काठमाडौं- आईसीसी लिग–२ अन्तर्गतको त्रिदेशीय ओडीआई शृंखलाको अन्तिम दिन यूएईलाई नेपालले ४२ रनले पराजित गरेको छ। टस जितेर ब्याटिङ रोजेको नेपालले ५० ओभरमा ८ विकेट गुमाएर २२९ रन बनाएको थियो।
उक्त लक्ष्य पछ्याउने क्रममा युएई १८७ रनमा अलआउट भयो। नेपालका लागि अलराउन्डर दिपेन्द्र सिंह ऐरीको महत्त्वपूर्ण तीन विकेट लिए। उनले ८२ रन बनाएर खेलिरहेका आसिफ खान र ५० रन बनाएर खेलिरहेका आर्यन लार्कालाई आउट गरे। लयमा रहेका दुई ब्याटर आउट भएपछि युएईले खेल गुमाएको हो।
सोमपाल कामीले पहिलो ओभरको दोस्रो बलमै विकेट लिएर राम्रो सुरुवात गरेका थिए। उनले पनि २६ रन दिएर तीन विकेट लिए। यसैगरी नेपालका लागि आरिफ शेख, सन्दिप लामिछाने र करण केसीले एकएक विकेट लिए।
ब्याटिङतर्फ भने भीम सार्कीले नेपालको धरमराएको ब्याटिङ सम्हालेर खेललाई लयमा ल्याएका थिए। सार्कीले ९९ बलमा ७० रन बनाएका हुन्। नेपालका लागि आरिफ शेखले ५६ बलमा ४३ रन बनाउँदै अविजित रहे। यसैगरी सन्दीप लामिछानेले ४० बलमा २७ रन बनाएर महत्त्वपूर्ण योगदान गरे। करण केसीले ११ बलमा १७ रन र प्रतिश जिसीले ६ बलमा ११ रन बनाए।
नेपालले ५० रन नजोड्दै महत्त्वपूर्ण तीन विकेट गुमाएको थियो। ओपनर आसिफ शेख १४ बलमा जम्मा ६ रन बनाएर क्याचआउट भए।
त्यसैगरी, ज्ञानेन्द्र मल्लको खराब ब्याटिङ जारी रहने क्रम दोहिरिँदा उनी २६ बलमा जम्मा ११ रन बनाएर बाहिरिए। टप थ्री पुगेर विश्वकप छनोट खेल्न निर्णायक मानिएको यो खेलमा कप्तान रोहित पौडेल पनि सम्हालिन सकेनन्।
उनी ५ बल खेलेर एक रन मात्रै जोड्दै पेभेलियन फर्किए। राम्रो प्रदर्शन गरिरहेका कुशल मल्ल ३२ रनमा बाहिरिए भने दीपेन्द्र सिंह ऐरीले जम्मा ४ रन जोड्न सके।
यो जितसँगै नेपालले विश्वकप छनोट खेल्ने सम्भावना कायम राखेको छ। युएई सिरिजमा तीन खेल जित र एक खेलमा हार बेहोरिएर फर्किएको नेपालले घरेलु मैदानमा चारवटै खेल जित्दा टप थ्री मा पुग्ने सम्भावना छ।
आजको खेलमा पराजित भएसँगै युएई विश्वकप छनोटबाट बाहिरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_PJ3Pux3W9j-1771414611.jpg)
-1764146706.png)
