काठमाडौँ- १४ वर्षपछि चैत ५ गते त्रिभुवन विश्वविद्यालय स्वतन्त्र विद्यार्थी युनियन(स्ववियु)को निर्वाचन हुँदैछ। जसका लागि शुक्रबार मनोनयनपत्र वितरण भइसकेको छ।
त्रिभुवन विश्वविद्यालय अन्तर्गत मुलकभरका ६२ वटा आङ्गिक, सामुदायिक र निजी गरी १ हजार ४० वटा सम्बन्धन प्राप्त क्याम्पसहरूमा मनोनयनपत्र वितरण गरिएको छ।
त्रिभुवन विश्वविद्यालयको स्ववियु कार्यतालिका अनुसार शुक्रबार प्रत्यक्ष र समानुपातिकतर्फको मनोनयनपत्र वितरण गरिएको हो। शनिबार भने उम्मेदवारी दर्ताको कार्य तालिका रहेको छ।
नेविसंघ संस्थापन र इतर पक्षको विवाद मिल्यो
नेपाली कांग्रेस निकट नेपाल विद्यार्थी संघ (नेविसंघ)को लामो समयदेखिको आन्तरिक विवाद टुङ्गिएको छ। नेविसंघमा संस्थापन र इतर पक्षबीच विवाद समाधान नभएपछि कांग्रेसले सहमहामन्त्री किशोरसिंह राठोरलाई विवाद सुल्झाउनका लागि जिम्मेवारी सुम्पेको थियो।
सहमहामन्त्री राठोरले संस्थापन र इतर पक्षका विद्यार्थीहरूलाई राखेर विवाद समाधान गरेका छन्। इतर पक्षबाट केशव सिंह, रञ्जित कर्ण र संस्थापक पक्षबाट नेविसंघ अध्यक्ष डुजाङ शेर्पासहितले संवाद गरेका थिए। जसअनुसार आङ्गिक क्याम्पसहरूमा उम्मेदवार छनोटका लागि दुवै पक्षबाट प्रतिनिधिहरू खटाइएको छ।
वार्ताको सहमति बमोजिम तीन सदस्यीय टिकट वितरण समिति गठन गरिएको इतर पक्षका विद्यार्थी नेता धर्म शाहीले नेपाल लाइभलाई बताए। शाहीले भने, ‘दुई पक्षको सहमतिअनुसार स्ववियु निर्वाचनमा देशभर ४० प्रतिशत हिस्सा लिने, प्रत्येक आङ्गिक क्याम्पसहरूमा संस्थापन र इतर पक्षबाट एक-एक जना प्रतिनिधि जाने सहमति भएको छ।’
टिकट वितरण समितिमा संस्थापन पक्षबाट अध्यक्ष डुजाङ शेर्पा इतर पक्षबाट प्रेमिका राना मगर र एक जना पार्टी सहमहामन्त्री राठौरले तोकेको तटस्थ व्यक्ति रहने सहमति भएको शाहीले जानकारी दिए।
स्ववियुलाई लक्षित गर्दै अनेरास्ववियुद्वारा प्रतिबद्धता सार्वजनिक
नेकपा एमाले निकट अखिल नेपाल स्वतन्त्र विद्यार्थी युनियन (अनेरास्ववियु)ले स्वतन्त्र विद्यार्थी युनियनलाई लक्षित गर्दै आफ्नो प्रतिबद्धतापत्र सार्वजनिक गरेको छ।
निःशुल्क शिक्षा, स्वास्थ्य एवं पूर्ण रोजगार समृद्ध नेपाल निर्माणमा हाम्रो अठोट, प्राज्ञिक उन्नयन र युवा विद्यार्थीको सबल नेतृत्व निर्माणका लागि अनेरास्ववियुलाई भोट भन्ने मुल नारासहित प्रतिबद्धता सार्वजनिक गरेको हो। शुक्रबार काठमाडौंको बागबजारस्थित होटेल हार्दिकमा एक औपचारिक कार्यक्रमको आयोजना गर्दै घोषणापत्र सार्वजनिक गरेको अनेरास्ववियुले जनाएको छ।
चैत ३ गते हुने मध्यपश्चिम विश्वविद्यालय, चैत ५ त्रिभुवन विश्वविद्यालय, नेपाल संस्कृत विश्वविद्यालय र चैत ८ गते सुदूरपश्चिम विश्वविद्यालयमा हुने स्ववियु निर्वाचनलाई लक्षित गर्दै प्रतिबद्धता सार्वजनिक गरेको अनेरास्ववियुका महासचिव नरेश रोकायाले जानकारी दिए।
रोकायाले ८ वटा विद्यार्थी सङ्गठनका विद्यार्थीहरूले अनेरास्ववियु विरुद्ध गठबन्धन गरेर घेराबन्दी गरेको बताउँदै अनेरास्ववियु एक्लै निर्वाचनमा होमिन तयार भएको बताए।
अनेरास्ववियुका उपाध्यक्ष एवं घोषणापत्र उपसमितिका संयोजक नारायण घर्तीले प्रतिबद्धता देखाउने र लेखाउने नामको मात्रै नभएको दाबी गरे। उनले भने, ‘अनेरास्ववियुले स्ववियु जितिसकेपछि दुई वर्षभित्र सात प्रतिबद्धता, सात वटा काम र तीन विशेष प्राथमिकताका क्षेत्रका साथै २३ वटामा कामको विभाजन गरेर राखेका छौँ।’ उनले अनेरास्ववियुको प्रतिवद्धतापत्र प्रत्येक विद्यार्थीहरूका बीचमा लिएर जान अनुरोध गरे।
घोषणापत्रमा अनिवार्य र निःशुल्क माध्यमिक शिक्षा, सस्तो, सुलभ र गुणस्तरीय शिक्षा,अनुसन्धानका विद्यार्थीका लागि अत्याधुनिक ज्ञान, प्रविधिमैत्री आधुनिक पूर्वाधारमा जोड दिएको छ। त्यसैगरी वैज्ञानिक क्यालेन्डर, विद्यार्थी भर्ना र रिजल्ट समेत अनलाइनमार्फत गर्नुपर्ने उल्लेख गरिएको छ। ई-लाइब्रेरी, प्रविधिमैत्री कक्षा कोठा, विद्यार्थीलाई इन्टरनेट र डाटा सुविधा, रोजगारमुखी शिक्षा प्रणाली लगायतका विषयहरू समेटिएका छन्। यसका साथै तालाबन्दीमुक्त विश्वविद्यालय हुनुपर्ने समेत घोषणापत्रमा उल्लेख गरिएको छ। मेडिकल शिक्षामा सर्वसाधारणको पहुँच हुनुपर्ने लगायतका विषयवस्तुहरूलाई प्राथमिकतामा राखिएको छ।
केही क्याम्पसमा विवाद
स्ववियु निर्वाचन नजिकिएसँगै नेपाल ल क्याम्पस, त्रिचन्द्र क्याम्पस, आरआर लगायतका केही क्याम्पसहरूमा विवाद देखिएको छ।
नेपाल ल क्याम्पसमा नेकपा एकीकृत समाजवादी निकट विद्यार्थी सङ्गठन अनेरास्ववियुले तालाबन्दी गरेको छ। अनेरास्ववियुले फागुन २१ गते स्ववियु निर्वाचनको प्रयोजनका लागि नेपाल ल क्याम्पसमा प्रकाशित गरेको मतदाता नामावलीमा भर्ना भइसकेका विद्यार्थीहरूलाई नियोजित रूपमा नाम प्रकाशन नगरेको भन्दै तालाबन्दी गरेको छ।
अनेरास्ववियूका अध्यक्ष विशालदत्त भट्टले एक प्रेस विज्ञप्ति जारी गर्दै उक्त नामावलीमा छुटेका मतदाताहरूको नामावली तत्काल प्रकाशन गर्न माग गर्दै नामावली प्रकाशन नहुँदासम्म तालाबन्दी यथावत् रहने जनाएको छ। अनेरास्ववियु, नेविसंघ लगायतका विद्यार्थी सङ्गठनले भने तालाबन्दीको विरोध जनाएका छन्।
त्यस्तै, त्रिचन्द्र क्याम्पसमा स्ववियु निर्वाचनबारे विवाद उत्पन्न भएको छ। जसका कारण विद्यार्थीहरूको नामावली प्रकाशन हुन सकिरहेको छैन। त्रिचन्द्रमा स्ववियु निर्वाचन हुँदैन कि भन्नेमा विद्यार्थीहरू चिन्तित देखिएका छन्। अनेरास्ववियु र अनेरास्ववियु क्रान्तिकारीले स्ववियु निर्वाचन बिथोल्न खोजेको आरोप नेविसंघको छ भने अनेरास्ववियु र अनेरास्ववियु क्रान्तिकारीले नेविसंघले फर्जी विद्यार्थी भर्ना गरेको तोडफोड गरेको आरोप लगाएको छ।
नेविसंघ त्रिचन्द्र क्याम्पसका नेता एनपी जोशीले अनेरास्ववियुको पराजित मानसिकताबाट विभिन्न बहानाबाजीमा क्याम्पस प्रमुख र निर्वाचन समितिलाई आफ्नो कार्यालय प्रवेश निषेधको ब्यानर क्याम्पसको गेटमा झुन्ड्याउने वार्तामा बस्न नचाहने, बैठक बिथोल्ने, क्याम्पस प्रमुख र निर्वाचन समितिलाई धम्की दिएको आरोप लगाएका छन्। उनले २५ गते मतदाता नामावली प्रकाशन गर्न खोज्दा नेविसंघ र निर्वाचन समितिका संयोजक राजेन्द्र गौतममाथि हमला गरेको आरोप नेता जोशीले लगाए।
त्यसैगरि अनेरास्ववियु क्रान्तिकारीका नेता अशोक भण्डारीले नेविसंघ र अनेरास्ववीयुबीच बैठकमै हात हाला–हाल भएको, टेबल-कुर्सी भाँचेको र क्याम्पसका प्राध्यापकमाथि हातपात भएको आरोप लगाए।
त्यसैगरी रत्नराज्य लक्ष्मी क्याम्पस (आरआर)मा समेत मतदाताको अन्तिम नामावली प्रकाशनको कार्य स्थगित गरिएको छ। आरआर क्याम्पसले बिहीबार एक प्रेस विज्ञप्ति जारी गर्दै स्ववियु निर्वाचन समितिबाट प्रकाशित मतदाता नामावली उपर दाबी विरोधका आधारमा छानबिन छुट भएका नाम सच्याई टाँस गर्नुपर्नेमा तालाबन्दीका कारण दाबी विरोधका निवेदनहरुमाथि छानविन गर्ने कार्य स्थगित गरेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
