईआई नम्बर उपलब्ध भएपछि अनुसन्धान गर्न सहज हुने भन्दै माग गरिएकोमा अहिलेसम्म ८ वटाभन्दा बढी मोबाइलको आईएमईआई नम्बर उपलब्ध नभएको प्रहरी स्रोतले नेपाल लाइभलाई बतायो।
‘उहाँहरूले करोडौंको लुटपाट भएको दाबी गर्नुभएको छ। तर प्रमाण भने ८ वटा मोबाइलकोभन्दा बढी उपलब्ध गराउन सक्नुभएको छैन’ प्रहरी उच्च स्रोतले नेपाल लाइभसँग भन्यो, ‘किन उपलब्ध गराउन सक्नुभएन भन्ने प्रश्नको जवाफ पनि अब प्रहरीले खोज्नुपर्ने भएको छ।’
लुटिएका समानहरूको विवरण तथा प्रमाण उपलब्ध गराउन नसकेपछि ती सामानहरू भन्सार छलि गरेर ल्याएर बेचिएकोसमेत हुनसक्ने आशंका गरिएको छ। लुटिएका समानहरूको प्रमाण व्यवसायीले दिन नसक्नुको पछाडि कर छलेर ल्याएर बेचिएको हुनसक्ने देखिएपछि त्यसतर्फसमेत अनुसन्धान अघि बढाइएको छ।
अर्कोतर्फ बसपार्क क्षेत्र र लुटिएका भनिएका पसलहरूमा समेत महंगा ब्राण्डका मोबाइलहरूको बिक्री शून्य प्रायः हुने गरेकोसमेत अनुसन्धानबाट देखिएकाले व्यवसायीले दाबी गरेको मूल्यको लुटपाट नै नभएको प्रहरीको निष्कर्ष छ।
व्यवसायीले झुटो दाबी गरेपछि कर कार्यालयलाई प्रहरीको पत्र
सीसीटीभी फुटेजमा देखिएको दृश्य, बसपार्क तथा लुटिएका पसलहरूमा बिक्री हुने मोबाइलहरूको ब्राण्ड र अन्य विविधि कोणका आधारमा विश्लेषण गर्दा दाबी गरिएकोभन्दा एकदमै न्यून रकमको मोबाइल तथा समानहरू लुटपाट भएको प्रहरीको निष्कर्ष छ।
तर व्यवसायीले भने ८ करोडको लुटपाट भएको दाबी गरेपछि प्रहरीले कर कार्यालयलाई पत्राचार गरेर मोबाइलको विवरण माग गरेको छ। ८/१० महिनाअघि ल्याइएका मोबाइलहरूकोसमेत विवरण व्यवसायीले प्रहरीमा पेस गरेपछि त्यसको यथार्थ विवरणका लागि कर कार्यालयलाई पत्राचार गरिएको प्रहरी स्रोतले बतायो।
‘उहाँहरूले ८/१० महिना अघिका विवरणहरू पनि पेस गर्नु भएको छ। त्यतिखेर ल्याइएका मोबाइलहरूमध्ये कति बिक्री भए कति बाँकी छन् भन्ने कर कार्यालयसँग विवरण हुन्छ। त्यसका लागि हामीले कर कार्यालयलाई पत्राचार गरेका छौं’, एक प्रहरी अधिकारीले नेपाल लाइभसँग भने।
तर प्रहरीले पत्राचार गर्दै माग गरेको उक्त विवरण कर कार्यालयले अहिलेसम्म उपलश्ध गराएको छैन। जसकारण यत्ति नै मोबाइल लुटियो भन्ने प्रमाण अहिले नै नखुले पनि प्रहरीले बढीमा ४०/५० थानभन्दा बढी मोबाइल नलुटिएको दाबी गरेको छ। ती मध्ये अहिलेसम्म २५ वटा मोबाइल बरामद भएका छन्। तर व्यवसायीले भने ८ वटाभन्दा मोबाइलको आईएमईआई नम्बर नै उपलब्ध गराउन सकेका छैनन्।
आगजनी गर्ने ३५ जना पक्राउ
आन्दोलन भड्किएपछि एउटा समूहले प्रहरीको गाडी नै जलाएको थियो। माछापोखरीमा रोकिराखेका प्रहरीका प्रहरीका दुईवटा भ्यान पल्टाएर जलाइएको थियो। प्रहरीको भ्यान जलाएको भिडियो पनि बाहिरिएको थियो।
त्यहीको भिडियोको सहयोगमा आगजनीमा संलग्न भएको आरोपमा अहिलेसम्म ३५ जना पक्राउ परेको एसपी रिजालले बताए। उनीहरूमध्ये अधिकांशलाई प्रहरीले आगजनी गर्दाकै हुलियाको अवस्थामा पक्राउ परेको छ। पक्राउ परेकाहरूलाई प्रहरी वृत्त बालाजुमा राखेर अनुसन्धान अघि बढाइएको छ।
उक्त आगजनी तथा तोडफोडमा ४१ प्रहरीसमेत घाइते भएका थिए। प्रहरी वृत्त बालाजुका डीएसपी रवीन विष्टको कमाण्ड कमजोर भएको भन्दै जिम्मेवारीविहीन बनाइएको थियो।
डीआईजी मसाउद आलम खाँको नेतृत्वमा छानबिन समिति बनाएर छानबिन सुरु गरिएको थियो। उक्त समितिले प्रहरी वृत्त बालाजुका डीएसपी विष्ट र सोह्रखुट्टेका डीएसपी गणेशबहादुर बमलाई कारबाहीका लागि सिफारिससमेत गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
