स्ववियु निर्वाचन प्रक्रिया सुरु, नेविसंघका अलग–अलग संगठन दर्ता

राजनीति

नेपाल लाइभ शुक्रबार, फागुन १९, २०७९ १७:१८

स्ववियु निर्वाचनका लागि त्रिविमा संघ दर्ता गर्दै नेपाली कांग्रेस संस्थापनइतरका विद्यार्थीहरू।

काठमाडौं– स्वतन्त्र विद्यार्थी युनियनको निर्वाचनका लागि शुक्रबार संघ, संगठन दर्ता सुरु भएसँगै स्ववियुको निर्वाचन प्रक्रिया अघि बढेको छ।

१४ वर्ष देखि हुन नसकिरहेको स्वतन्त्र विद्यार्थी युनियनको निर्वाचनका लागि त्रिभुवन विश्वविद्यालय विद्यार्थी कल्याण तथा खेलकुद निर्देशनालयले त्रिवि मातहत रहेका आंगिक एवं सम्बन्धनप्राप्त क्याम्पसहरूलाई शुक्रबार विद्यार्थीका संघ, संगठन एवं समूह दर्ताका लागि आह्वान गरेको थियो।

सोही अनुरुप विभिन्न विद्यार्थी संगठनहरू नेपाल विद्यार्थी संघ,अनेरास्ववियु, अनेरास्ववियू क्रान्तिकारी, अनेरास्ववीयू, स्वतन्त्र विद्यार्थी समूह, राष्ट्रिय प्रजातान्त्रिक विद्यार्थी समूह, वैज्ञानिक समाजवादी विद्यार्थी समूह लगायतका दर्जनौं विद्यार्थी संगठनहरूले संगठन दर्ता गरेका छन्।

शुक्रबार बिहान १० बजेदेखि दिउँसो ३ बजेको समयसीमामा विद्यार्थीका संगठनहरू दर्ता गरिसक्नु पर्ने कार्यतालिका भए पनि केही विद्यार्थी संगठनको आन्तरिक विवादका कारण आइतबारसम्मका लागि दर्ता गर्ने म्याद थपिएको त्रिवि विद्यार्थी कल्याण तथा खेलकुद निर्देशनालय निर्देशक पशुपति अधिकारीले नेपाल लाइभलाई जानकारी दिए।

सम्बन्धित क्याम्पसहरूमा नै संघ, संगठन र समूह दर्ता हुने भएका कारणले के कतिले दर्ता गरे भन्ने रेकर्ड विद्यार्थी कल्याण तथा खेलकुद निर्देशनालयसँग नहुने उनको भनाइ छ। उनले अहिलेसम्म वीरगञ्जस्थित ठाकुराम बहुमुखी क्याम्पसमा सबैभन्दा बढी ३३ वटा संघ, संगठन दर्ता भएको जानकारी पाएको र अरु क्याम्पसहरूमा के कति भन्ने थाहा हुन नसकेको बताए।

नेविसंघमा संस्थापन र इतरपक्षबाट छुट्टाछुट्टै दर्ता
नेपाली कांग्रेसनिकट नेपाल विद्यार्थी संघले दुईवटा छुट्टाछुट्टै संघ दर्ता गरेको छ। त्रिभुवन विश्वविद्यालय केन्द्रीय क्याम्पस कीर्तिपुर, नेपाल ल क्याम्पस प्रर्दशनी मार्ग, धनकुटा बहुमुखी क्याम्पस लगायतका विभिन्न क्याम्पसहरूमा छुट्टाछुट्टै संघ दर्ता गरेको संस्थापन इतरपक्षका संयोजक भुवन भट्टले नेपाल लाइभलाई जानकारी दिए।

स्ववियु निर्वाचनका लागि त्रिविमा संघ दर्ता गर्न जाने क्रममा नेपाली कांग्रेस संस्थापन पक्षका विद्यार्थीहरू।

सोही समूहका त्रिविका कार्यबाहक अध्यक्ष गणेश भण्डारीले तोकिएकै समयमा आफूहरूले संघ दर्ता गरेको जानकारी दिए। त्रिभुवन विश्वविद्यालयमा संस्थापन पक्षबाट राजेश श्रेष्ठ लगायतको टिमले संघ दर्ता गरेका छन्। त्यसैगरी नेपाल ल क्याम्पसमा संस्थापन पक्षबाट सुरज सेजुवाल नेतृत्वले संघ दर्ता गराएका छन् भने, इतरपक्षबाट मुकेश सेञ्चुरीले अलग्गै दर्ता गरेका छन्।

त्रिवि विद्यार्थी कल्याण तथा खेलकुद निर्देशनालय निर्देशक अधिकारीका अनुसार दुईवटा समूह दर्ता भएको अवस्थामा एउटा खारेज हुनेछ। जसका लागि प्रत्येक क्याम्पसमा निर्वाचन समितिले नै निर्णय गर्ने अधिकारीले जानकारी दिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

अर्थ मन्त्रालयका सहसचिवहरुको जिम्मेवारी हेरफेर

ट्रम्प प्रशासनद्वारा युएसएआईडीका प्रमुख निरीक्षक बर्खास्त

पहिले पनि त्यस्तो घटना घटिसकेको अनुभूति अर्थात् डेजा भु: भूत, वर्तमान, कि भ्रम?