काठमाडौं– नेपाली कांग्रेसका महामन्त्री एवं सांसद गगनकुमार थापाले प्रधानमन्त्री पुष्पकमल दाहाल ‘प्रचण्ड’ले जोखिम मोलेकै कारण पुरानै गठबन्धन ब्युँतिएको दाबी गरेका छन्। राष्ट्रपतिको उम्मेदवारको विषयमा मतभेद भएपछि आफूलाई प्रधानमन्त्री बनाउने एमालेसँगको गठबन्धन तोडेर माओवादी अध्यक्ष तथा प्रधानमन्त्री प्रचण्ड तत्कालीन चुनावी गठबन्धनमा फर्किएको थापाले बताए।
उक्त गठबन्धनले राष्ट्रपतिमा कांग्रेसका रामचन्द्र पौडेललाई अघि सारेको छ। त्यसपछि नयाँ बनेको गठबन्धनका दलहरुले आफ्ना प्रदेश सांसदहरुलाई शुक्रबार संयुक्तरुपमा सम्बोधन गरिरहेका छन्। त्यसैअनुसार शुक्रबार बागमती प्रदेशको राजधानी हेटौँडामा आठ दलीय गठबन्धनका सांसदहरुलाई सम्बोधन गर्दै थापाले उक्त दाबी गरेका हुन्।
‘प्रधानमन्त्री पुष्पकमल दाहाललाई प्रधानमन्त्री हुने कुरा नै महत्त्वको कुरा थियो भने यो गठबन्धनमा आइरहनै पर्दैनथ्यो। यो गठबन्धन बनाउनै पर्दैन्थ्यो। माओवादी केन्द्रले उपराष्ट्रपति पनि पाउँथ्यो। त्यस्तै परे माओवादी केन्द्रले एमालेको समर्थनमा पाँचै वर्ष प्रधानमन्त्री पनि पाउँथ्यो। ल्याप्चे, तमसुक त्यो कालो दलेर जे जे गर्नु पर्ने हो उठेर बसेर सबै गरिदिन्थ्यो,’ महामन्त्री थापाले भने, ‘प्रधानमन्त्री हुने कुरा तलमाथि भए होस् तर जुन उद्देश्यका साथ यो गठबन्धन फेरि ब्युँतिन्छ र फर्कन्छ भने म त्यो जोखिम उठाउन तयार छु भन्ने कुरा माओवादी केन्द्रका अध्यक्षले, प्रधानमन्त्रीले नमानेको भए यो बाटो अघाडि बढ्ने अवस्था बन्दैन्थ्यो।’
थापाले प्रचण्डलाई अस्थिर भनेर टिप्पणी हुने गरेकोले उक्त विषयलाई चिर्न सबै लाग्न पनि आह्वान गरेका छन्। ‘यो कुरा हामीले मात्रै बुझेर हुँदैन। तलसम्म बुझाउनु पर्छ। अहिले अस्थिर, विचलित, जे पनि गर्नसक्ने, विश्वासघात गर्ने भनेर प्रश्न उठाइरहेको बेला प्रधानमन्त्रीले मात्र यसको उत्तर दिएर हुँदैन। हामीले पनि बोल्नु पर्छ, हामीले उत्तर दिनु पर्छ,’ थापाले भने,‘ जे सत्य हो त्यो कुरा भन्नु पर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
