काठमाडौं– जरिवाना, लाइसेन्स निलम्बन तथा खारेजीलगायतका ट्राफिक नियमको विरोधसहित विभिन्न १० बुँदे माग राख्दै यातायात व्यवसायी तथा मजदुरहरु आन्दोलित थिए।
गत माघ १७ गते नै लिखित रुपमै उपप्रधान एवम् भौतिक पूर्वाधार तथा यातायात मन्त्री नारायणकाजी श्रेष्ठलाई उनीहरुले १० बुँदे माग बुझाएका थिए।
ट्राफिक प्रहरीले गर्ने व्यवहार, एक्कासी मनपरी बढाइएको जरिवानालगायतको विषयमा कुरा उठाउँदै यसअघि उनीहरुले पुस १७ गते उपत्यका ट्राफिक प्रहरी कार्यालय, १८ गते यातायात व्यवस्था विभाग, १९ गते भौतिक पूर्वाधार तथा यातायात मन्त्रालय र माघ ६ गते गृह मन्त्रालयमा ज्ञापनपत्र नै बुझाएका थिए। ज्ञापनपत्र बुझाएको डेढ महिना बितिसक्दा समेत माग सम्बोधनको कुनै प्रक्रिया अघि नबढेको भन्दै उनीहरुले सोमबार नयाँ बसपार्कमा विरोध सभाको कार्यक्रम राखेका थिए।
तर नयाँ बसपार्क व्यवस्थापनको जिम्मा पाएको लोत्से बहुउद्देश्यीय प्रालिका कर्मचारीले मजदुरलाई रोकेपछि उनीहरु आक्रोशित भएका थिए। त्यसपछि भड्किएको मजदुरको आन्दोलन तोडफोड, आगजनी र लुटपाटमा परिणत भएको थियो। यी सबै घटनाहरु हुँदा प्रहरी भने निरिह भएको देखिन्छ।
कसरी भयो आगजनी र लुटपाट?
विरोध सभा हुने भएपछि झण्डासहित मजदुर नयाँ बसपार्क पुगेका थिए। लोत्सेले कार्यक्रम गर्न नदिने भएपछि त्यहाँ भएको विवाद साम्य पार्न प्रहरी वृत्त बालाजुको टोली पुगेको थियो। उक्त भिडलाई साम्य पार्ने तयारी भइरहेको थियो। मजदुरहरु पनि ‘कन्भिस’ हुने अवस्था भइसकेको थियो। तर त्यहाँबाट बाहिरिएको अर्को भिड भने माछापोखरीमा रोकिराखेको प्रहरीको भ्यान अगाडि पुगिसकेको थियो। उक्त उग्र भिडले प्रहरीको गाडी लडाउँदै आगजनी गरेको जिल्ला प्रहरी परिसर काठामाडौं एक प्रहरी अधिकृतले बताए।
‘अब वार्ता भयो, कुरा मिल्यो भन्ने पक्षमा प्रहरी थियो। तर अर्को भिडले आक्रमण गर्यो। उक्त ठाउँमा तत्काल प्रहरी पुग्न सक्ने अवस्था पनि थिएन। जाम भएकाले प्रहरीका दुई वटा गाडी त्यहीँ फसे। त्यही मौकामा आगजनी र आक्रमण भयो,’ प्रहरी स्रोतले नेपाल लाइभसँग भन्यो।
प्रहरीका भ्यानमा आक्रमण हुँदा उक्त भ्यानका चालक समेत गाडीमै थिए। अर्का एक प्रहरी पनि भ्यानको पछाडि बसेका थिए। ठूलो भिडले एकै पटक आक्रमण गर्न थालेपछि उनीहरुले भागेर ज्यान जोगाएका थिए।
एउटा टोली प्रहरीसँगै वार्तामा रहँदा अर्को समूहले प्रहरीकै भ्यान जलाइसकेको थियो भने अर्को एउटा समूहले लोत्से भवन नै तोडफोड गर्दै लुटपाट मच्चाइरहेको थियो।
काठमाडौं महानगरपालिकासँग भाडामा लिएर बसपार्क क्षेत्रमा व्यवसाय गरिहरेको लोत्से बहुउद्देश्यीय प्रालिका कर्मचारी तथा सुरक्षा गार्डले कार्यक्रम गर्न नदिँदै मजदुरमाथि नै आक्रमण गरेपछि तोडफोड भएको प्रहरीको प्रारम्भिक अनुसन्धानबाट खुलेको छ।
तोडफोड गर्दै उनीहरुले मोबाइल पसलमा लुटपाट समेत मच्चाएका थिए। तोडफोड गरेर लुटपाट मच्चाउँदा समेत प्रहरी उक्त घटनामा समेत निरिह भएको देखिन्छ। मोबाइल व्यवसायी महासंघले करिब १० करोड बराबरको मोबाइल लुटपाट भएको बताएको छ।
यता जिल्ला प्रहरी परिसर काठमाडौंका प्रवक्ता तथा एसपी सिताराम रिजालले लुटपाट घटनाको अनुसन्धान सुरु गरिसकेको बताएका छन्।
निरन्तर आलोचित प्रहरी
सर्वोच्च अदालतको फैसलापछि तत्कालीन गृहमन्त्री रवि लामिछाने गत माघ १३ गते पदमुक्त भएका थिए। त्यसयता मन्त्रीविहिन बनेको छ गृह मन्त्रालय। मुलुकको शान्ति सुरक्षासँग प्रत्यक्ष जोडिएको निकै संवेदनशील मन्त्रालय अहिले प्रधानमन्त्री पुष्पकमल दाहाल प्रचण्डसँगै छ। मन्त्रीविहीन बनेको मन्त्रालय मातहत रहेको प्रहरी संगठन भने यतिबेला निरन्तर आलोचित बन्दै गइरहेको छ।
राष्ट्रपति विद्यादेवी भण्डारीको सवारीका बेला हिँडेको भन्दै वीर अस्पतालका डाक्टरलाई नै कुटेर प्रहरी आलोचित भएको थियो। डाक्टरको टाउकामा लाठी बजारेपछि देशभरकै चिकित्सक आन्दोलनमा उत्रने अवस्था आएको थियो।
पछि प्रहरीले माफी माग्दै डाक्टर कुट्ने हवल्दारलाई निलम्बन गरेपछि घटना सामसुम भएको थियो। तर त्यसको एक साता बित्न नपाउँदै फेरि फिलतो सुरक्षा व्यवस्थाका कारण प्रहरी आलोचित बन्न पुगेको छ। संघीय राजधानीमै प्रहरीकै दुई–दुई वटा गाडीमा आगजनी हुँदा प्रहरी निरिह बनेको छ। आफ्नै मालसमानको समेत सुरक्षा गर्न नसक्ने प्रहरीले कसरी नागरिकको सुरक्षा गर्छ? भन्ने प्रश्न समेत तेर्सिएको छ।
४१ प्रहरी घाइते
सोमबारको उक्त घटनामा प्रहरी यतिसम्म निरिह देखियो कि प्रहरी कर्मचारीले आफ्नै गाडी जलेको ‘आगो तापेर’ बस्नुपर्ने अवस्था बन्यो। उक्त घटनामा ४१ जना प्रहरी घाइते भएका छन्।
घाइते प्रहरी कर्मचारीको प्रहरी अस्पतालमा उपचार भइरहेको छ। तीमध्ये १ जना महिला नगर प्रहरी त सोमबारसम्म बोल्न सक्ने अवस्थामा थिइनन्। अहिले उनी खतरामुक्त भइसकेकी छिन्।
प्रहरी नै घाइते, आफ्नै गाडी समेत आन्दोलनकारीले लजाएपछि प्रहरी वृत्त बालाजुका डीएसपी रवीन विष्टको भने जिम्मेवारी समेत खोसिएको छ।
विष्टलाई काठमाडौं उपत्यका प्रहरी कार्यालय रानीपोखरी तानेर उनको ठाउँमा डीएसपी मनोजित कुँवरलाई पठाइएको एसपी रिजालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
