काठमाडौं- आइसिसी विश्वकप लिग–२ त्रिकोणात्मक ओडिआई सिरिजमा युएई पपुवा न्युगिनीसँग पाँच विकेटले पराजित भएको छ। यो पराजयसँगै युएई पनि दबाबमा परेको छ।
विश्वकप छनोट खेल्नका लागि टप थ्रीमा पर्न नेपाल र युएई दुवैले अब हुने सबै पाँच वटा खेल जित्नुपर्ने हुन्छ। सोमबार नेपाल र युएईबीच हुने खेल दुवै टोलीका लागि 'निर्णायक' बनेको छ। यसअघि केही सहज अवस्थामा रहेको युएई आगामी खेलमा दबाबमा हुँदा नेपाललाई सहज हुनेछ।
आइतबारको खेलमा युइईले जम्मा ९८ रनको विजयी लक्ष्य दिएको थियो। पपुवा न्युगिनीले २६.५ ओभरमा ५ विकेट गुमाउँदै पूरा गर्यो।
पिएनजीको जितमा ओपनर टोनी उराले अविजित ३५ रन जोडे। यसैगरी चाद सोपर ८ रनमा अविजित रहे। पपुवा न्युगिनीका ओपनर किप्लिङ डोरिगा २ रनमा क्याच आउट भए। यसैगरी सेसे बाउले १८ रन, असाद भाला शून्य, हिरि हिरि १४ रनमा आउट भए। युएईका रोहन मुस्तफाले दुई, आयन खान, जुनैद सिद्दिक र जहुर खानले एक एक विकेट लिए।
त्यसअघि दुबई इन्टरनेसल क्रिकेट स्टेडियममा टस हारेर पहिला ब्याटिङ पाएको युएई २६.२ ओभरमा ९७ रनमा अलआउट भयो। युएईका वृत्य अरविन्दले सर्वाधिक २६ रन बनाए।
पपुवा न्युगिनीको जितमा मध्य गतिका बलर राइली हेकुरेले ४.२ ओभरमा १ मेडनसहित १३ रन खर्चेर पाँच विकेट लिए। चाद सोपरले ७ ओभरमा १ मेडनसहित २७ रन खर्चेर ३ विकेट लिए।
युएई रोकिँदा नेपाललाई राहत
नेपाल बराबर नै ३१ खेल खेलिसकेको युएई ३१ अंक सहित पाँचौं स्थानमा छ। यदि आजको खेलमा युएईले जितेको भए उसले ३३ अंक जोड्थ्यो। बाँकी पाँच खेलमध्ये एउटा गुमाउँदा पनि ४१ अंकसहित टप ३ मा स्थान बनाउने पक्का हुन्थ्यो।
पीएनजीले घरेलु मैदानमा जारी सिरिजमा लगातार हराउँदा नेपाललाई राहत भएको छ। सोमबार नेपालसँग प्रतिस्पर्धा गर्ने युएई विश्वकप छनोटमा पुग्न नेपालजत्तिकै दबाबमा परेको छ। यदि आजको खेल जितेको भए नेपालभन्दा युएई कम दबाबमा हुन्थ्यो।
टप थ्रीमा पर्दै विश्वकप छनोटमा पुग्न बाँकी पाँच वटै खेल जित्नैपर्ने दबाबमा युएई पुगेको छ। समान ३१ खेल खेलेर ३० अंक जोडेको नेपालले पनि टप ३ मा पुग्न पाँच वटै खेल जित्नुपर्नेछ।
आजको हारसँगै नेपाल र युएईबीच हुने सोमबारको खेल 'निर्णायक' बनेको छ। सोमबारको खेल गुमाउने टिमले विश्वकप खेल्ने सम्भावना समेत गुमाउनेछ।
अहिले सबै ३६ खेल खेलिसकेको स्कटल्यान्ड २४ जित र १० हारका साथ ५० अंक बनाएर शीर्ष स्थानमा छ। ३६ खेलमा २१ मा जित र १३ मा हार बेहोरेको ओमानले ४४ अंकका साथ विश्वकप छनोट यात्रा पक्का गरिसकेको छ।
३६ खेल नै पूरा गरेको नामिबियाले १९ जित र १६ हारका साथ ३९ अंक जोडेर तेस्रो स्थानमा छ। अब हुने पाँच खेलमा नेपाल वा युएईले पाँच वटै जितेमा नामिबिया चौथो नम्बरमा पुग्नेछ। यदि बाँकी खेलमा उनीहरुले एउटा-एउटा गुमाए भने पनि नामिबिया नै विश्वकप छनोटमा जानेछ। सोमबारदेखि नेपाल र युएई आगामी सबै खेल्ने जित्ने प्रयाससहित मैदानमा उत्रिनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
