काठमाडौं– आईसिसी विश्वकप क्रिकेट लिग–२ अन्तर्गत त्रिकोणात्मक श्रृंखलाको आफ्नो दोस्रो खेलबाट पपुवान्युगिनी (पिएनजी) ले पहिलो जित निकालेको छ।
कीर्तिपुरस्थित त्रिभुवन विश्व विद्यालयको मैदानमा शुक्रबार सम्पन्न खेलमा पिएनजीले संयुक्त अरब इमिरेट्स (यूएई) लाई ५६ रनले पराजित गर्दै पहिलो जित निकालेको हो।
३३ खेल मध्येबाट १६ औं हार भोगेको यूएईको लिग–२ मा रहेर सिधै विश्वकप छनोट हुने सम्भावना औपचारिक रुपमा सकिएको छ। अब यूएईलाई विश्वकप छनोटका लागि छनोट प्लेअफ खेल्नुपर्नेछ। साथै यूएईले एकदिवसीय मान्यता जोगाउन बाँकी रहेका सबै ३ खेल जित्नुपर्ने दबाब पनि भएको छ।
पिएनजीले पूरै ५० ओभरमा नौ विकेट गुमाउँदै दिएको २ सय ४७ रनको लक्ष्य भेटाउने क्रममा यूएईले ४२.२ ओभरमा सबै विकेट गुमाएर मात्र १ सय ९० रन जोड्नसक्यो। यूएईका लागि आर्यान लाक्राले ५१ रनको अर्धशतकीय ईनिङ खेले पनि जितका लागि पर्याप्त भएन।
ओपनर तथा कप्तान मुहम्मद वासिमले ४१ रन बनाउँदा जावर फरिद र सीपी रिजवानले समान १९/१९ रन बनाए। यस्तै आसिफ खान र रोहन मुस्ताफाले समान ११/११ रन पारी खेलेका थिए। कसिलो बलिङ गरेको पिएनजीका लागि राईली हिकुरेले ३ तथा असद भाला र कबुवा मोरियाले समान २र२ विकेट लिए। सिमो कमिया र नर्मन भानुवाले समान १/१ विकेट लिए।
यसअघि टस हारेर ब्याटिङको निम्तो पाएको पिएनजीले निर्धारित ५० ओभरमा नौ विकेट गुमाउँदै दुई सय ४६ रनको योगफल तयार पारेको थियो। लिग तालिकाको पुछारमा रहेको पिएनजीका लागि सेसे बाउले १ सय ६ बलमा १० चौकाको मद्दतमा अविजित ८१ रनको पारी खेलेका थिए।
यसैगरी हिरी हिरीले ८५ बलमा ५ चौका र ४ छक्काको मद्दतमा ७७, किप्लिन डोरिगाले ४४ बलमा ८ चौका र २ छक्का मद्दतमा ५५ तथा चाड सोपार र नोर्मन भानुआले समान १० रन जोडेका थिए। २ सय ४६ रनको योगफल तयार पार्ने क्रममा दोस्रो विकेटका लागि सेसे बाउ र हिरीले १ सय १२ तथा पहिलो विकेटका लागि हिरी र डोरिगताले ७२ रनको साझेदारी गरेका थिए।
यूएईका लागि आयन अफ्जल खानले ३ विकेट हात पार्दा जुनैद सिद्धीकी र जाहुर खानले समान २/२ तथा रोहन मुस्ताफा र कार्तिक मैयप्पनले समान १/१ विकेट निकाले।
यससँगै पिएनजीले यूएईविरुद्ध जितको लयलाई शुक्रबार पनि निरन्तरता दिएको छ। हालै मात्र यूएई भ्रमणमा पपुवा न्युगिनीले दुवै खेलमा यूएईलाई हराएको थियो। युएईबिरुद्ध दुवै खेलमा पपुवान्युनिगी पूर्ण रुपमा हाबी भएको थियो भने नेपालसँगका दुवै खेल गुमाउन पुगेको थियो।
यस्तै नेपालमा जारी श्रृंखलामा भने पिएजनीले दोस्रो खेलबाट पहिलो जित निकालेको छ। यसअघिको पहिलो खेलमा नेपालसँग ५२ रनले पराजित भएको थियो। पिएनजी ३४ खेलमा ११ अंकका साथ सातौं स्थानमा छ। लिगमा आइतबार नेपाल र यूएईबीच खेल हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
