काठमाडौं– अख्तियार दुरुपयोग अनुसन्धान आयोगले गण्डकी प्रदेशको भौतिक पूर्वाधार, सहरी विकास तथा यातायात मन्त्रालयका तत्कालीन सचिवसहित निमित्त निर्देशक र पूर्वाधार विकास कार्यालय गोरखाका सिनियर डिभिजनल इन्जिनियविरुद्ध भ्रष्टाचार मुद्दा दायर गरेको छ।
सार्वजनिक सम्पत्ति हानी नोक्सानी गरी भ्रष्टाचार गरेको आरोपमा अख्तियारले मन्त्रालयका तत्कालीन सचिव ईश्वरचन्द्र मरहट्टा, प्रदेश सडक निर्देशनालयका निमित्त निर्देशक रामकुमार श्रेष्ठ र पूर्वाधार विकास कार्यालयका इन्जिनियर ओमराज ढुंगानाविरुद्ध विशेष अदालतमा मुद्दा दायर गरेको हो।
अख्तियारका अनुसार आरोपीहरुले गोरखा नगरपालिका–३ जरेवरस्थित दरौदी नदीमाथि तत्काल बाटो नभएको स्थानमा पुल राखेर रकम दुरुपयोग गरेका थिए। उक्त पुलका सम्बन्धमा परेको उजुरीमा अनुसन्धान गर्दा मरहट्टाले परामर्शदातासँग सम्झौतामा हुादै नभएको कार्यक्रम थप गरेको, पुलको स्थान र नाम परिवर्तन गरी डिजाइन गराउन स्वीकृत गर्नुका साथै उक्त दरौदी खोला पुल, जरेवरको निर्माण कार्य गराउन मन्त्रालयस्तरबाट उक्त पुलको छनोट गराइ कार्यक्रम तयार गरी स्वीकृतिको लागि प्रदेश सभामा पेश गरी आफ्नो पदको दुरुपयोग गरेको पाइएको छ।
उनीविरुद्ध अख्तियारले उक्त प्रकरणमा दोषी ठहर गर्दै पाँच करोड ३५ लाख ५२ हजार ६ सय ७१ रुपैयाँ बिगो कायम गरी कैद र जरिवाना माग गरेको छ। यस्तै प्रदेश सडक निर्देशनालयका तत्कालीन निमित्ति निर्देशक श्रेष्ठले उक्त पुलको निर्माण कार्य गराउन बदनियत राखी गुरुयोजना, ग्रामीण सडक, सहरी सडक वा कुनै रणनीतिक सडकसमेत नभएको काल्पनिक सडकको नाम दिई पुलको डिजाइन गरी उक्त डिजाइवापतको ५ लाख ७१ हजार ७ सय ८० रुपैयाँ लिएको पाइएको छ।
राज्यको सम्पत्ति तत्काल औचित्य नभएको स्थानमा खर्च गरी सरकारी सम्पत्ति हिनामिना गरेको आरोपमा उनीविरुद्ध अख्तियारले ५ लाख ७१ हजार ७ सय ८० रुपैयाँ बिगो कायम गरी कैद र सोही रकम बराबरको जरिवाना मागदाबी गरेको छ।
यसका साथै इन्जिनियर ढुंगानाले बदनियतपूर्वक गुरु योजना, ग्रामीण सडक, सहरी सडक वा कुनै रणनीतिक सडकमा समेत नपर्ने काल्पनिक सडकको नाम दिई जरेवरस्थित दरौदी खोला पुलको एकापट्टि रहेको पहुँचमार्ग सामुदायिक वनक्षेत्रमा कथित पुल निर्माणको नाममा वनको अनुमति वेगर सार्वजनिक वनक्षेत्रको जथाभावी प्रयोग गरी बाटो निर्माण गराएकाले उनीविरुद्ध भ्रष्टाचार निवारण ऐन, २०५९ को दफा ८ को उपदफा (३) बमोजिम सजाय माग दाबी गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
